Read Mayangna Ezequiel 1 Bible Online

Ezequiel 1 - Mayangna bible

Ezequiel 1

¹Yang, sumalyang Ezequiel, Buzi walanibis, ma as kat, Babilon kau Quebar wasni kung yakat sakyang dai, muih laihwi duwi uina balna pasyakat likyang dai. Bahang kidika yakat makau kisang kidika apahna, dawak talnayang dai Papang. Bahang kidika mani laih, kurih muihasluih minitkau salap kaupak waiku arungka kidika kaupak ma singka yakat dai, dawak kidika laih king Joaquín laihwi duwi uina kurih singka laihna dai. Papang tingni kidika yang mikit yakat ilna dai.

⁴Talnayang, tingpal nining kaupak wingbauwi kaiwak; mukus nuhni as kaupak kuh dahlwi kalahna, alwana lapwa kapat, dawak yaihnit balna kidika yaringni nuhni duna. Kuh pasyakat yaringni sihm ayan arwa kapat kat talnayang dai,

⁵dawak sihm dahlwa pasyakat di sangnika duwa arungka talnayang, muih kapapat dai.

⁶Kidika balna witingna bitik muhnina arungka dawak. Lawanina arungka duduwa dai,

⁷kalnina balna kidika bararangni dai, tipisninamak balna laih turuh tipisnimak kapat dai, dawak yaringni duwa dai bras buhwi yaringni yamna kapat.

⁸Witingna lawanina arungka dawak muhnina arungka duduwa minit yakat, pirinina arungka kidika yakat tingnina tiaskauas duduwa dai, muih tingni kapat, lawanina dinit yakat. Lawanina balna kidika biri biri laih sukdai. Lapapakwa kidika nawatwi aiwas dai, kaunah tanitna yakat uiwa dai

¹⁰Sangnika arungka duwa muihni balna muhnina kidika laih aput dai: muhnit tani kauh kidika laih muih muhni kapat dai; tingnina palni kauh kidika laih layan kapat dai, wadahnina kauh laih turuh kapat dai; dawak dangnitna kauh kidika laih yakalnuh kapat dai.

¹¹Lawanina balna[1] kidika mayakau ririna dai. Bu kidika laih biri biri sukdai, dawak ūk balna bu kidika laih muihnina nuhni yakat mumukwa dai.

¹²Witingna bitik tanitna yakat lapapakwa dai, uiwa kidika nawatwi aiwas dai. Uiwadai, angkat Papang parasni diduwi kiwa yakat.

¹³Sangnika duwa muihni balna muihnina kidika laih kuh tuturni dahlwa kapat dai, kidika awaskat awas dahlwa kapat dai kidika laih witingna pasyakat uiwadai dawak bik aiwadai; kuhpau kidika laih yaringni dai dawak kidika kaupak lapwi kalahwadai.

¹⁴Sangnika duwa balna kidika uiwi, aiwi ahawa dai alwana lapwa kapat.

¹⁵Sangnika duwa balna kidika talnayang dawak sau yakat talingkat witingna yaihnitna yakat di wīlni duwadai.

¹⁶Wīlni tuyulni arungka balna kidika bitik kapapatdai, dawakat amput yamna balna kidika bik, kipala dahlwa lalahni yaringni kapat. Wīlni balna pasyakat wīlni ūk bik duwa kapat dai.

¹⁷Witingna sip dai pirini arungkapak uina atnin, kauna nawatwi aiwas.

¹⁸Talnayang,[2] wīlni arungka duwa kidika yaihnit yakat tuyulni awaihdaklana duwa dai, dawak yaihnit yakut kidika yaringni tukna[3], dai.

¹⁹Sangnika duwa balna kidika lapakwi uiwakat, wīlni balna kidika bik uiwa dai witingna karak, sangnika duwa balna kidika yaklalauwa kat wīlni balna bik yaklalauwa dai witingna karak.

²⁰Sangnika duwa balna kidika uiwadai, Papang parasni yaklauwi angkat didukiwa yakat, dawak wīlni balna kidika witingna karak uiwa dai, kat wīlni balna kidika sangnika duduwa balna karak aslah dai bahang sangninaka kidika.

²¹Sangnika duwa balna kidika kalititikwakat wīlni balna kidika bik kalititikwādai, dawak uiwi wawatwakat wīlni balna kidika bik wawatwa dai; dawak sangnika duwa balna yaklalauwakat wīlni balna kidika bik yaklalauwadai, kat wīlni balna kidika bik witingna sangninaka dai bahang.

²²Witingna tunanina minit yakat di kudung kapat as duwa dai, dawak kidika dini laih yaringni batal yaringni kapat dai.

²³Di kudung kidika dinit yakat sangnika duwa balna lawanina ririwa dai, dawak biri biri laih sukdai. Dawak lawanina bu kidika laih muihnina mumukwa dai.

²⁴Witingna uiwak lawanina babahlwak parasni yulwa kidika bik dakanayang dai, was nuhni pauna kat parasni yulwa kapat dai, sihm parasni bitik duwa dinit kapat dai, kalbauyang muihni balna mahni parasni atwa kapat dai. Witingna kidika watwi lawanina kidika wauhlalakwakat.

²⁵Yulni parasni as kalahna dai, witingna tunani minitkau di kudung duwa kidika kaupak.[4]

²⁶Di kudung kidik minit yakat talnayang dai king yalahnin as kapat, bahang kidika dini laih kipala dahlwa sangni as dai, dawak king yalahnin pāni kapat dai kidika yakat yalahna sakdai muih kapat as.

²⁷Witing banimak kaupak sau yakauh kidika laih yaringni manah dai, dawak kidika kaupak mayakauh kidika laih kuhpau kapat dai. Yaihnit awaih kidika laih yaringni manah dai

²⁸sihm waslauwa mani kat mukus kau wayauli kalahwa kapat. Kaput laih Dawan alasnina yaksihni kidika nikingkana dai. Talik limbabahtik sau kat buknayang dai.