Read Mayangna Ezequiel 20 Bible Online

Ezequiel 20 - Mayangna bible

Ezequiel 20

¹Waiku singka laihna ma salap yakat, Israel kaupak muihbararak buas Papang yakat uina dai di kalyulwi dakana, dawak yang muhkit yakat yalalahna.

²Dawak Papang yang akat wiryaklawi yayulna:

³“Man, muih al, Israel muihni bararak balna yakat diyulta: ‘Adika Papang yulwi: ¿Manna yang akat di yayulta dakana aiwamana? Bahang yang, Papangyang kat sangkika kau yaktik yultayang, dating kat di yayulta dakas awanama.’

⁴Muih al man lawa lanina yamta; lanina yamta niningna karang amanglalawang, papangnina balna di dutni yayamna dai kidika.

⁵Diyulta: ‘Adika Papang yulwi: Israel kidika yaknayang kat, sulani balna yakat pramis as yamnayang dai, dawak Egipto yakat laih alahwanayang dai witingna yakat. Muih mahni muhnina yakat pramis diyamnayang: “Yang laih manna Papangmana-yang.

⁶Kidika mani Egipto kaupak diyaknik pramis yamnayang, dawak diduyawinik pa as walnayang dai yakat, pa as tāwas dawak amak kidika was kapat kira pāni yakat, ¡pa as tanit yamni kidika pa bitik pasyakat!

⁷Witingna bitik yakat dipaknayang papangnina dauh kidika ruhmwi danin, dawak Egipto daniwan dauh balna karak maisihni kalalahwinih, kat yang laih manna Papangmana-yang bahang.

⁸‘Kauna witingna laih nikingkauh yaklalauna, yadakakih diawas dai; daninawan dauh kidika ruhmwi dadawas dai, dawak Egipto daniwan dauh bik ruhmwi dadawas dai. Yang kulnayang, kulnik anna kidika witingna minitna yakat kalating kiunin, dawak Egipto pāni yakat wah dianik, kulnik daukalna kidika isinglakwak kat.

⁹Kaunah yang yamnayang, ayangki nuhni kidika kau, kaput laih nisan balna miniknapa yakat dutni kalahnin-awas yulni, kidika nisan balna muhnitna yakat lāih alahwanayang dai Israel yakat, dawak pramis diyamnayang Egipto pāni kaupak diyaknik.

¹⁰Yang lawik Egipto kaupak yaktik kauhmak wanilang yakat duyawanayang;

¹¹kidika yakat yang lāki balna kidika niningnakana-yang, bahang wais kat kidika yakat laihwi yamwarangkat sangnika duwarang.

¹²Dawak yang yakurupdinin mani[29], kidika bik niningnakana-yang, bahang kidika laih sain as atnin dai witingna dawi yang karak, dawak kidika laih yang Papangyang adika yang diki yaknayang.

¹³Kaunah yang nikingkauh yaklalauna kauhmak wanilang yakat, yang lāki kat yamwas dadana; lā dianayang dai kidika ruhmwi dadana, bahang kidika lani kat yamwi sangninaka dunin dai, dawak yang yakurupdinin mani dai kidika dauh yayamna. Kulnayang, yang kulnik daukalna kidika witingna minitna yakat kalating kiunin, dawak kauhmak wanilang yakat dismuknik,

¹⁴kaunah yang ayangki nuhni kidika yulni yamtas danayang dai, kaput laih nisan balna miniknapa yakat dutni kalnin-awas yulni, kat witingna tatalna dai bahang amput datik Egipto kaupak yaknayang dai kidika.

¹⁵‘Kauhmak wanilang yakat bik diyulnayang dai pa dianin yulnayang dai yakat bik diating kakawas atnin, bitik pasyakat baisa tanit yamni dai kidika, bahang kidika pāni yakat laih tāwas dawak amak kidika was kapat kiri,

¹⁶kat witingna laih lāki balna ruhmwi dadana dai lāki balna yakat yayamwas dai, yak-urupdinik mani kidika bik dauh kukulna, kat witingna kulninna laih dawan dauh yakat kiuna bahang.

