Read Mayangna Ezequiel 19 Bible Online

Ezequiel 19 - Mayangna bible

Ezequiel 19

¹“Man, muih al, dauna laniwana adika unbautah Israel kingni balna yakat:

²‘Man nanangma kidika layan yal as dai, bahang layan balna pasyakat likdai. Witing pāni yamna dai kidika balna pasyakat, dawak kidika pāni yakat walanibis balna muhna dai.

³As laih kalawak tanit barakwatna dai. Witing lan kalna dai di laihwa kidika kaswi bisna atnin dawak muih bik laihwi kasnin.

⁴Nisan balna kidika dakakana dai witing yamwa kidika; bahang laihnin dini kau yamwi lalaihna, pan rahni kau āwi murwi duwi uina Egipto sauni kat.

⁵Layan yal kidika talna witing tahanin as duwa dai kidika bitik laih disna, dawak walanibis ūk dai kidika ilp kalawak barakna.

⁶Layan barakwatna dawak lan balna pasyakat kiwi kaiwi uina. Lan kalna dai di laihwa kidika kaswi bisnin dawak muih bik laihwi kasnin.

⁷King ūni yakat di balna bitik laih daukalwa dai[28] dawak tawan nunuhni balna kidika bik; witing parasni sarahwa kidika muih bitik laih diyukwadai.

⁸Kaput dawak, yaihnitkau tawan balna kidika witing niningkauh yaklalauna; laihnin dini kidika ririna dawak kidika yakat bukna dai.

⁹Kaput laih pan rahni kau duwi uiwi ānin uni yakat awi puputna, dawak Babilon kingni yakat duwi uina; kaput laih silak ahana, watwi sarahwa kidika muih dakanin-awas yulni, Israel asangnipas yakat.

¹⁰‘Nanangma laih wain as waskung yakat dahna kapat dai, nuhni sangni yamni dawak minik bik yamni yakwi, was yamni duwa kidika yulni.

¹¹Tingni rahni balna kidika dadasni kakalna dai dawak king balna tulninanah kakalna, dawak baisa barakna kaput laih mukus kat kilwi kana. Tanit yamni kalna naini dawak sangni yamni nuhni kidika yulni, tingni balna.

¹²Kauna laihwi iswi dudutna dai kulninna anna parasni karak, dawak sau yakat ruhm'lalakna. Ma kilwa kaupak wing kaiwa kidika yaklauwi kusulana dawak wainni minik balna kidika bubukna; tingni rahni dadasni balna dai kidika buhlana dawak kuh pasyakat ruruhmna.

¹³Waralaih kauhmak wanilang yakat dahna ki, sau buhni was dis pāni yakat.

¹⁴Tingni rahni balna kaupak kuhpau kalahwi sulani ukuswa balna dawak minik balna kidika buswi. Tingni rahni dadasni balna kidika uman dis kalna, king balna tulninanah duna atnin.’ ” (Adika laih muih dauwak nunin laniwana dawak muih dauwak nunin laniwana kapat yusyamna karang.)