Read Mayangna Ezequiel 16 Bible Online

Ezequiel 16 - Mayangna bible

Ezequiel 16

²“Man, muih, Jerusalén yakat niningkatah, witing di dudutni yamna balna kidika.

³Kalyulta: ‘Papang adika yulwi: man tamatuna kaupak kidika, man Jerusalén, man batahndanaman kidika laih Canaán muihni man; papangma laih Amorreo dai, dawak nanangma laih hitita.

⁴Man batahndanaman mani yakat uduma dadakwasdai, was masisihwasdai, kuma kau bik masalalapwasdai, bamamak sitnin dini bik sisitwas dai.

⁵Muih as bik mamakun matalwasdai, kidika dini balna mayamnin bik kulwi kalbauwas dai. Batahndana man mani kidika, ahni yakat maruruhmna dai, kat man kidika matalwi tiningna dulihwa dai bahang.

⁶Man yaihmatmunah bayaknayang, dawak man āma minit yakat tusman matalnayang, dawak yang kulnayang man kidika sangka atnam.

⁷Mayamting kat, ahni kau pan binina bararakwa kapat barakna man. Baraknaman, dawak yal muih barak kalnaman, Tama balna kidika nunuhna dai, dawak butuma bik kalahna dai. kauna muihma yakat asna as bik dis sakman dai.

⁸‘Wattik man yaihmat munah bayaknayang, dawak matalnayang; uman al dunam kurihni man dai. Yang tingki kidika man mamat yakat yunayang dai, dawak muhma wahdis sakman kidika muknayang dai; dawak man karak pramis yamnayang dai, dawak yang diki kalnaman dai. Yang, Papangyang kat yultayang.

⁹Dawak was masinayang, āma kidika bik klin yamnayang dawak di walapni makahnayang;

¹⁰asmana mapla sat sat yaksihn kat mahanayang dai, dawak susma laih di utak tanit yamni kidika dai; bamamak sitnin kidika asna tanit yamni kidika dai, dawak prakma kidika laih tanit yamni yamna kidika dai;

¹¹alahnin dini yaksasihn kidika manayang dai, tingma pana yakat ānin dini ānayang dai dawak damamak yakat alah as alahnayang dai;

¹²nangtak ānin dini as ānayang dai, dawak tapa ānin bik, dawak tunama yakat paknin nuhni yamni as manayang dai.

¹³Muihma kidika gol dawi lalah manah dai; man prakma kidika asna tanit yamni kidika dai, dawak yamni yamna kidika dawak asnina kidika mapla sat, sat yaksihni duwa dai. Plawar busna tanit yamni kidika kastaman dai, amak dawak olib salani karak. Nuhni yaksihni kalnaman dai: king yalni as kalnaman dai.

¹⁴Nisan balna pasyakat, ayangma nuhni kalna dai yaksinh man kidika yulni kat muihma bitik yamni manah dai bahang, yang yamniyang kidika kaput yaksinh mayamnayang dai bahang. Yang, Papangyang kat kaput yultayang.

¹⁵‘Kauna yaksinh man kidika yakat kulnaman bahang, dawak ayangma nuhni kalna yaka yulni lā bahna man, muih bayakwa bitik yakat muihma kidika dianaman.

¹⁶Man prakma yakau, dawan dauh yakat makatyulnin uni yamnaman, asang tuna balna yakat, dawak kidika yakat lā bahna man.[22]

¹⁷Alahnin dini gol manayang dai kidika, dawak lalah kau yamna balna bik manayang dai kidika kau duta muih waya yamnaman dai, kaput yakat man lā bahta atnam;

¹⁸dawak prakma yaksinh, mapla yayamni duwa dai kidika kau ānaman dai, dawak dikisala bik, walapni busnin dini bik kalanaman dai.

¹⁹Plawar busna yang manayang dai kidika bik, kidika laih plawar tanit yamni kidika kau yamna dai, amak dawak disala mabayahnayang dai kidika bik, witingna yakat dianaman dai minitdis kalanin as tanit walapni yamni dai kidika. Yang, Papangyang kat yultayang.

²⁰‘Walakibis ahal, yayal man kaupak dunayang dai kidika bik dunaman dai, dawak sakripais busnaman dai dawan dauh balna yakat, kasnin yamni as witingna. ¿Man namang yakat dauh daih, lā bahyang mayamnayang dai kidika,

²¹baisa kidika minit yakat walakibis balna sakripais busnaman dai, diatang kat kuhkau buswi ihina dai, kidika dawan dauh ayangni kau?

²²Sangmaka dutni, lā bahyang man kidika, ismang aitasmahn baisa dibinman kat wahdis tusman dai kidika, āma minit yakat pihrtatusman dai kidika.