¹⁷Kaput dai kauna, dalani yana dismuknik kauhmak wanilang yakat.

¹⁸Kaput dawak sulanina balna yakat diyulnayang, witingna papangnina diyuyulwa yakat yamnin-awas, dawak dawan dauh karak bik maisihni kalahnin awas.

¹⁹Diyulnayang: Yang laih manna Papangmana-yang. Yang laki balna yakat yamtanauh,

²⁰dawak yak-urupdayang mani balna kidika kultanauh, kaput laih yang dawi manna karak sain as karang, kaput laih amanglalana karang yang adika manna Papangmana-yang.

²¹‘Kauna witingna bik yang nikingkauh yaklalauna. Lāki kat yamwas dadana, wais kidika lani laihwi yamwa kidika sangnika kalawi, dawak wingkita puhtayang mani bik dauh yayamna. Kulnayang, witingna minitna yakat kulnik daukalna kidika kalating kiunin, dawak yakat dismuknik kauhmak wanilang yakat, kulnik daukalna kaupak isinglak danin yulni.

²²Kaunah laihwatnayang ayangki nuhni kidika yulni, nisan balna miniknapa yakat dutni kalnin-awas yulni kat witingna tatalna dai amput yamtik Egipto sauni kaupak yaknayang dai kidika.

²³Kauhmak wanilang yakat diyulnayang dai, witingna kidika diating kat nisan balna yakat ruhwi kiwarang kidika,

²⁴kat yang lāki kat yamwas dadana, lāki balna ruruhmna, yak-urupdinik mani balna dauh yayamna, dawak witingna miniknapa kidika muihninabararak balna daninawan dauh yaka manah tatalna.

²⁵Dawak lā yamni kidika-awasbik ānayang dai, dawak lā as sangnika kalawa kidika bik.

²⁶Danayang maisihni kalahna atnin, dawan dauh yakat minitdis dianin duwi uiwa yulni, dawak walaninabis ahal tatuna kuh kau buswi sakripais yayamna yulni. Adika yamnayang witingna yamadunin yulni, dawak amangkilanin yang adika Papangyang.’

²⁷“Man, muih al, Israel balna yakat diyulta: ‘Adika Papang yulwi: manna papangmana balna bik yang kau yauhusna dai; dawak yang kau barangni-awas dai.

²⁸Yang lawik yamting āwanamna sau as mananik pramis yamnayang sauni yakat, bahang kidika yakat sau ubulni aslah talamana dai, kidika awaskat pan nuhni yamni as, yakat sakripais yamtamana dai, dawak minit dis kalanin dini bik kalatamana dai, bahang kidika laih tanit kulnik daukalwa kidika, di walapni balna laktamana dai, dawak wain wasni kidika utuhtamana dai minit yakat.

²⁹Yang lawik diyultik dakanayang: ¿Ais sat daniwan dauh pāni kat yawamanah, adika? Dawak kaput laih ayangni papakna, dawan dauh pāni,[30] warmani kat.’

³⁰“Israel tawanni yakat kalyulta: ‘Papang aput yulwi: ¿Ais yamta manna maisihni kalkahdang-timana muihmana bararak balna yayamna dai kaput? ¿Ais yamta yang niking kauh barangni-awas manah dawan dauh yakat mamatna yulta?

³¹Minitdis kalanin dini duyawamana kidika, dawak walamanabis ahal sakripais bustamana kidika kuhkau, manna ban maisihni kalkahtamana dawan dauh dutamana yakarak. ¿Kaput yamtamana bik dukih manawi, yang akat aiwa di yayulta dakanin? Yang, Papangyang kat sangkika kau yaktik yultayang, dating kat yang akat di yayulta dakas awanama, manna.

³²Manna tunamana yak kana nisan balna kapat atnin, witingna laih pan yakat, kipala yakat minitna yuyulwi, kauna kaput-awas karang.

