Read Mayangna Ezequiel 21 Bible Online

Ezequiel 21 - Mayangna bible

Ezequiel 21

¹Kaput laih Papang yang akat kaiwi yayulna:

²“Man, muih al, Jerusalén yakat nawatta yawa man yulma kidika, makat yulnin uni nining yakat yultah. Yang ayangki kau duta Israel sauni nining yakat yulta,

³dawak yultah: ‘Papang adika yulwi: yang yultayang man waihmalayang. Yang isparah yaktik īna awaki barangni muihni bik, dawak dutni muihni balna bik.

⁴Agha, yang iskiparah yaktik papatni bitik iki, barangni muihni dawak dutni muihni balna bik, tingpal niningkaupak dawak wadah niningyakat

⁵Muih bitik laih amanglalana karang, yang Papangyang adika isparah yaknayang bahang apaktas awaki pāni yakat.’

⁶“Dawak, man muih al, aidah tapalhni palni, ismang kidika bitik sahwi dis dana kapat; aidah tawan muihni tani yakat.

⁷Man aidanaman kidika muih mayulwi dakakawarang kat diyulta yul as kat kaiwi kalahnin manah kat yulni aidaman, kaput laih kidika kaiwi kalahwarang kat muih bitik laih kulninna parasni dis dawarang ki, dawak tingnina bik dulalauwas karang ki, muih as bik kulnin parasni dis dawarang ki, muih bitik laih diyukwarang kalnina, yamaduduwak. Kidika awarni kaiwi kawi, bahang mahka kalahwarang ki. Yang Papangyang kat yultayang.”

⁸Papang, yang akat kaiwi yayulna:

⁹“Man, muih al, yang ayangki kau duta yultah, yang mapaknayang yulna atnam: ‘¡Isparah, isparah! Uman buhwi baini dana sakki.

¹⁰Buhwi baina sakki muih īna atnin yulni yamni baina alwana lapwi ruhmwa kapat kalawak kalahna datnin;[31]

¹¹yamni buhwi babaina matingki yakat duna atnin. Ismaparah kidika buhwi yamni baina sakki, muih iyang tingni yakat āna atnin.

¹²Dawak, man muih al, ¡sarahta kat yang tawanki kidika inin yakna bahang, dawak Israel kingni balna bitik! Yang tawanki karak daunin yayakna bahang, man muihma yakat bautah dalani atnin.[32]

¹³Yang Papangyang kat yultayang.’[33]

¹⁴“Man, muih al, yang ayangki kau yulta isparah yakat kalatang kat wat-bu, wat-bas praisni dutni yamnin kidika yamwang. Kidika isniparah laih inin dini, inin isniparah as yamadangni kidika tawan yakat inin yamwi pa bitik kau.

¹⁵Kidika yaklauwi yamwak muihsak dadauwarang mahni laih īna karang. U balna bitik yakat inin isniparah kidika ānayang. Kidika isniparah laih yamni palni baina alwana lapwa kapat kalawak kalahnin, buhwi baina muih īna atnin yulni.

¹⁶¡Bainiman kat dukih yawi,[34] tingpal niningkauh dawak wadah niningkauh bik dakna atnin, nabupak!

¹⁷Yang bik lawik pakki ki Kulnik daukalna kidika lunglakna atnin yulni. Yang, Papangyang kat yultayang.”

¹⁸Papang, yang akat kaiwi yayulna:

¹⁹“Ta bu yamtang kat, Babilon kingni kidika isniparah duwi bayakwang. Sau as kaupak ta bu kidika kalahnin ki, ta kawa kidika bupak sainni maki, bahang kidika sainni kidika amanglawarang angdika tawanni nuhni kat kaldu'kiwarang kidika.[35]

²⁰King isniparah duwi bayakwi kiwarang tani kidika yaknam ki. Tawanni nunuhni balna kidika Amonita balna tawannina nuhni Rabá dawak Jerusalén Judá tawanni nuhni karak.

²¹Babilon kingni kidika ta bu kidika yakat kawi duna witing suerte yakat yulwi dakawi; sibang balna kidika banawi, dawan dauh balna yakat yulwi dakawi, dawak tinglau balna isning kidika bik laihwi talwi.

²²Tingnipal nining kauh sibang as kalahna kidika laih Jerusalén niningyakat yuwi, kidika tanka laih mahka kalbaunin dawak bik inin kidika adar kalana atnin, wār kidika yulni parasni sarahna atnin, dūr balna yakat kalbaunin, mahka sau uhwi duwi kil'kiunin dawak bitik awaihdaknin.

²³Kauna Jerusalén muihni balna laih adika yulni adik dauh kukulwi, witingna pramis yayamni kidika yulni. Kauna di as rahm kidika laih, witingna dutni yayamna kidika niningkauh yulna ki, dawak isningpakna as ki witingna kidika dilaihwi duwi kiuna atnin.

²⁴Kaput bahang, yang, Papangyang kat yultayang: manna dutmana dawak inamana kidika lāih kalahna ki; manna yamtamana bitik yakat dutni yamnamana kidika lāih kalahna. Kidika bahang manalaihna karangki.

²⁵Israel kingni man yakat laih, witni yakat wah dunam kidika ulisna, dutni yamyang.

²⁶Yang, Papangyang kat yultayang: Tamana balaktaman kidika namang-yayakna karang, king paknin paktaman kidika bik tingma kaupak dakyayakna karang, dawak di bitik kidika satuk karang. ¡Tuna yakat kilna karang sau langni kau kidika, dawak sau yakat bukna karang asang tuna kau kidika!

²⁷Bitik laih daukaltik daki. Kauna adika kalahna karang yamwangtik paknayang muihni kidika kaiwarang mani kat, bahang lā yamnin laih witing tingni yakat ki.

²⁸“Man, muih al, yang ayangki kau duta yulta dawak Amonita balna yakat diyulta witingna Israel kau uhuswa kidika, isparah laih uman uni kaupak muryakna, inin manah, dawak bik buhwi baini dana yaringni palni daukalnin manah.

²⁹Manna mamaknapa kau talnamana kidika laih dauhki, dawak tamatna kau kalahwarang balna kidika bik alas manah ki. Isparah kidika muih dutni balna dininamak yakat bukna karang. Wah dunamna mani balna bik ulisna.

³⁰“¡Isparah watta uma yakat awah! Yang maisdana awaki mayamnayang pāni yakat, sau yakat batanh danaman kidika,

³¹man mamat yakat kulnik daukalna kidika kalating kiwarang, kuh dahlwa yamadangni kapat; muih dudutni balna parasnina kidika maki.

³²Mabuswi madaukalna karang, man āma kidika sauma bitik yakat kirana karang, dawak muih as bik man yakat isningkatwas karang. Yang Papangyang kat yultayang.”