²³‘Adika yultayang, yang, Papangyang kat: ¡Alakaih, man! Di dudutni yamnaman minit yakat,

²⁴pa ahni balna bitik yakat, dawan dauh balna yakat mamat yulnam pāni yamna man dai, dawak lā bahnin yakat awanaman.

²⁵Ta kiwi watwa bitik yakat kidika pāni balna yamnaman dai, dawak yaksinh man kidika di dutni yakat wirlana man, muihma kidika wais bayakwa kidika bitik yakat dianaman dai, ban tamat yakat lā bahta yawanaman

²⁶Man yaihmatkau balna yakarak la bahna man; Egipto muihni balna kidika laih kalduwi payahnin niningyakat dadaihni palni ki, dawak kulnik daukalnaman ban tamat yakat la bahta yawanaman kidika yulni.

²⁷‘Kaput laih tingki dulautik wah manayang man yakat: man alas madanayang dai, dawak filistain balna tawannina nuhni yakat masihnayang dai, bahang kidika balna laih dutni matatalwa dai, man dutni lapaktaman asalni kidika yulni.

²⁸Kauna kidika manah ismanglakwas dai, Asirio balna karak lā bahnaman; dawak kaput bik ismanglakwas dai.

²⁹Dawak ban tamat yakat lā bahnaman dai Babilon yakat, di wauhwi bakanyang balna saunina yakat, dawak kaput bik ismanglakwas dai.

³⁰Yang, Papangyang kat kaput yultayang: ¡Ampus ismang siknis dutaman, lā bahyang asalni dis yamwa dini balna palni yamtaman kidika!

³¹Ta kiwi watwa balna bitik yakat, dawak pa ahni balna yakat, sakripais busnin pāni yamnaman dai dawan dauh yakat mamat yulna atnam kaput laih lā bahna atnam. Kauna man laih lā bahyang balna ūk kapat awasman dai: ¡Man laih minit yaktasman dai!

³²‘Yal as witing alni yakat barangni-awas kidika, muih kaltalyang-awas bik āwi duwi.

³³Lā bahyang balna bitik yakat minit lauwi kalawi; kauna man laih nawatkauh, man lawa diataman dai, dalani talaman balna yakat, lauta diataman dai pa bitikkau muihni balna kidika aiwak dutni yakna atnam.

³⁴Lā bahnaman yakat nawatkauh yamna man dai yayal ūk balna yayamwa karak: muih as bik mawalwas ki dutni yamna atnam; witingna bik man yakat lauwi mamawas ki, nawatkauh laih man lawa lauta diata man witingna yakat. ¡Kidika yakat manah man laih satuk man!

³⁵‘Kidika bahang, dakah, lā bahyang, yang yulki:

³⁶Yang, Papangyang kat mayultayang: Man muihma kidika asalma dis laih yaknaman, kaput yamni talaman muihni balna yaka balna karak lā bahna man, dawak damawan dauh balna dudutni bitik karak, dawak walamabis balna ānina utuhnaman sakripais yamta.

³⁷Kidika bahang yang lawik, yamni ditalnaman balna kidika bitik uduhki ki, dawak kidika balna yakat yamni diyamna man kidika, yamni ditalnaman bitik kau dawak dutni ditalnaman balna bik; man yaihmat yakat uduhki ki, dawak witingna muhnitna yakat wahdis madaki dawak matatalwarang.

³⁸Lā bahnaman dawak muih inaman kidika kau lāma yamki ki, kulnik daukalna kau dawak mamat antīna, daunin yakat mahaki.

³⁹Witingna tingnina yakat madaki, bahang witingna yaklauwi lā bahtaman pāni dawak, dawan dauh kau mamat yultaman pāni balna kidika bahwidis yamwarang. Prakma kidika iswi dakyayakwarang, dawak minitkau diaksihn lakna balna kidika bik, kaput laih wahdis madadawarang.

⁴⁰Tawan kidika dulalauwarang man namangkauh, kipala kau mabahrwi, dawak isninaparah kau maihiwarang.

⁴¹Uma kidika kuh kau dadahlna karang, dawak yayal mahni muhnina yakat lama yayamna karang. La bahtaman kidika witni atik maki, dawak yamni talaman balna yakat watta lauta diatas awama.

⁴²Kaput laih yang kulnik daukalwa kidika man namang kauh isninglak dawarang, dawak mamat antayang kidika bik yamni kalna karang; isinglak dawarang, dawak wattik laih antas awaki.

⁴³Man, wahmaman mani balna dai kidika damatkahna, dawak di dutni yamnaman balna bitik kidika yulni kulnik daukalnaman dai; kaput bahang, yang wah maki, dutni yamnaman dai kidika yulni. Yang, Papangyang kat yultayang.

⁴⁴‘Kaltalyang yamni balna bitik, sins lani yuyulwi, man yakat āwi mayuyulwarang: nanangni ampat kat, walanibis yal bik kapat ki.

