Read Mayangna Ezequiel 12 Bible Online

Ezequiel 12 - Mayangna bible

Ezequiel 12

¹Papang yang akat kaiwi yayulna:

²“Man, muih al, tawan as dutni pasyakat yalahtaman. Witingna miniknapa duduwi talnin, kauna tatalwas ki, dawak tapanina duduwi dakanin kauna, dakakawas ki, kat tawan as dutni bahang.

³Kidika bahang ridi alahwah dunam dini balna kidika, kat pa ūk kau yawama bahang, madah, dawak muih bitik miniknapa yakat data alahwah uma kaupak, dawak pa kau yawah; sip kat amanglalawarang kat witingna muih dudutni kidika yulni.

⁴Dawak madah palni, muih bitik miniknapa yakat dima balna kidika yaktah, pa ūk kau malaihwi maduwi uiwarang kapat; dawak ma-ulahu yakat bik muih bitik miniknapa yakat, pa ūk kau malaihwi maduwi uiwa kapat alahwa yawah.

⁵Usnit kat tawan daklana yakat sulihni as ahlta, muih bitik miniknapa yakat, kidika sulihni munah dima balna bitik yakta.

⁶Ma puklakwakat, dima balna kidika bitik trukta muih bitik miniknapa yak alahwa yawama. Muhma putma, man adika sauni talas atnam. Dukih yawi kidika sain as atnin, dawak witingna isningna aina atnin, Israel tawanni nining yakat.”

⁷Yang diki balna kidika ridi yamnayang dai, Papang yayulnadai kaput, dawak madah palni muih bitik miniknapa tani yakat alahwanayang dai, muih as sauni kaupak yakwi duwi uiwa kapat. Ma-ulahu dawak, daklana kidika yakat sulihni as ahlnayang dai, dawak masan dawak muih bitik miniknapa yakat diki balna kidika bitik truktik alahwik yawanayang dai.

⁸Payahwakat, Papang, yang yakat kiwi yayulnadai:

⁹“Rahm laih, Israel tawan as dutni balna kidika, mayulwi dakakana kapat ki, ais yamtasakman dai pa.

¹⁰Bahang diyulta, yang yultayang, kidika laih Jerusalén kingni yakat isning pakna as ki, dawak Israel balna bitik yakat yalalahwa kidika bik.

¹¹Diyultah man kidika sain as man witingna yakat usta sahmuhnam, dawak man yamtaman kidika witingna bik yamninki, kat panina kaupak yakwi pa ūk yakat duwi uiwarang bahang.

¹²Taninatuna as duduwa kidika witing dini balna bitik trukwi kalahwarang ki dawak, ma puklakwak, daklana yakat sulihni as ahlwi yakut dini balna duwi kalahwarang ki. Muhni put dawi kalahwi kiuna karang, kaput laih muih as bik witing yakat kaltalnin-awas, dawak witing bik talnin-awas[19] sauni dawi kalahwa kidika.

¹³Yang laihnin dini dutayang kidika kau witing minit yakat muklaktik laihki ki. Babilon yakat duyawaki, Caldeo balna saunina yakat, sau as talwas karang kidika, dawak yakat dauwarang.

¹⁴Dawak wing sutni arungka yakat sihting kiwarang, dawak maintalyang balna bangkidika nanitna dadakwarang, dawak ūk balna kidika bik sihm yayamwarang, dawak uitik yawaki ki tingki yakat isparah dudatik.

¹⁵Yang lawik sau dawak nisan balna ūk yakat disihting uiwarang usmat kat, witingna amanglalawarang, yang adika Papang yang.

¹⁶Kalyamtingkat as as kiri yaklalawarang war kaupak, yuh kaupak, dawak siknis kaupak bik, bahang kidika laih witingna angdika ninisan yakat uiwarang kidika yulna atnin, witingna ampus di dutni yayamna dai kidika, dawak amangkilalawarang yang adika Papangyang.”

¹⁷Papang, yang yakat baisa, wat as kaiwi yayulna:

¹⁸“Man, muih al, di kastaman awarni yakat yamadutang mayukwang, dawak ditaman kat kulnam kidika kaidīnah ditah.

¹⁹Dawak sauni muihni balna dawak Jerusalén muihni balna yakat bik diyulta: ‘Papang adika yulwi: Witingna kulninna kaidīnah kakaswarang; dawak yamaduwīnah dinina didiwarang, dawak sauni kidika daukalpamwarang, di dis dawarang, kidika sauni muihni balna dutni yayamna kidika yulni.

²⁰Tawan nunuhni balna kau muih bang bang kidika bitik laih daukalna karang; sauni kidika laih kauhmak wanilang kalna karang. Kaput laih manna yang akat amangkilatanama, yang adika Papangyang.’ ”

²¹Papang yang akat kaiwi yayulna:

²²“¿Israel balna ais yulni yuyulwih; ma balna bayakwi, dawak prapit yulni balna yakat sip kalahwas ki atwa kidika?

²³Bahang diyulta: ‘Adika Papang yulwi: Yang yamna awaki bahang kidika yulni watwi Israel yakat yulnin awaskarang.’ Dawak bik diyulta, mani kidika ulisdana, amana balna talna kidika yakat kaiwi kalahna atnin.

²⁴Watwi, Israel pasyakat amana taldi atwi alas yuyulwa kidika diskarang, dawak prapit yulni alas kidika bik diskarang,

²⁵kat yang, Papangyang adika yulbauki bahang, yulki balna kidika bitik kalahna karang laihwatwas. Manna silp talnama, muih dudutni mana kidika; yang yulbauki, dawak yakat kalating kalahna karang. Yang, Papang yang kat yultayang.”

²⁶Papang yang yakat kaiwi yayulna:

²⁷“Israel balna yuyulwi, prapit balna amana tatalwa kidika laih, ma balna naini kaiwak kat kalahwi.

²⁸Kidika bahang diyulta: ‘Adika Papang yulwi: Yang yulki balna kidika ma mahni bayakwak kat kalahna awaskarang; yang yulki kidika yakat kalahna karang. Yang papangyang kat, yulki kidika manatayang.’ ”