Read Mayangna Jeremías 51 Bible Online

Jeremías 51 - Mayangna bible

Jeremías 51

¹Papang yulwi: “Wing parasni as sihki, Babilon dawak Caldeo balna[71] niningna yakat.

²Yamtingkat Babilon witing waihnila balna kidika dutni diyayamna karang; plawar minik wing yakat ruhmwa kapat; yamting kat witing sauni kidika muih dis dana karang. Wah kalanin mani kidika kiwi kawakat, pa bitik kaupak kalahwi witing nining yakat kalbabauwarang.

³¡Las ruhmyang balna kidika lasnina ridi yayamwang! ¡praknina ayan kidika kakawang![72] ¡Babilon wawahnima balna yakat miniknakun tatalwinih; kalbauyang muihni balna kidika bitik imuktanauh!

⁴Caldeo balna saunina bitik yakat muih balna kidika tapas yakat bubukna karang,

⁵Israel dawak Judá kidika yang niking yakat dutni yayamna yang Papang paraski bitik dutayang, Israel Papangni maisihnidis, yang baisa ruhmtik datasyang.

⁶“¡Babilon kaupak alahwa iranauh! ¡Witing dutni yamna kidika yulni dadauwinih! Adika awarni kuduh biritik kalyamnik, dawak yang lautik kalana awaki witing dunin kidika praisni kat.

⁷Babilon kidika yang tingki yakat gol sunitak as dai, dawak muih bitik yakat wasak diawadai. Nisan balna kidika wainni didiwa dai dawak sinsnina diswadai.

⁸Kauna sirihni laih Babilon kidika bahwi uhna. ¡witing yulni aidanauh! Di kalina sinika duaitanauh, taldarang kalyamwarangpa.”

⁹Babilon yakat uman sinika ānamayang, kauna kalyamwas dana. ¡Datanauh! Mahka masauki kat kat mawanang, kat witing dutni yamna kidika laih makau kisang kat kilwi kawi dawak mukus yakat bik dulauwi.

¹⁰Papang yaklauwi marahmki kidika kalawak minit bayakna. Aiwanangkat Sayan yakat mawi yuldanang mayang Mapapangki yamna kidika.

¹¹Papang laih Babilon kidika daukalpamnin kulwi, dawak Media balna kingnina uswi sahmuhna kidika kulnin kau. Kidika ki Papang biriwi yamwa kidika, witing uni kau yayamna yulni. ¡Sibang kidika ridi yamtanauh! ¡Dawak namatna daknin kidika bik yamni laihtanauh!

¹²¡Babilon daklana balna niningyakat kalbaunin kidika sain kalatanauh! ¡Maintalnin kidika baisa parasni yamtanauh! ¡Makau kilwi maintalnin kidika ātanauh! ¡Isning aiwas kat tanipas yakat kalahwi kalbaunin kidika ātanauh! Kat papang laih ridi kalna dawak yamna, witing yamnin dini balna yulna dai kidika Babilon muihni balna niningna yakat.

¹³Man, Babilon was nunuhni kung yakat man kidika, ritsni nuhni dutaman, ¡kauna māma witni kidika kaiwi kana, baisa sau akat atnam kidika!

¹⁴Papang parasni nuhni bitik duwa kidika witing sangnika kau yakwi yulna: “¡Man waihmala kidika kalating kat sisin kapat mahni kalna karang, dawak kidika balna man mamat yakat minit bayakna kidika unbabauwarang!”

¹⁵Papang parasni kau duwi, sau adika yamna; sinsni tuhni kau, di balna bitik yamna; dawak sinsni sirihni kau makau kisang kidika yamna.

¹⁶Dinit alwana kapat yulwak, was kidika parasni yulwi, makau kisang yakat, sau sutni kaupak kalawak mukus kidika kilwi, yamwak alwana kidika yaringni lapwi, waslauwa pasyak dawak wing kalawak kalahwi apakna sakkidika kaupak.

¹⁷Muih kidika laih tapani dadasni, dawak di amanglawaski. Dawan dauh alas diyuyulwi, yamyang muihni balna yakat: kidika balna laih wayani manah ki, dawak bik alasmanah ki.

¹⁸Kidika dini balna laih minit diski, karinin dini manahki, Dawan la yamwarang yakat bahwi disyamwarang ki.

¹⁹¡Jacob Papangni kidika ais satukyah, di balna bitik yamyang kidika! Israel kidika witing dini yakwi duna. Papang parasni nuhni bitik duwi, bahang kidika laih witing ayangni.

²⁰“¡Babilon, man laih yang amarki man, yang war kalbautayang dini! Man yakau nisan balna kidika itayang, dawak king panina balna bik daukaltayang.

²¹Man yakau aras dawak, aras kilyang muihni balna bik itayang, dawak kārnina balna bik daukaltayang.

²²Man yakau muih ahal dawak yayal bik itayang, muih bararak, wawahma, dawak sirarau bik itayang.

