Read Mayangna Ezequiel 18 Bible Online

Ezequiel 18 - Mayangna bible

Ezequiel 18

¹Papang yang akat kaiwi yayulna:

²“¿Amput dawak Israel yakat sins lani as yuyulwa kidika dawas wat wat yuyulwih: ‘Papangnina balna wain minik sapahni kakaswi, dawak walaninabis balna ananina yusni kakalwi’?

³Yang, Papangyang kat, sangkika kau yaktik yultayang, manna watta yultas awanama adika sinsni lani Israel pasyakat.

⁴Sau muihni balna bitik laih yang diki, sihm papangni dawak walanibis bik. Angdika muihni dutni yamwarang kat dauwarang.

⁵“Muih al barangni kidika laih lā kat yamwi dawak barangni kidika bik:

⁶Asang ubulni balna kau kasnin dini alasna yayamwa kidika, wayani dauh yakat ayangni nuhni yamnin, dawak kulnin bik yamni kulwaski Israel daniwan dauh balna yakat; wanaihni yalni dakyakwas ki, dawak bik witing yalni kidika wainiku siknis karak likkat albu payayahwas ki;

⁷muih as kau bik taihwas ki, muih as witing kau lauwi kalanin muih dini as duna dai kidika watwi kalawi, muih dini as bik malwas ki; witing kasnin kidika yuhdauwa muihni yakat kalpakwi kakaswi, dawak asna dis muihni yakat asna kalawi;

⁸muih as kau bik lalah kalawas ki minit kau yakwi duna atnin yulni; muih as kau bik dutni kalyamwas ki, muih bu kalbibilwarang kat lanina kidika barangni yamwi lā kat;

⁹yang laki balna amput kat kaput yamwi, witing barangni ki laki balna yakat yamwi. Kidika alni laih rahm palni barangni ki, kaput bahang witing sangka karang. Yang, Papangyang kat kaput yultayang.

¹⁰“Kaunah adika alni laih walanibis al as duwi kulnin parasni dawak muih iyang ki, bahang kidika dini balna yamwi

¹¹kaina witing papangni laih kaput yamwas dai, yuldarang kat, asang ubulni balna kau kasnin dini alasna yayamwa kidika dawan dauh balna kau ayangni nuhni yamnin, kidika balna pasyakat kawas dai, wanaihni yalni dakyaknin,

¹²muih minikunni dawak dukih kalawa yakat bik taihwi, muih ūk balna yakat bik di malwi, tras kalduyang balna yakat dinina duna dai kidika diawaski, dawan dauh balna yakat kulnin yamni dikulwi dawak yang dutni talayang dini balna kidika yamwi,

¹³lalah yuyulwak wayaki diawi dawak usnit kat ditaihwi yamwak minitkau lalauwi: Kidika muihni laih sip awaski sangka atnin. Yang dutni talayang dini balna bitik yamna usnit kat, sinika dis dauna karang ki, dawak witing dauwa kidika alas salahni yakat karang.

¹⁴“Sipki adika alni witing walanibis al as dunin, dawak papangni dutni balna yamna kidika bitik talnin, kauna kidika yakat usnit uinin awaski;

¹⁵yuldarangkat, asang ubulni balna kau kasnin dini alasna yayamwa kidika, wayani dauh balna yakat ayangni nuhni yamnin, kidika pasyakat kanin-awas ki, dawak Israel daniwan dauh balna yakat kulnin kalanin awaski; wanaihni yalni dakyaknin awaski

¹⁶muih as kau bik taihnin awaski, witing yakat muih as di wayaki yulwi duwarang kat, kidika yulni dini dakyaknin-awaski, muih as bik dini malnin- awaski, nawatkauh laih witing kasnin kidika yuhdauwa muihni karak sahyakwi kakaswarang, dawak asna dis muihni yakat asna kalana karang;

¹⁷muih as kau bik dutni kalyamnin awaski[27] lalah muih as kau wayaki kalawi minitkau dakyakwi dunin awaski, dawak yang laki balna yakat yamwang, amput yamnin yulnayang yakat yamna atnin; kidika alni laih witing papangni dutni yamna yulni dauwas karang ki. Rahm palni laih sangka karang.

¹⁸“Witing papangni muih taihyang dai kidika, dawak di malna, witing tawanni pasyakat dutni yamna, witing alas dutni yamna kidika yulni dauwarang.

¹⁹Manna yulta dakanama: ‘¿Amput dawak walanibis kidika bik papangni dutni yamna kidika minitlauwas yah?’ Kat walanibis al kidika laih barangni dai dawak lā kat dai, dawak yang lāki balna kat yamna dai: kidika bahang rahm palni laih sangka karangki.

²⁰Angdika muihni dutni yamna kidika manah dauna karang. Papangni dutni yamna kidika walanibis al kidika bik minitlauwas karang ki, dawak papangni bik walanibis dutni yamna kidika minitlauwas karang ki. Barangni muihni kidika, barangni minit duna karang; dawak muih dutni kidika, dutni yamna panisni dunakarang.

²¹“Dawak muih dutni kidika dutni yamwa dai kaupak dawi yaklawarang dawak, yang lāki balna yakat barangni yamwarang kat, rahm palni laih sangka karangki, dauwas karang.

²²Witing dutni balna yamna bitik kidika wattik kultas awaki, dawak witing sangka karang di barangni kat yamna yulni.

²³Yang dukih yawas ki muih dutni dauwarang kidika, nawat kauh laih dutni yamwa kidika dawi sangka ban kawang. Yang Papangyang kat yultayang.

²⁴“Kauna muih la kat muihni kidika dawi dutni yamwarang kat, muih dutni di dutni manah yamwa kapat, ¿manna kultamana witing ban sangka karang? Witing di yamni yamna balna dai kidika kultas awaki: witing barangni awasdai kidika yulni dauwarang, dutni yamna dai bahang.

²⁵Manna yultamana, yang lā kat yamtasyang; kauna dakah, Israel tawanni, ¿Manna kultamana yang yamni yamtasyang? ¿Nawatnikauh awasyah, manna kauh dutni yamtamana awasyah?

²⁶Muih barangni muihni kidika dawi dutni yamwarang kat, witing dauwarangki dutni yamna yulni.

²⁷Nawatkauh, muih dutni kidika dutni kaupak dawi yaklawarang kat, dawak yamni yamwarang kat, sangnika laihwi yakwarang ki.

²⁸Minikpa sahmuhwi talwi, dutni balna kaupak dawi yaklawarang kat yamna balna dai kidika kaupak, rahm palni laih sangka barangni, dauwas karang.

²⁹“Kauna Israel tawanni laih yulwarang yang lā kat yamtasyang. ¿Yang lā kat yamtasyang? ¿Nawatkauh laih, Israel tawanni kauh lā kat yamwas awasyah?

³⁰Yang lawik as as lamana yamtayang Israel balna, manna amput yamnamana yakat. Yang, Papangyang kat yultayang. Manna dutmana kidika barangni ruhmta datanauh, manna salahmana yakat kilnin-awas manna alas daukaltanama kidika.

³¹Yang nikingkauh dutni yamnamana balna bitik kaupak naikau ruhmta datanauh, dawak ismangna spiritmana wisam yamtanauh. ¿Aisyamta daumayah Israel tawanni,

³²dukih yawas kidika muih as bik daunin? Dutni kaupak lawanauh, kaput laih sangka awanama. Yang Papangyang kat yultayang.