Read Mayangna Ezequiel 13 Bible Online

Ezequiel 13 - Mayangna bible

Ezequiel 13

¹Papang, yang akat kaiwi yayulna:

²“Yang ayangki kau duta prapit balna niningna yakat yulta, kidika prapit balna, witingna alas kulninna kaupak yakwi yuyulwa balna yakat diyulta: ‘Dakanauh, manna Papang yulni kidika:

³¡Alakaih, prapit mutu balna, witingna silp kulninna kau yayakwa kidika di rahm laih amana tatalwas ki!

⁴Israel pramapit balna kidika laih, sihm wassala yayal ū babahni paskau kayang balna kapat ki.

⁵Di as bik yayamwas ki, Israel yakat nanit daknin, kalbaunin kaiwak witingna sip kalbauna atnin kidika, Papang kaiwarang mani yakat.

⁶Witingna amana tatalwa kidika alas manah ki, dawak yul yuyulwa kidika dauh manah ki, Yuyulwi, yang munah yuyulwi, kauna yang lawik sihtasyang ¡Tahahawi; yulninna balna kidika yakat kalahwak talna atnin!

⁷¡Manna amana talamana kidika laih dauhki! ¡Dawak yulmana balna kidika bik dauh ki! Witingna yuyulwi, yang yulki kidika yuyulwi, kauna yang yul as bik yultasyang.

⁸Kidika bahang, yang, Papangyang kat yultayang: Manna alas manah yultamana bahang, dawak amana talamana kidika bik alaski, yang manna namangna kauh yang. Yang Papangyang kat yultayang.

⁹Yang tingki dulautik prapit amana taldi atwi alas yuyulwa balna yakat wah diaki, kat yulnina balna alas manah bahang. Yang tawanki Israel aslah kalahwarang yakat sip kakawas karang ki, dawak, Israel sauni yakat bik kakawas karang ki. Kaput laih manna yang akat amangkilatanama, yang adika Papangyang.’

¹⁰“Witingna, yaklauwi tawanki yakat alas kalyuyulwi, di bitik yamni ki atwi yuyulna, di rahm kidika laih kaput-awas dai. Sihm laih muih as uni kidika wayaka itikwi dawi minityakat pint pihni kau kahwa kapat.

¹¹Bahang diyulta, kidika muihni balna ū yaihnitkau pihni kahyang balna yakat, bahang witingna pihni yamni kakahna balna kidika sau kat bukna karang. Was parasni lauwi kaiwarang, dawak mayakaupak di minik kapat bubukna karang kipala kapat, dawak wing parasni wauhna karang wingbauwa kapat,

¹²dawak ū itikwi daklana dai kidika sau yakat bukna karang. Kaput dawak diyulwi dakawarang: ‘¿Ampadawi pint ānamana dai kidika?’

¹³Kidika bahang, yang, Papangyang kat yultayang: Yang kulnik daukalwarang yakat wing parasni kalating wauhnakarang, wingbauwa kapat; dawak kulnik daukalna yakat was bik parasni launa karang, dawak di minik kipala kapat bubukna karang, bahang kidika yaklauwi laih daukalpamna karang, kulnin anna kidika kau.

¹⁴Yang lawik, manna daklata pihni ānamana kidika daukalpamki, tuklakki saukat, sau dinit kau ānamana kidika bik, lāih kalahna karang. Daklana kidika sau yakat bukwak manna dautanama. Kaput dawak manna amangkilatanama, yang adika Papangyang.

¹⁵Yang kulnik daukalna kidika daklana mana nining yakat kiwarang, kaput bik pihni ahana balna niningna yakat bik; dawak muih balna kidika yuyulwarang:[20] ‘Daklana dai kidika di diski, dawak pihni ahana dai kidika bik,

¹⁶Israel pranipit balna amana dauh tatalwa dai kidika, dawak Jerusalén yakat kalyuyulwa dai, di bitik yamni manahki atwa dai kidika, kauna di rahm kidika laih kaput awasdai.’ Yang Papangyang kat yultayang.

¹⁷“Waralaih, muih al, yawah tawanma yayalni balna yang ayangki kau duwi yulbabauwa kidika yakat, kauna kidika laih witingna silp kulninna kau yuyulwi,

¹⁸dawak, diyulta: ‘Adika Papang yulwi: ¡Alakaih, manna, muih inin waltamana kidika; ting sitnin bitamana kidika muih bitik sitna atnin, dawak tun muknin bik yamtamana kidika muih bitik tunanina mukna atnin! ¿Manna sip kultamana, yang tawanki sangnika dawak daunin kidika manna lawa kalanamna, angdika kaiwarang kat?

¹⁹Manna cebada tingkurus buhng yulni, dawak plawar busna pis bin apis yulni, yang tawanki muhni yakat dauh yayamtamana; muih daunin-awas dai kidika itamana, dawak sangka atnin muihni-awas dai kidika sangka datamana. Kaput laih tawanki yakat alas kalyultamana, dawak alas kidika yakat rahm kulwi.

²⁰Kidika bahang, yang Papangyang kat yultayang: Yang yultayang, kidika tingsitnin bibiwa kidika niningkauh yang, dawak kidika kau muih kidika laihtamana uhbinina kapat. Yang lawik, parasmana kaupak laihtik dakyakki, dawak damukting uiwarang pri;

²¹tawan ki kidika, manna parasmana kaupak laihtik yakki ki, dawak tunanina muknin kau bik muknamana kidika, bahang watta laih laihtas awanama. Kaput laih manna amangkilatanama, yang adika Papangyang.

²²Manna, alas yultamana kidika kau, muih yayamni kidika bapuh yamnamana, kidika dini yang yamkih yāwasdai, dawak nawatkauh laih muih dudutni balna yakat kulninna dulauna mana, witingna baisa dutni yamna atnin, dawak yang lawik sangninaka baisa dianik-awas.

²³Kidika bahang manna watta amana taldi timana kidika talas awanama, dawak prapit yulni alas kidika bik yultas awanama. Yang tawanki kidika manna parasmana kaupak laihtik yakki ki, dawak amangkilatanama yang adika Papangyang.’ ”