Read Mayangna Jeremías 8 Bible Online

Jeremías 8 - Mayangna bible

Jeremías 8

¹Papang yulwi: “Kidika mani kawarang kat, sau-ū kaupak wakalnina murwi yakwarang, Judá kingni, dawak sauni tatuna kayang balna bik. Kaput bik sumalniyang, pranipit balna Jerusalén kau yalalahwa muihni balna dai kidika bitik,

²dawak ma daihni ahni yak yakwi dadawarang, waiku, yala balna yakat minitna yulwi yayamna dai kidika yakat. Kaunah muih as bik didulauwi sau yak nunuwas karang. Bahang sihm ba kapat kakalwarang.

³Adika muihni dudutni balna, angdika sangka yaklawarang muihni laih, yang diruhmtik dating usnit kat, angkat, angkat uiwarang bik daunin kauh yamni kulwarang, sangka atnin karak. Yang, Papangyang kat yultayang.

⁴“Man, Jeremías, yultayang adika muih balna yakat diyultah: ‘Muih as buk'dauwarang bik, watwi yaklauwi; muih as ta diswarang bik, watwi walwi yakwi.

⁵Bahang Israel, ¿man laih ais yamta alas yulta dutni yayamna manh? ¿Ais yamta, kulnam dutni yamnin kulta, dawak, yang akat aiwasdanamahn?

⁶Yamni tapayutik dakana yang dai, kaunah baisa dakasyang, muih as bik laih kalahwi yulwaski witing dutni yamwa kaupak dana atnin: ¿Yang ais as yamna yahng? Bitik laih parasni kikiri tanina yakat, sihm war aniras balna kikira kapat kalbaunin nining yakat.

⁷Dilawani duwa balna kidika, witingna amanglalawi mampat panina kaupak dawi pa ūk uiwarang kidika. Kaput kaunah yang walakibis balna laih baisa manna yang laki kidika amanglatas manah.

⁸¿Manna di amanglatamana kidika amput yultanamayah, dawak Papang lani dutamana kidika bik? ¡Kat ulyang balna yaklauwi dauh yayamna kidika!

⁹Sins nuhni duyang balna kidika sau yakat bubukwarang, di wail as pan kulinna pāni kau kawak putwak kalahnin yamaduwa kaput kulna karang. ¿Kat Papang yulni ruhmwi dadana bahang, angkaupak sinsnina nuhni duduwarang yah?

¹⁰Kidika bahang, yalnina balna kidika al ūk yakat diakiki, dawak saunina bik muih ūk kau diakiki. Kat bin kaupak barakni kat laih di dutni kamanah wawalwi, prapit balna dawak sumalyang balna bitik dutni yayamwi.

¹¹Yang tawanki muihni balna muihnina dakna dalani duduwa kidika, minit manah walanina awi diyuyulwi, kidika pas yakat di bitik dutni manahki.

¹²¡Dutni yayamwa kidika asalnina duninna ki, kidika yang laih yamni talas yang! Kaunah, witingna laih asalni kukulwaski, ¡asalni kidika ais pa witingna amanglalawaski! Kidika bahang, wah wiski mani kat, ūk balna bubukna kaput bubukwarang. Yang Papangyang kat, kaput yultayang.’ ”

¹³Papang yulwi: “Tawanki muihni kidika plawar minik balna kaput didakmukki. Wain yanimak pasyakat minik as bik watwas karang, ani damni bik minik as bik diskarang. Basni kusulana manah karang.”[8]

¹⁴Dawak tawan muihni balna yuyulwarang: “¿Ais yamdi akat watna mayahng? ¡Tawan nuhni daklana yakat mawak mahka mai-ihiwang! Mapapangki, mai-iwarang ki; was puisin duwa kidika mayawak didarang ki, kat witing nining yak dutni yamna mayang dai bahang.

¹⁵Ma kulnik alasna atnin tahana mayang, kaunah di yamni kidika yakdaski. Ma muihki nuhni yamni atnin walna mayang, kaunah dis didutni manah mai kalahna.

¹⁶¡Waihla kidika mahka kaiwi kawi! ¡Dan pāni kaupak kalbaunin aniras balna kiri aiwak wingninata pupuhwa kidika dakadi! Kiri susutwak sau adika bitik kalisihwi. Tawanni yakat ais duwa dai bitik daukalna aiwi; dawak tawanni nuhni kau muih balna yalalahwa bitik kau.”

¹⁷Papang yulwi: “Manna namangna yakat bil puinisin duwa kidika manah sihkiki, dawak kidika bilni mana kakaswarang ki; bahang witingna niningna yak ditalyang as bik sip yamwas karangki.”

¹⁸Dalani dutayang kidika yayamnin sinika diski,[9] ising bik kalsuhlakwi.

¹⁹Tawanki muihni balna dalani duduwa kidika pa bitik kau laih dakana ki: “¿Papang kidika Sayan yak dis yah? ¿Kingni bik yakat disyah?” Dawak Papang biri nangnitnalawi: “¿Kat asalki yakna mana, papang dauh di yamnin parasni dis balna yakat mamatna yulna mana awas yah?”

²⁰Kurih mani bik bayak kiuna bahang didahnin bik bayak kiuna, dawak yana laihwi yaknin diski.

²¹Tawanki muihni balna dalani duwa kidika yang bik dutayang; kulnik tikini dutayang kidika yamadangni bik yalaihwi.

²²¿Galaad yakat sika as bik disyah? ¿Ampadawak tawanki muihni balna sip muihni sanni yamwas dana yah?