²³Man yakau sīp maintalyang muihni balna dawak sīp balna bik itayang, kaput bik laih di dahnin pāni tutukwa balna dawak wark tuniruh ahalmuk bik itayang, dawak kabamint muihni balna bik.

²⁴“Kauna manna mamaknapa yakat, Babilon dawak Caldeo muihni balna kidika bik lautik diaki, Sayan kau dutni yayamna kidika yulni. Yang Papangyang kat yultayang.

²⁵Yang manna namangnakauh yang, asang balna daukalyang, dawak sau bitik daukalwa kidika. Yang Papangyang kat yultayang. Yang tingki dulautik wah diaki, yamtingkat kipala walsah munah piramma, dawak asang busna kapat mayamki.

²⁶Madaukalna kinipala balna kidika as bik sip-awas karang ū yamna atnin. Kauhmak wanilang as awama ban kaput atnin. Yang Papangyang kat yultayang.

²⁷“¡Kidika pāni minityakat sain kalatanauh mahka kalbaunin! ¡Trumpit puhtanauh dawak nisan balna kidika ridi yamtanauh Babilon niningyakat kalbaunin! ¡Ararat, Mini dawak Askenaz kingni balna niningyakat yaklauna! ¡Kalbauyang balna taninatuna nuhni as atanauh war adika tatuna duna atnin! ¡Aras kau kilna muihni balna kidika kalatanangkat kawi kiwang sihm sisin ahanna kapat!

²⁸Nisan balna kidika ridi yamtanauh mahka kalbauna atnin; Media kingni balna, kabamintni dawak tunan muihni ūk balna kidika ridi yamtanauh, dawak sau muihni balna bitik parasnina duduwa balna kidika bik.”

²⁹Sau kidika yukwi dawak kal-isihwi, kat Papang warkni balna kidika yamwa bahang Babilon kidika kauhmak wanilang yamna atnin.

³⁰Babilon muihni kalbauyang balna kidika kalbauwas dadana dawak ūnina parasni yakat wawatna; parasnina bik dis dana yayal kapat. Tawannina nunuhni yakat kawi duduna dawak ūnina balna kidika bik bubusna.

³¹Yul muryang balna kidika uiwa sakki Babilon kingni yakat kalyulna atnin, witing tawanni nuhni kidika uman kawi duduna bitik.

³²Waihla balna kidika was murwi bayakwa yakat kawi duduna, tanitna dadakwa pāni[73] balna yakat bik bubusna dawak kalbauyang balna kidika yamaduduna.

³³Kat Papang parasni nuhni bitik duwa kidika, Israel Papangni, yulwi: “¡Babilon kidika laih atatakna ki di dahnin pāni as kat, di minik balna unitak yakwi atatakwa kapat, dawak sirihni kat di minik balna bahnin mani kiwi kawarang!”

³⁴Sayan tawanni Jerusalén yulwi: “Nebokatnesar Babilon kingni, yaiswi biswi dawi yakasna; di lakwi kasnin pāni manah kapat yayamna. Kuma paskau di anyang dutni kapat yadalna; dukih kalawa dai kidika kalbungdana dawak sutni kidika ruhmmukna.[74] ¡Babilon minitlauwang yangkau yayamna kidika yulni! ¡Caldeo balna minitlalauwang wanaihki balna ihina kidika yulni!”

³⁵

³⁶Papang yulwi: “Man lama kat yamki, waihmala balna yakat biritik diyamki. Babilon wasni balna kidika buhni manh yamki,

³⁷di daukalwak uduhna as karang, kauhmak wanilang sunilu pāni kalna karang, muih as bik yalahnin sip-awas karang muih bitik laih di bilninalauna karang.

³⁸Witingna bitik laih layan kapat ihihwarang dawak bik layan walanibis balna kapat.

³⁹Ma daihwakat, yang was diating didiwarang bahang kidika laih wasak dilaihwakat sinsnina diswarang.[75] Kaput laih makauh as dilaihwak bubukwarang, sahmuhwas kaput atnin. Yang Papangyang kat yultayang.

⁴⁰Usnit dawak inin pāni yakat duwi kiuna karang, sihm sīp, kuts dawak turuh dukiwa kapat.”

⁴¹¡Babilon,[76] tawan nuhni ayangni nuhni sau bitik yakat, bukna dawak kawi laihwi duduna! ¡Nisan balna kidika ampat yamaduduwih talwi!

⁴²Kuma kidika bang-ilna Babilon yakat, lalamwa nunuhni kidika minityakat utuhwi lakna.

⁴³Tawanni nunuhni balna kidika kauhmak wanilang yamna, sau buhni didis, bang kidika yak laih muih as bik yalahwas ki, dawak yakut bik muih bayayakwas ki.

⁴⁴“Dawan dauh Bel kidika yakat wah kalaki ki, kalyamtingkat dalna balna kidika tining yakwarang, nisan balna kidika watwi witing yakat uiwas karang. ¡Babilon daklana balna kidika uman bubukna!

