Read Mayangna Lamentaciones 2 Bible Online

Lamentaciones 2 - Mayangna bible

Lamentaciones 2

¹¡Dawan kulnin daukalna kidikanuhni palni dai, Sayan yaksihni kidika puksani kalna! Israel nuhni yaksihni kidika tukwi lakna makau, kisang kapat kidika sau akat; kulnin daukalna mani kat isningkatwas dai, witing kalni taihwa kidika.[4]

²Dawan yaklauwi kasakni lani dawaski Jacob ūni balna kidika as bik; kulnin daukalwak bahwidis dawaski Judá kau kalbaunin ūni pararasni balna kidika; kulninna sau yakat lakwi, saukat tukwi lakna, king balna dawak kabamint balna kidika.

³Kulnin daukalwak dakpamna Israel parasni bitik kidika. Witing parasni nuhni kau ilpmayawadai kidika dana, waihla karak kalbaudak; ¡Jacob yakat kuh bibiwak dahlna bahang kidika laih tanipas yakatdi balna kidika buswi!

⁴Dawan kidika waihla kapat, lasni iswi yuna; waihla as yamwa kapat; mamikpa yakat di yamni taldadai kidikadaukalmukna, kuhpau as kapat, kulnin daukalna kidikakalawak kaina Sayan ūni labanni minityakat.

⁵Dawan laih waihla kapat di yamna; Israel kidika bitik palni laihbahwidis yamna; kingni ūni balna dai kidika bitiktukwi lakna; kalbaunin ūni pararasni balna daikidika bik, Judá yaksihni dai kidikaminit bayak kalana, kulnin buknin kidika wat wat kalana.

⁶Di malyang as kapat makat yulnin ūni yakat kalbaunin yamna; kaluduhnin pāni dai kidika bahwidis yamna. Dawan yaklauwi yamwak Sayan yakatdinitnakahna alasna yamnin dai kidika dawakyakurupdinin mani.[5], Kulnin daukalna kidika yakat, ruhmwi dana king dawak sumalyang kidika bik.

⁷Dawan, witing kau sakripais buswapāni kidika bik ruhmwi dana, witing kau makatyulnin ūni kidika bikdauh kulna; waihla parasni yakat ana tawan nuhni daklana kat nanitdakwasak kidika. ¡Dawan ūni yakat muih sararahwi, alasna mani as kapat!

⁸Dawan kulnin ridi kalahna tuklakna atnin Sayan kau daklana balna kidika. Amput bahwi disyamnin kidika kulwi dana ki, dawak yakurupdas yamna ki witni kat. Daklawi awaihna balna kidika witing yaklauwi kalawak kulnin bukna yamna, dawak kidika balna bitik laihpapatni sau kat aiwi bubukna.

⁹Tawan nuhni kidika putnin dūrni diskidawak ki ānin bik diski; ¡bahwi sau yakat ruhmwi dadana! Kingni balna dawak kabamintni balna kidika laih Dawan kukulwas balna pasningna yakat ki; Dawan lāni kidika diski. ¡Prapit balna bik diski amana kapat tatalwa balna kidikaDawan kaupak!

¹⁰Sayan yaksihni sumalniyang balna kidika sau yakat ap dawi yalalahwi, sau yahamni kidika tunanina yakat uhuhwi asna babahni balna kidika kakawi. Jerusalén wawahnima balna kidika laih abubukwi tunanina kidika sau kat.

¹¹Kaidinin kidika mikpa balna karakdahn yamwi, dawak kaldakayang, paski adika tutwi; kulnik kidika sau kat kaiwi bukna yang muihki balna tawannina nuhni kidika daukalna yakat talayang kat, talingkat muihbinina ta susuwa balnakidika bitik ta pasyakat yuh dadauwi.

¹²Walabis binina kidika nanangnina yakatdiyuyulwi: “¡Wain dawak plawar busna kidika bik dismayang!” Isparah didakwak bubukwa kapat bubukwadai tawan nuhni tanipas balna yakat, wingninata laihwatwak, nanangnina balna tingnina yakat.

¹³¿Ais dini karak sipyah malibitnik, Jerusalén nuhni yaksihni? ¿Ais kidika karak sampla libittikwalama akiyah, Sayan tawanni nuhni yaksihni? Daukalnaman kidika laih nuhnisihm kuma kapat kidika; ¿wais sipyah dalani kidika dis yamwi manin?

¹⁴Pramapit balna amana kapat talwimayuyulwa dai kidika, laih alas manah dai. Man dutma kidika lāih yayakwasdai suermati kidika satuk wirlana atnin; amana kapat talwi alas mayuyulna, dawak man laih mayayamwa kidika yakatrahm kulnaman.

¹⁵Ta yakat uiwa balna kidika matatalwi tingnina tiswi sarahwi yayamwi; sarahni yamwi kung wiuhwitunanina labahn labahn ahawi, Jerusalén yaksihni dai yakat kalyulwi: “¿Dawak adikayah tawan nuhni kalyuyulwa kidika sau akat tanit yaksihni kalyuyulwa kidika?”

¹⁶Waihmala balna kidika bitik tininapas wakakahwi man namang yakat. Kungwiuhwi, wayani kau bik yayamwi namangkauh, dawak aput yuyulwi: “Bitik palni kaldaukalpamna mayang. Adika mani kuduh uba tahada dai kidika; ¡witni kat sipdai talnin!”

¹⁷Dawan witing warkni yamnin dai kidika yamna, witing yulni balna kidika kat yamna. Watwat bik muhwi talwas bahwidis yamna tanit mani balna kau bahwidis yamninkulna dai kidika, dawakat waihmala kidika namangkarana dawak waihmala parasni kidika makau dulauna.

¹⁸¡Dawan yakat ilp yultah, Sayan tawanni nuhni yaksihni![6] ¡Datangkat kirang madah dawak pukta mamakwas kidika! ¡Aidaman kidika dawinih, mamakpa laih kaida kidika danin awaski!

¹⁹Lawa sarahtah pukta balna yakat, awar balna kaiwi bayakwasak yakat sarahtah; ismang kidika Dawan muhni yakat yaktah, dawak datangkat was kapat kirang; witing yakat bukta tingma kidikayu data yultah dawak walamabis balna sangninakakidika yultah, ta balna sipintang balna yakat dadauwi, di kasnin dis kidika yulni.

²⁰Dawan talah, yul kulta talah, muih as kau bik baisa kaput yamtasman. ¿Nanang balna kidika, walaninabis ta bayayahwa kidika witingna kakaswarang pah? ¿Sumalyang balna dawak prapit kidika man ūma yakat īnin katpah?

²¹Ta pasyakat bukna bang bang kat tatalwi wawahma balna kidika dawak muihbararak balna kidika bik; wawahkima balna dawak sirarauki balna, isparah kau dadauna. Kulnam daukalna dai mani yakat, dauninna praisni didaknaman dai, ¡wat wat ditalas īnaman!

²²Yamadangni kidika kalatang kat kaina pirini balna bitik kaupak, alasna as kau aiwa kapat; Dawan, kulnam daukalna mani, muih as bik sip awas dai kiri yaklanin. Yang lawik muhnayang, sumalnayang, kaunah waihla kidika yaklau īna.