Read Mayangna Ezequiel 17 Bible Online

Ezequiel 17 - Mayangna bible

Ezequiel 17

¹Papang yang akat kaiwi, yayulna:

²“Man muih al Israel yakat di as karak kallibittah.

³Kalyultah: ‘Adika Papang yulwi: Yakalnuh nuhni as Líbano yakat kiuna; lawani kidika nunuhni dai, butuni manh duwa dai dawak mapla satni duwa

⁴dai. Suhun sutni as kau laihna, dawak tingnirahni tanit maluihni kidika dakyakna, dawak duwi kiwi, di wauhwi bakanyang balna saunina yakat dahna, dawak tawanni nuhni kidika laih di wauhwi bakannin kidika manas dai.

⁵Usnit kat, sau kaupak di minik bin as duna, bahang kidika laih pa as di dadahna pakkat yakat dukiwi dahna, waskung kau, bahang was manas dai.[24]

⁶Di minik dai kidika pitwi kalahna, dawak wain panan as nuhni yamni dai, naini palni awasdai, tingni sutni balna kidika laih yakalnuh niningyakat yuna dai, dawak rikni balna kidika laih sau yakat kalawak kawi kiuna. Wain panan as kalna dai; sulani balna yakna dawak tingni rahni balna bik kalahna.

⁷Kauna yakalnuh ūk likdai, lawani nunuhni dawak butuni mahni palni. Wain panan kidika rikni balna duna, dawak tingni rahni balna kidika yakalnuh niningyakat yuna, baisa was lanin yulni, kat kidika kaupak naikau dai.

⁸Kaput kaunah, sau yamni kat dahna sakdai, was manas yaihnit yakat, kidika yakat sip dai tingni rahni manas yaknin dawak minik bik manas yaknin, kaput laih wain panan yamni nuhni as kalna atnin.’

⁹“Kalyultah yangkaupak: ‘Adika Papang yulwi: Adika wainni laih nuhni kalwas karang. Tatuna yakalnuh dai kidika yaklauwi rikni balna iswi dutwarang, dawak kalyamwak minik balna buk'uiwarang; parasni yakwas, dawak muih bulah kalahwi rikni balna iswi dudutwarang, dawak sulani balna kalahwa bangdai kidika laih kusulawarang.

¹⁰Watwi pa ūk yakwi dadahwarang bik ukuswas karang, ma kilwa kaupak wing wauhwakat kusulawarang; ukusnin dai kidika pāni yakat kusulawarang.’ ”

¹¹Papang, yang akat kaiwi yayulna:

¹²“Yul dakawas muihni balna diyulta dakah, adika yulni amanglawapa. Diyulta: ‘Babilon kingni kidika Jerusalén akat kaiwi Judá kingni yakat laihwi silak āna, dawak tunan muihni balna yakat bik, kaput laih duwi kiuna Babilon yakat.

¹³Usnit kat king walanibis al askat laihwi pramis yamna witing karak, dawak taihwi kalyamna witing muhni yakat barangni atnin, dawakat usnitkat muih nunuhni balna bitik laihwi duwi kiuna dai

¹⁴Judá sauni kidika parasni dis atnin yulni, yaklaunin bik sip-awas atnin, pramis kidika yakat yamnin kulwa karang bik.

¹⁵Kauna king walanibis al dai kidika Babilon kingni nining yakat yaklauna witing ayangni kau muih yakwi sihna Egipto yakat aras yulna atnin, dawak muih bik mahni yulna atnin. ¿Manna kultamana laih kidi bitik usnit kat, kiri yaklawarang kultamanah? ¿Kiri yaklawarang kultamanah muih as pramis kat yamwas kidika?

¹⁶Yang, Papang yang kat, sangkika kau yaktik yultayang Babilon yakat dauna karang pramis as yamdawi sarahni yamna kidika, king witing yaklauwi king yalahnin pāni yakat kalana dawak pramis kat yamwas dana kidika.

¹⁷Babilon kingni kidika yaklauwi kalbauwi, tawan nuhni daklana yaihnit yakat sau uhwi ilwi, dawak muih mahni iwakat, fero laih kalbauyang muihni balna sihwas karang ki,

¹⁸kat witing laih pramis yamna kidika yakat sarahni yamna, pranimis kat yamwas dana, yamnin yulna dai bik, dawi aput kau yamna. Kaput bahang sip kiri yaklawas karangki.

¹⁹‘Yang, Papangyang kat sangkika kau yaktik yultayang: witing yang kau pramis yamna dai kidika sarahni yamna, pranimis kat yang kau yamwas dana; kidika bahang yang witing yakat minit kalyulki ki.

²⁰Waspa laihnin dini kidika witing minit yakat ruhmna awaki, kaput laih witing kidika laihna awaki kidika dini kau; Babilon yakat duyawaki dawak kidika yakat lani yamki, yang kau barangni-awas dai bahang.

²¹Witing kalbauyang tanit yamni duwa kidika[25] dadauna karang kalbaunin yakat, dawak dauwas yaklalawarang balna kidika laih wing sutni arungka yakat rani sihna karang. Kaput laih manna amanglatanama, yang Papangyang kidika yulnayang.

²²‘Yang, Papangyang kat yultayang: suhun tuna tanit maluihni kidika duki ki; tingni rahni tanit maluihni kau udungni batani kidika dakyakna awaki, dawak yang palni dahna awaki asang tanit maluihni yakat,

²³Israel asangni tanit maluihni yakat. Tingni rahni balna yakwarang, dawak minik bik yakwarang, kaput laih suhun tanit yamni kalahna karang. Dawak tinglau, asangpas dini[26] satni balna bitik kidika dinit yakat aiwarang yalahna atnin, uhu satni balna bitik aiwi tingni rahni yakat ūnina yayamna karang.

²⁴Dawak pan nunuhni balna ūk kidika amanglalana karang yang kidika Papang- yang. Pan nuhni as witing manah kapat kaldakawa kidika yang lawik tuklaktayang, dawak pan dibin kidika kalating barakwi. Yang lawik pan sangni yamni kidika kalating buhlawi, dawak pan buhlana kidika kalating sanni yamni kalwi. Yang, Papangyang kat yultayang, dawak kidika kaput yamtayang.’ ”