⁴⁵¡Yang tawanki kidika kaupak alahwah, manna sangmanaka laihta yaktanauh, yang kulnik daukalna daihni kidika kaupak!

⁴⁶Muihsak dadauwinih, dawak bik yamaduduwinih, yul balna kalahwa kidika adika sauni pas akat. Kurih kaiwa bitik yakat yul balna kidika satuk kalahwarang ki, kalbaunin yulni kalahwarang ki, dawak kabamint balna biri biri kalbabauwa kidika bik.

⁴⁷Kaput bahang, mani balna kaiwi, Babilon daniwan dau balna yakat wah dianik mani. Muih balna kidika bitik laih sau yakat bubukna karang, dawak muih dauna muihni manah kalna karang.

⁴⁸Makau kisang, sau dawak di balna bangkidika bitik alasna duduna karang Babilon kidika bukwak, aiwarang muihni kidika tingpal niningkaupak kaiwarang mani kat. Yang Papangyang kat yultayang.

⁴⁹Agha, Babilon laih buknin ki Israel muihni balna ina kidika yulni, dawak kaput bik sau bitik yakat muih ina kidika yulni bik.”

⁵⁰Manna, muih dauwasak kidika kaupak ira lawamana kidika, iranauh wattas ki, dawak naikau yawanamana karang bik Papang yakat kultanauh, dawak Jerusalén bik ismangna kattanauh.

⁵¹Manna yultamana: “Asalni dakadi dutni kalyulwak dakadi. Risnipik dis kidika mamuhki yakat mukna ki, kat sau ūk muihni balna kidika makat yulni ūnipas kau pa maisihnidis kidika yakat kakana bahang.”

⁵²Kauna Papang yulwi: “Mani balna kaiwi, Babilon daniwan dauh balna yakat wah diana atnin, dawak witing sauni bitik yakat muihnina dakna balna kidika kakaidarang.

⁵³Babilon kidika makau kisang yakat kilkiwarang witing parasni kidika baisa parasni yamna atnin, kauna kidika yakat bik waihnila balna kidika sihki ina atnin. Yang, Papangyang kat yultayang.”

⁵⁴Babilon kaupak dalawak sararahwa kidika lāih dakanaki, Caldeo balna panina kaupak di parasni yulwa kidika bik lāih dakana ki.

⁵⁵Papang yaklauwi, Babilon kidika daukalpamwi, dawak tapani dadasni kidika yakat dahn kalwi. Waihnila balna kidika, kuma lalamwak parasni yulwa kapat parasni witingna minitna yakat bukna karang.

⁵⁶Babilon yakat daukalpamna aina; kalbauyang muihni balna kidika uman laihwi lasnina balna dai kidika bitik babahna. Kat Papang laih Papang bahang witing yaklauwi muih balna bitik yakat minitna diawi.

⁵⁷King, Papang parasni nuhni bitik duwa kidika yulwi: “Babilon tanituna balna kidika wasak diaki, sins nuhni duyang balna dawak kabamintni balna yakat bik, dawak kalbauyang muihni balna yakat bik, dawak miniknakauhwak bukwi kamamarang, kauna kidika kaupak watwi sahmumuhwas karang ban kaput atnin.

⁵⁸Yang, Papang paraski nuhni dutayang kidika yultayang: Babilon daklana tubakni kidika bahna karang bitik ki, dawak dūrni nunuhni balna kidika kuh kau busna karang. Nisan balna kidika dauh palni wark kalalahna, kat parasnina yayakna dai kidika kuh yakat busna karang bahang.”

⁵⁹Judá kingni Sedequías, witing king kawak kurih arungka laihna yakat, prapit Jeremías yaklauwi di yamnin as kalana Maasías mani, Nerías walanibis Seraías yakat. Seraías kidika laih witing king Sedequías kidika Babilon yakat kiwak witing bik kiuna dai, king payahwa pāni kidika ridi yamwi dangni bik rina atnin.

⁶⁰Jeremías wauhtaya as ulna dai, bahang kidika yakat ulna kidika laih Babilon yakat wah sihwarang yulni balna ulna dai, yuldarang kat wah balna bitik kiwarang kidika Babilon yakat,

⁶¹dawak Seraías yakat kalyulna: “Babilon yakat yawama kat, amungtala yulta talma adika yulni balna bitik.

⁶²Usnit dawak yulma: ‘Papang man yulnaman adika sauni daukalpamnam, yuldarang laih muih as bik kaiwi yalahnin sip-awas, dawak didauh balna bik, kat man lawa walang kauhnimak yampamma bahang ban kaput atnin.’

⁶³Dawak yulta talma usnit kat wauhnitaya adika kipala as sit data Éufrates wasni yakat ruhm'apamma,

⁶⁴dawak yulma: ‘Babilon kidika kaput kawi kiwarang ki, bahang watwi sip yaklauwas karang ki wah nuhni Papang sihwarang kaupak.’ ”[77] Jeremías yulni balna kidika akat dahnkalwi.