Read Mayangna Jeremías 6 Bible Online

Jeremías 6 - Mayangna bible

Jeremías 6

¹Benjamín sauni pāni kau muih bang kidika, ¡maldanamna pāni waltanauh! ¡Jerusalén kaupak alahwa iranauh! Trumpit puhtanauh Tecoa pāni yakat, niningkanin as dulautanauh Bet-haquerem yakat, kat daukalna dutni kidika nining yak kaiwi.

²Sayan pāni kidika sau langni yaksihni kaputki,[6]

³kidika yaihnit yakat sīp maintalyang balna uiwi pa duduwi dawakat sīpnina balna kidika yaihnitna yakat kaswi awawaihwi.

⁴Waihnila balna aput yuyulwi: “¡Lawanang kat niningna yak mawi kalbaudanang! ¡Aiwanang kat matunak malahwi kalbaudanang! Kauna ais yamdarang yah, uman ma kidika bayak kiuna.

⁵¡Bahang pukta aiwanang kat kalbaudang, dawak yaihnit kau daklana kidika bahmukdanang!”

⁶Papang parasni nuhni bitik kidika aput yulna: “¡Pan dakta dutanauh Jerusalén yakat kalbaunamna atnin! Kidika pāni laih kaldaukalnin kalyulna, kat dutni mahni yamna bahang.

⁷Jerusalén kaupak dutni kidika kalahwi, sihm pa kuhrna kaupak was burhwi kalahwa kapat. Kidika pāni yakat taihwi yamnin manah dawak di malnin karak bahngna ki; witingna yakat muihnina dakna dawak dalani manah duduwi.

⁸Kulnam wirlatah, Jerusalén, kaput awas karang kat, kulnik daukalki man yakat. Walang as kaput mawirlaki, yalahnam pāni bik dis awama.”

⁹Papang parasni nuhni bitik duwa kidika aput yulwi: “Israel muihni balna yakat walwi, dawak baisa yamni walwi talwarang ki, sihm wain minik tingni balna yak yamni walwi as bik dawas bitik tuhrwa kaput.”

¹⁰Yang biri nangnitlanayang: “¿Wais yadakawarang yah, adika yulni di yultik isningna paktingkat? Tapanina puputna duduwi, Papang, dawak witingna sip dakakawaski; man yulma kidika dakawi kakari, yamni dakakawaski.

¹¹Bahang Papang kulnam annin kidika, yang bik antayang, sip laihwattas yang.” Biri Papang nangkitlana: “Walabis balna kidika ahni yak ruhmyaktah, wawahma balna kaluduhwa pāni kaupak ruhm'yaktah, muihbarak kaupak. Dawak alnina yalnina karak balakwi dukiwarang, kaput laih muih bararak balna kidika bitik.

¹²Unina dawak, yalnina kidika muih ūk duduwarang. Kat yang tingki dulauki ki witingna niningna yakat wah dianin. Yang Papangyang kidika aput yultayang.

¹³“Walabis kaupak muihbarak kat, alas lalah dunin manah wawalwi; prapit balna dawak sumalyang balna kaupak alas manah yuyulwi.

¹⁴Yang paki muihni balna muihnina dakna dalani duduwa kidika minit manah walanina awi aput diyuyulwi: Dutni diski yamni manahki atwi, kaunah kaput awaski, yamni lani kidika diski.

¹⁵¡Dutni yayamwa kidika alasnina duninna ki, kidika yang laih yamni talasyang! Kaunah, dikah, asalni kukulwaski, ¡asalni kidika ais pa witingna amanglalawaski! Kidika bahang, wah sihki mani kat, ūk balna bubukna kaput bubukwarang. Yang Papangyang kaput yultayang.”

¹⁶Papang yaklauwi pāni muihni balna yak aput diyulwi: “Tapas yak watta talnauh, dawak ta umani dai kidika yulta dakanauh, ta yamni kidika angkat yaknin yah, dawak uita yawanauh, isning alasna kidika yaktanama.” Kauna witingna yuyulwi: “Dikah, walkih mayawaski.”

¹⁷Papang yaklauwi main talyang muihni as awi, dawak tawan yakat diyulna: “Yamni dakanauh sain kalahwarang kidika.” Kaunah tawan muihni balna yuyulna: “Mayang kidika dakanin dukih mayawaski.”

¹⁸Kidika bahang Papang aput yulwi: “Nisan balna dakanauh, dakanauh, yang tawanki yakat ais kalahwarang kidika.

¹⁹Sau man bik dakah: Adika muihni balna yak wah wiski kidika, dutni yayamna dai bahang. Yulki dakawas dadana, di yulting kat, dakanin bik dukih awas dai.

²⁰¿Manna ais yulni Sabá sauni kaupak walapni kidika duaitamanah, dawak pan basni walalapni pa nai kau walta aiwamanah? Di walapni mahni niking kau duaitaman kidika talkih yāwaski.”

²¹Kidika bahang, Papang aput yulwi: “Adika tawanni balna tanina pas yakat kipala laktingkat kalnina bauwi bubukwarang. Papang walabis kaupak, kaltalyang balna bitik kapat dadauwarang.”

²²Papang aput yulwi: “Tingpal sauni nining kauh naikaupak nisan parasni as ridi kalahwi kainin.

²³Sibang dawi langsa karak manah duduwi, witingna laih muih dudutni ki, muih yakat miniknakunni bik tatalwaski; dinitna sarahwi yuyulwa kidika laih, sihm kuma parasni lalamwak dinit yulwa kapatki, dawak bik aras minit yak kilwi aiwi, Sayan nining yak war kalbaunin kidika.”

²⁴Jerusalén sauni yak muih balna kidika aput yuyulwi: “Yul kidika dakana mayang dawak yamadudi ma paraski bik diskaldi; makulnik bukna, dawak dalani kidika dudi, sihm muih yal walanibis duwi dalani dakawa kaput.

²⁵¡Ta uiwinih, kaput bik pini tapas yak kalalahwinih! ¡Kat waihmala kidika namang yak isniparah dulauna ki; yamadangni ki pa bitik yakat!”

²⁶¡Tawanki muihni balna, asna tubakni kidika āwanauh, kulnam bukna dalani kidika sainni, wan yakat bukta pihrta, asna kanin sani kat awa dawak aidah, sihm muih as walanibis aslah duwa kat dauwak kaida kapat; kat maising-aidas kat maniking yakat kaiwarang daukalyang kidika!

²⁷Papang aput yayulna: “Man tingma yak ātik datayang, witingna kulninna kulwi yayamwa kidika laihta talah.”[7]

²⁸Papang, witingna bitik, muih dudutni ki; witingna laih wanaihni dangnit mana yuyulwi; kidika balna laih bras dawak ayan kapat ki.

²⁹Wing puhnin dini kidika parasni puhwak, kuhpau kidika lit yakat arwi. Ilp as bik diski witingna yakat tanit yamni diyamnin kidika, kat muih dudutni balna kidika laih sip didiswaski.

³⁰Witingna yakat laih diyulnin ki, “lalah as daukalna”, kat Papang man lawa daukalpamnaman bahang.