Read Mayangna Jeremías 9 Bible Online

Jeremías 9 - Mayangna bible

Jeremías 9

¹¡Was burhwi kalahwa kaput karang mikpa balna adika, tawanki muihni balna dadauna kidika yulnina pukta madah aidingkat, was parasni murwa kaput mikwas kalahwarang!

²¡Kauhmak wanilang yakat ūki dutayang kaput kat laih, tawanki muihni balna kaupak datik naikau yawaki! Ampadawak, kat witingna bitik barangni awas dai bahang.

³Bahang kulninna yak alas yulnin kukulwi sihm sibang ruhmwak barangni kiwa kaput. Kidika tawanni yakat laih rahm yulni kidika diski, alas yulni manah bahangna ki, kaput kaupak baisa dutni yak uina, dawak Papang bik yulwi aput: “Witingna amangkilaninna kukulwas dadana.”

⁴Kaltalyang yamni karang bik, dawak kalwirah palni kat bik yulnina kulnin awaski, bahang kat kalwirah kidika biri biri alas kalyuyulwi, dawak kaltalyang yamni balna laih sihm biri biri kaldangkat yuyulwi.

⁵Witingna alas alas kalahwi ūk yakat sarahni tatalwi, dawak muih as bik rahm kat yuyulwaski. Alas yulna manah lan kakalna; bahang muih dudutni kakalna, kulninna wirlanin bik sip awaski.

⁶Papang bik yulwi aput: “¡Kalni pakwak bukwa kidika tanit yak baisa bukwi,[10] alas yulwa kidika baisa tanit yak kiwi! Bahang tawanki muihni balna kidika amangkilanin dukih diawaski.

⁷Kidika bahang, yang, Papang paraski nuhni dutayang kidika yultayang: ¿Ais as yamnik sip karang yah, tawanki muihni balna niningna yakat, kidika awaskat kuhpas yakat ātingkat buswi yamni kalalahwarang yah?

⁸Tunina kidika sibang baini daunin dini kapatki; alas manah yuyulwi. Kaltalyang duduwa balna yakat kulninna alasna dipararaswi, kaunah rahm kidika laih, dutni yak kiunin tanina ahawi.

⁹¿Dawak adika yulni wah diwistas awaki yah? ¿Tawan muihni balna aput yayamwak kat wah diwistas dating bayakwarang yah? Yang, Papang kidika, kaput yultayang.

¹⁰“Sarahta aidanauh asang balna yulnina, sihrsihr langni sangni yamni yulni yulta aidanauh, ampadawak, kat busyamna bahang, waralaih yakat muih bayayakwaski; turuh balna bik mamahwak dakadaski, dawak dilawani duwa kaupak di kalni arungka parasni anyang balna bitik kirikakana.

¹¹“Jerusalén pāni yamni duwa kidika, kipala uduhna kaput kalwirlaki ki, yakat wassala balna ūnina duduwarang; Judá sauni pāni balna bik walang kauhnimak kaput kalwirlaki ki; dawak yakat muih as bik sip yalahwas karang.”

¹²¿Wais muihni kidika sinsni nuhni duwih adika yulni balna amanglana atnin? ¿Angdika muihni yak, Papang yaklauwi adika yulni balna amanglanin niningkana yah, dawak biri wirlawi ūk balna yak disumalnin? ¿Ampadawak tawanni adika daukalna yah, dawak buhlana was dis sihm kauhmak wanilang kapat dawak kidika munah muih as bik bayayakwas kapat?

¹³Papang biri diyulwi: “Yang yulki Israel balna yak amput yamnin dianayang dai kidika yamwas ruhmwi dadana bahang nining yak kaput kalahna. Yulki bik yakat dakawi yamwas dadana.

¹⁴Isningna dadasni yayamwi uina dawak papang dauh balna yak minitna yuyulna, sihm papangnina balna niningkakana dai kaput.

¹⁵Kidika bahang Israel Papangni paraski nuhni dutayang kidika yultayang: Di kasnin tapahlni kidika diating kat kakaswarang, dawak dinin laih puisin bahatik diating didiwarang.

¹⁶Nisan balna pasyakat manaruhki, manna dawak papangmana balna bik amangninalalawas dai kidika; kaput bik yamtingkat isparah kidika tingnina yakat duwi manauhuina karang, kaput laih as bik sangka watwas karang.”

¹⁷Papang parasni nuhni bitik duwa kidika yulwi aput: “¡Yamni dakanauh! Yayal kaidayang balna kidika walta aiwanauh.”

¹⁸¡Sirihni aiwahng, dawak mayang mayulki kakaidang; mamikpa kidika makwas manah banghilna dawak mamiktangbas kidika kaidinin manah banghilna!

¹⁹Sayan asangni kaupak dalani kidika kaiwi: ¡Paih, ampat mai daukalna yah! ¡Ampat mamikit dis dalani wauhna mayahng! Matawanki adika dapamnin ki, kat ma ūki balna bitik bahwi daukalna bahang.

²⁰Yayal balna, manna kidika, Papang yulni dakanauh, yamni dakanauh manayulwa kidika. Walamabis yayal yakat kaidinin niningna katanauh, dawak kaltalyang yayal balna kaidi yuyulwang aput:

²¹“Ma ūki pas yak daunin kidika kiukana, ma ūki nunuhni balna yakat kiukana; tapas balna yak muih binina kidika ina ki dawak wawahma balna laih kaluduhnin pāni nuhni yakat ina ki.

²²Muih dadauna balna kidika tapas yak bangbangki, sihm diba ahnikau duwa kaput, sihm di minik anayang muihni anawak dangnit kau uhwi kiwa kaput, muih as bik anawi dulauwas ki.” Papang kaput yulwi.

²³Papang aput yulwi: “Sins lani nuhni duwa kidika, witing manah kapat kaldakanin awaski, dawak parasni duwa kidika bik, dawak di duyang muihni bik witing manah duyang kapat kaldakanin-awas ki.

²⁴Angdika muihni tanit nuhni kaldakanin kulwarang kat, tanit nuhni kaldakawang yang akat amangkilana kidika yulni. Yang sau akat kulnik dalani kau di balna yamtayang, lakat dawak barangni kat, kaput kidika yang dukih yawi. Yang Papangyang kat yultayang.”

²⁵Papang yulwi: “Mani kawarangki, tawan balna bitik witingna Papang sainni duwa balna kidika wah diaki ki:

²⁶Egipto yakat, Judá, Edom, Amón, dawak Moab, kauhmak wanilang kau yalalahwa balna bitik, basnina kakahrwa muihni balna kidika. Kat kidika tawanni balna, dawak Israel tawanni bik, rahm kidika laih yang yak yakukulwas ki.