⁴⁵Manna laih nanang as alni kau dawak walanibis balna kau bik maisihni talwa dai kidika walanibis yal man, dawak kaput bik walanibis balna yakat bik maisihni talwa dai, dawak wirahma yayal balna bik alnina balna yakat maisihni tatalwa dai, dawak walaninabis ahal yakat bik. Manna bitik nanangmana dai kidika laih hitita dai, dawak, papangmana laih amorreo dai.

⁴⁶Tingpal niningkauh kidika yakat wirahma yal barakni sakdai, Samaria tawanni nuhni kidika, dawak yaihnit kau pa binina kidika bik, wadah niningkauh kidika laih wirahma yal usnit kidika sakdai, kidika laih Sadam tawanni nuhni, dawak yaihnit kau pa binina kidika bik.

⁴⁷Dawak man laih witing di yamna kidika yakat tala kaput yamnaman dawak di dudutni balna yamna kaput yamnaman. Dawak kidika manah ismanglakwas dai, man di balna yamnaman kidika laih tanit dutni dai kidika yayalni balna yayamna karak dawak.

⁴⁸Yang, Papangyang kat, sangkika kau yaktik yultayang: man wirahma yal Sodoma dawak yaihnit kau pa binina kidika, witingna dawak man yamnaman kidika laih tanit dutni ki, yaihmat kau pa binina karak kalpakta yamnamana kidika.

⁴⁹Adika kuduh, man wirahma yal Sodoma dutni balna yamna kidika: witing dawak yaihnit kau pa binina balna kidika karak, witingna manah kapat kaldakakawa dai, di kasnin mahni duduwa kidika bahang, dawak yamni yalalahwa kidika bik, kauna witingna muih minikunni yakat tingnisut lalaihwas dai, dawak dukih kalawa muihni yakat bik talwas dai.

⁵⁰Witingna manah kapat kaldakakana, dawak yang dutni talayang dini kidika yayamna; kidika bahang bahtik disyamnayang kidika, man talnaman.

⁵¹Samaria laih, man dutni yamnaman kidika papuswayah bik yamwas dai. Man laih di dutni kidika mahni yamnaman, witing karak dawak; man laih mahni yamnaman kidika bahang, witing kidika yaihmat yakat kiwak di as yamwas kapatki.

⁵²Man, sau yakat buknin lani kidika wauhnamki, kat wirahma yayal balna karak dawak man laih tanit dutni yamnaman kidika bahang, witingna kidika laih, di as yayamwas kapat yamnaman. Man, kidika asalni kidika wauhnamki, dawak sau yakat buknin kidika wauhnamki, kat wirahma kidika di as yamwas kapat kalyamnaman bahang.

⁵³‘Yang, lawik, Sodoma dawak Samaria, dawak yaihnit kau pa binina kidika balna yakat wattik kalaki ki baraknin kidika; dawak bik manyakat bik maki ki baraknin lani kidika,

⁵⁴kauna buknin lani kidika wauhnamki dawak asalni dakanam ki, man yamna man balna kidika yulni, kidika kau man kidika walaniānin as awama.

⁵⁵Sodoma, Samaria dawak yaihnitna kau pa binina kidika bik muhnilau dai kapat dawarang kat, man bik, dawak yaihmat kau pa binina kidika bik kapat dawarang ki, yamni.

⁵⁶Man kidika sarahni kalyultaman dai, wirahma yal Sadam wah duwakat, man manah kapat kaldakaman dai,

⁵⁷baisa man dutni yamnaman kidika laih kalahwas dai, kauna waralaih[23] edomita, dawak filisteo balna tawannina nunuhni kidika, dawak man yaihmat kau balna kidika bitik mauhuswi; ¡sau bitik kau dutni matalwi!

⁵⁸Waralaih, dutni yamnaman balna kidika wauhnamki. Yang, Papangyang kat yultayang.

⁵⁹‘Yang, Papangyang kat yultayang: Dunam dini kidika maki ki, man pramamis kidika kat yamta danaman.

⁶⁰Kauna, yang, man karak pramis yamnayang kidika laih ban kulnik yakat duki, man wahmaman dai mani yakat, dawak man karak pramis as ban kaput atnin bik yamki.

⁶¹Yang, mampat wirahma yal barakni dawak bin yaka bik, man walamabis yal kapat manayang kat, pramis kidika kaput yamnin yulwas kauna, man bayakna balna yakat yamnaman kidika ismangkatma, dawak asalni dakama.

⁶²Yang wattik pramis kidika man karak wisam yamki, dawak amanglama, yang laih, Papangyang.

⁶³Man ismangkatma dawak kasak asalni dakama, sau yakat buknin bik, dawak wat bik tampas wakahtas awama, man dutni yamnaman balna kidika bitik dating diswarang kat. Yang, Papangyang kat, yultayang.’ ”