Read Mayangna Ezequiel 10 Bible Online

Ezequiel 10 - Mayangna bible

Ezequiel 10

¹Usnit kat talnayang, sangninaka duduwa balna tunanina minitkau kudungni kapat duwa dai kidika yakat king yalahnin sinini as kapat kalahna, kauna kipala dahlwa sangni kapatnah dai.

²Papang yaklauwi, muih al prakni yamni kanalikyakat kalyulna: “Kār wīlni pasyakat awah, sangnika duwa balna dinitna yakat, dawak kuh tuturni dahlwa kidika tingkurus as dutah, sangnika duwa balna walsahkau bangkidika kaupak, dawak tawan nuhni minityakat wauhta.” Dawak talnayang dai kidika alni amput kawi kiuna kidika.

³Kidika minitni yakat di sangnika duwa balna kidika Papang uni wadah nining yakauh bangdai, dawak Papang uni watakni yakat mukus manah bukna dai pastawa nining yakauh.

⁴Kaput laih Papang alasnina yaksihni kidika dulauwi duwi kiuna dai, di sangnika duwa balna minitna yakaupak, bahang duwi kiuna dai Papang ūni dūrni kawa yakat, kaput laih yaringni kalana dai Papang alasnina yaksihni kidika yaklauwi.

⁵Di sangnika duwa balna lawanina babahlwa kidika watak pining ahni yakaupak lāih dakawa dai parasni yulwa kidika. Papang parasni bitik duwa kidika yulbauwasak kapat dai.

⁶Kaput laih Papang yaklauwi pakna dai muih al parakni yamni kanalik alni yakat, kār wīlni yakaupak kuhpau duna atnin, di sangnika duwa balna pasyakaupak. Muih al dai kidika kiuna dai wīlni balna kidika as yaihnit yakat.

⁷Sangnika duwa balna lawanina dinit yakat muih tingni as kapat talna dai. Kidika balna kaupak as kalahwi tingni yuna dai witingna pasningna kau kuhpau pakyakat, dawak buas duwi, muih al parakni yamni kana sakyakat kalana tingni yakat, kaput laih duwi kiuna.

⁹Di sangnika duduwa balna yaihnitna yakat talnayang dai wīlni arungka, bahang witingna yaihnitna yakat as as duduwa dai. Wīlni balna kidika kipala dahlwa lalahni yaringni duwa kapat dai.

¹⁰Wīlni balna kidika arungkapak kapapat dai, bahang wīlni as kidika wīlni ūk yaka pasyak āna kapat dai.

¹¹Di lawani duyang balna kidika mahka uiwakat, pirini arungka kidika kaupak as duwi, witingna nawatwi aiwas dai, kauna tatuna kau kiwalik kidika yakat uiwadai.

¹²Witingna muihnina, dangnina, tingnina, lawanina, yaringni[17] manah duwa dai, pirini balna bitik kau, dawak wīlni arungka balna kidika bik sihm kapat dai.

¹³Yang silp tapaki kau dakanayang, wīlni balna kidika ayangni ūk laih “kār” āwadai.

¹⁴Lawani duyang balna kidika muhnina arungka duwa dai: muhni tatuna kidika laih turuh almuk[18] muhni kapat dai, dawak bu yakat laih muih al muhni kapat dai, bas yakat laih layan kapat dai, arungka yakat laih yakalnuh kapat dai.

¹⁵Adika dini lawani duyang balna kidika sihm talnayang dai Quebar wasnikung yakat. Lawani duwa balna kidika yaklalauna,

¹⁶witingna uiwakat, wīlni balna kidika uiwadai; witingna lawanina dulauwi bahlwi mahka sau kaupak yaklalauwa kat, wīlni balna kidika yaihnitna kaupak kalalahwas dai;

¹⁷witingna wawatwa kat, wīlni balna kidika bik wawatwa dai; witingna yaklalauwak wīlni balna bik yaklalauwa dai, kat wīlni balna kidika witingna sangninaka as dai bahang.

¹⁸Kaput laih Papang alasnina yaksihni kidika witing ūni kaupak dulauna dai, dawak lawani duwa balna minitna yakat ilna dai.

¹⁹Adika balna lawanina bahlwi mahka yaklalauna dai sau akaupak. Yang talnayang dai yaklalauwak, amput wīlni balna kidika witingna yaihnitna yakat ban dai kidika, dawak amput uiwi wawatna dai kidika, Papang ūni dūrni ma kawa nining yakauh yakat. Israel Papangni alasnina yaksihni kidika witingna minitna dai.

²⁰Sihm kidika balna dai, lawani duyang balna as talnayang dai kidika, Israel Papangni dinit yakat, bahang kidika laih Quebar wasnikung yakat talnayang dai. Bahang yang amanglana yang dai ais dini dai kidika.

²¹Witingna kidika muhnina arungka duduwa bitik kau, lawanina bik arungka, dawak lawanina dinit yakat duduwa dai muih al tingni kapat.

²²Dawak muhnina balna kidika laih sihm Quebar wasnikung kau talnayang dai kidika kapapat dai. Witingna kidika muhnitna tani manah lapapakwadai.