Read Mayangna Jeremías 7 Bible Online

Jeremías 7 - Mayangna bible

Jeremías 7

¹Papang, Jeremías yak kaiwi aput kalyulna:

²“Papang ūni yak yawa awa adika yulni yulma: Judá sauni pāni kau yalahyang balna, adika pāni akat aiwa mamatna yulta mana kidika yamni dakanauh, yultayang adika.

³Papang parasni nuhni bitik duwa kidika, Israel Papangni: ‘Dutni yamta mana kidika datanauh, kaput laih sangmanaka naini manating kat sau akat yalahtanama.

⁴Alas manayulwi aput yuyulwa yakat baisa kulwinih: ¡Akat Papang uni sakki, akat Papang uni sakki!

⁵‘Sangmanaka, warkmana balna dawak bik la kat yamtamana kat biri biri;

⁶tringsar balna, warau dawak tingmak balna kidika dinina dakyaktas awanama, dawak, muih pini itas awanama kat adika pāni akat, papang dauh balna yak mamatnayultas awanama kat, manna alas dutni yak yawanama dai kidika,

⁷yang lawik akat manadating sangmanaka yalahtanama, muihmana bararak balna yakat ban kaput atnin sau dianayang kidika yakat.

⁸‘Manna laih muih alas manayuyulwa yakat dakamana, kidika namangna yak ilp yamni asbik diski.

⁹Di malta, muih ita, yal karak kalpakta dutni yamtamana, alasyultamana, Baal yakat walapni bustamana, dawan dauh balna prinias yamtamana, kidika karak manna di as yamnamnadis kaunah,

¹⁰dawak usnit yang ūki yak aiwa muhki yakat lawamana. Manna kultamana akat aiwa āwanang di as bik manna yakat dutni manakalahwas karang kaldakamana; kaput bik yang talnik awas kidika baisa yamnin kulta mana.

¹¹¿Manna kultamana laih yang ūki kulna kidika di malyang balna ūnina kapat kultamanah? Yang kaput talna yang. Yang Papangyang kat yultayang.

¹²Silo kau yang paki holi yakat yawanauh, tatuna yang paki waltik yaknayang kidika yalahnik, talnauh witing yakat ais kalyamnayang kidika, yang tawanki israel dutni yamna kidika yulni.

¹³Manna yamtaman kidika talik wat wat yulnayang, kaunah yulki dakasmana, dawak nangkit bik latasmana. Yang, Papangyang kat yultayang.

¹⁴Kidika bahang, Silo pāni yak yang ūki kulna dai kaunah dutni kalyamna yang dai kaput, ūki kulna adika sihm yamkiki, ūki kidika dianayang dai papangmana balna kaupak, dawak manna bik kidika yakat kultamana kidika.

¹⁵Bahang manna laih muhki kaupak manaruhmyakki ki, sihm wanaihmana balna kau yamna yang dai kaput, Efraín muihni balna bitik.’

¹⁶“Man, Jeremías, adika muihni balna yulnina mamat yulwinih, kalki dinit yak bukta yulwinih, kat yang madakas awaki bahang.

¹⁷¿Man talas manh ais yayamwa kidika Jerusalén dawak Judá tawanni yakat?

¹⁸Walabis balna kuh ananawi, papangnina laih bibiwi dawak yayal balna laih tuhrtia lalaihwi papang dauh as ayangni makau kisang kingni yal, atwa yakat kalaninna. Yang kalki lalakwi papang dauh balna yakat wain wasni diayawa kidika.

¹⁹Yang kalki lalakwa kukulwi, kaunah witingna alas kalnina lalakwi, alas asalnina yayakwi. Yang, Papangyang kat yultayang.

²⁰Kidika bahang, Papang yulwi, kulnik annin parasni kidika adika pāni muihni balna minitna yak bukwarang, dawak di wail balna niningna yak bik, pan, dawak yamak kau di dahna kaupak. Kuh dahlwa kaput karang kidika muih as bik sip piwas karang.”

²¹Papang parasni nuhni bitik duwa, Israel Papangni kidika, kaput di yulwi witing tawanni yakat: “Manna sakripais ampus busnin kultamana kidika bustanauh, dawak muihni balna kidika kastanauh.

²²Kaunah papangmana balna Egipto kaupak yaknayang dai kidika walapni buswi yamnin kidika diyultasyang dai.

²³Aput laih di yulna yang: Yulki dakanauh; kaput laih yang adika Papangmana awaki, dawak manna laih tawanki muihni awanama, diyulnayang. Dawak yang manayultayang yakat yamtanama laih di bitik tamatna yak yamni manah karang.

²⁴Kaunah yulki dakawas ruhmwi dadana, nawatkauh kulninna dutni yamnin kidika manah laihwi yayamna. Nawatwi yang kau ainin bik, dangsasana.

²⁵Papangmana balna Egipto kaupak yakna yang mani kaupak warmani kat, yang yulki yulyang prapit balna kidika sihtayang.

²⁶Kaunah manna yulki dakasdata, dutni yamna mana, papangmana balna yayamna karak tanit dutni yamnamana.

²⁷“Man, Jeremías adika dini bitik diyultah, madakawas, dawak nangmatlawas karang bik, sarahta diyultah.

²⁸Diyultah: ‘Adika ninisan balna laih Dawan, witingna Papangnina yulni dakawaski, dawak barangni diyakwarang kidika bik dukih awaski. Yul rahm yulnin kidika witingna tininapas kaupak diski.’ ”

²⁹¡Jerusalén, basma dakta ruhmtah! ¡Asang binina kau di dis ahni manah yakat, kulnin bukna laniwana unbautah! Kat Dawan laih kulnin daukalna bahang muihma balna karak, ruhmwi dana dawak.

³⁰Papang yulwi: “Judá muihni balna yayamna kidika kulnik daukalna: yang ayangki kau ū yayamna dai yakat diwaya uiwi awi dutni yayamna.

³¹Ben-hinon sauni langni yakat Tofet ayangni kau sakripais busnin pāni as yayamna, kidika yakat walaninabis ahal dawak walaninabis yayal kidika busna atnin ilwi. Yang kaput yamnin diyultasyang dai, dawak kaput yayamwarang kidika kultas yang dai.

³²Kidika bahang, Papangyang kidika yultayang, mani as kawarangki kat Ben-hinom sauni langni dawak Tofet baisa yultas awanama, ina sauni langni kulna karang. Dawak Tofet pāni yakat muih dauna balna kidika nuwarang, nunin pāni dis dai bahang.

³³Dauna muihni balna kidika, kusma balna dawak asangpas dini anyang ūk balna manah kakaswarang, dawak muih as bik uswas karang didauh balna yakat.

³⁴Judá sauni pāni kidika dis pamki ki dawak Jerusalén tanipas bitik alasna manah unbabauwa kidika, dawak marid laniwana bik unbabauwa kidika; kauhmak wanilang kaput kalwirlaki ki.”