³³Yang, Papangyang, bahang sangkika kau yaktik yultayang, paraski nuhni yaktik, dawak kulnik daukalna kidika kau wah manatik manna mamatna yakat king awaki.

³⁴Yang lawik manauduhki, tawan dawak nisan balna paskau kalranamana kidika kaupak, paraski nuhni kidika yaktik, kulnik daukalna kidika kau wah manatik.

³⁵Manaduyawaki, kauhmak wanilang tawanni balna yakat, dawak mamuhki libitdak lamana yamki, sihm muihmanabararak balna lānina yamnayang dai kapat Egipto kauhnimak wanilang yakat. Yang, Papangyang kat yultayang.

³⁶

³⁷Yang lawik manalaihtik talki, sīp maintalyang as sīpni balna kulwi talwa kapat, dawak manapakting kat pramis yakat yamtanama.

³⁸Muih dudutni balna kidika kaupak manayaktik silp manalaki, dawak muih saunina kau yalahtamana kidik waradika kidika kaupak manayakki; kauna witingna laih Israel sauni yakat uiwi kakawas karang. Kaput laih manna amanglatanama yang kidik Papangyang.

³⁹‘Israel tawanni, adika Papang yulwi: ¡Yawa dawan dauh yakat mamatna yultanauh...! Kauna usnit dawak yang yulki dakanama, dawak watta yang ayangki holi kidika daukaltas awanama, dawan dauh yakat mamatna yulta.

⁴⁰Israel bitik kidika ayangki nuhni yayamna karang, asangki holi yakat, Israel pasyakat asang tanit maluihni kidika, yang sauki yakat. Yang, Papangyang kat yultayang. Kidika yakat diduna awaki; kidika yakat diyultingkat minitdis dini kidika yayamwarang, dawak di minik tatuna yayakwa kidika bik, kaput laih di bitik yang kau yanin dini kidika yayana karang.

⁴¹Mampat uduhki kat sau dawak nisan balna pasyakat kalruhna bangkidika, dawak manna namangnakaki kat, maisihni disyang kidika, tawan mahni bitik miniknapa yakat, kaput dawak laihtak witingna minitdis dianin dini duwi aiwa kidika walapni duna awaki.

⁴²‘Dawak mampat kalatingkat Israel yakat kawarang kat, manna muihmana bararak balna kau pramis diyamnayang dai kidika pāni yakat, kaput laih amanglalana karang yang adika Papangyang.

⁴³Kidika yakat isningna katwarang, witingna di dutni bitik yayamna kidika, dawak manna silp muihmana kidika tamangna dulihwarang di dutni mahni yamnamana yulni.

⁴⁴Israel tawanni, yang manna yakat manayamki, dutni yamnamana yulni-awas kauna yang ayangki nuhni kidika yulni kau, kaput laih manna amanglatanama, yang laih Papangyang. Yang Papangyang kat yultayang.’ ”

⁴⁵Papang, yang akat kaiwi yayulna:

⁴⁶“Man, muih al, nawatta yawah wadah niningkauh yakat, kidika nining yakat yulma kidika kalatang kiwang, yang ayangki dau duta yultah wadah niningkauh sauni asangnipas niningyakat,

⁴⁷dawak diyulta: ‘Adika Papang yulwi: Man yakat kuhpau pakting dahlna karang, kaput laih panama sangka dawak buhlana balna kidika bitik laih busna karang. Adika kuhni laih piwas dahlna karang, dawak man kau muih bangkidika bitik muhnina busna karang, tingpal kaupak wadah niningkauh yakat.

⁴⁸Muih bitik tatalna karang, yang Papangyang kat kuh pakting dahlna. Dawak kuhni kidika piwas karang.’ ”

⁴⁹Yang nangnitlanayang: “¡Alakaih, Papang muih yuyulwi, yang laih muih amanglalawas dini manah yultayang yatwi!”