Read Mayangna Ezequiel 22 Bible Online

Ezequiel 22 - Mayangna bible

Ezequiel 22

¹Papang, yang akat kaiwi yayulna:

²“Man, muih al, tawan nuhni nining yakat lani yamma. Di dutni yamna balna bitik kidika yakta yulma,

³dawak kalyulma: ‘Papang adika yulwi: tawan nuhni man muihma balna itamana kidika dawak dawan dauh wayani yamta man kidika, ¡uman awarma kaiwi kawarang ki!

⁴Muih inaman kidika yulni laih man yakat bukna, dawak dawan dauh wayani yamnaman yulni laih muihma yakat dutni makana, kidika yamnaman yulni laih awarma kidika ulisna, dawak ma balna witni kidika kiwi kana. Kaput laih yamting kat tawan ūk balna kidika yulnina kau dutni mayuyulna karang, dawak nisan balna bik.

⁵Yaihmatkau balna dawak naikau balna bik man yakat sarahni mayuyulna karang, tawan nuhni man dawan dauh usnit uinaman yulni dawak pini wauhnaman kidika yulni.

⁶Yakat bangki Israel tawanni tunan muihni balna, witingna man pasmang yakat yalalahwi dawak witingna ampus dutni yamnin sip kidika yakat yayamwi.

⁷Man muihma balna kidika papangnina yakat dawak nanangnina yakat ayangni nuhni yayamwas ki, pa ūk kau aiwa balna yakat dutni diyayamwi, warau balna dawak tingmak balna dinina dakyayakwi.

⁸Yang paki maisihni dis balna dawak yakurupdinin mani[36], bik kukulwas ki,

⁹alas yuyulwa yulni, muihma balna kidika as as witingna pātnina, ūk balna dadauwarang kidika; asang tuna kau alasna kasnin dini yayamwa kidika dawan dauh balna kau kidika yakat uiwi, dawak di dutni yayamwi.

¹⁰As as laih papangnina yalni karak dutni yayamwi, kidika awaskat, yayal ānina kalahwa tulutulu balna yakat laihwi dutni diyayamwi.

¹¹Uk balna laih wanaihnina yalnina balna karak dutni yayamwi, kidika awas kat walaninabis yalni karak bik dutni yayamwi, dawak papangnina walanibis yal yakat laihwi dutni di yayamna.

¹²Man muihma balna buas laih muih iwi minit duduna ki. Lalah diayawi muih ūk yakat usnit dawak minit kau yakwi dunin yulni, wanaihni kau taihwi dini dakyakwi dawak kalbilnin nuhni bik yamwi, kaput laih yang adika dinitnakahwi. Yang, Papangyang kat yultayang.

¹³‘Yang uba kulnik daukalna witingna muih taihwi dinina dakyayakwa kidika yulni dawak muih ihiwa kidika yulni bik.

¹⁴Man kulwinih yang niking kauh lawama, man namang yakat lā yamtingkat. Yang, Papangyang kat yultayang, bahang kaput laih yamki ki:

¹⁵nisan balna yakat maruhmting yawama, kaput laih maisihni dutaman kidika bitik laih ustik yakki;

¹⁶yayamtang kat dutni alahwaki[37] nisan balna muhnina yakat, kaunah amanglama, yang laih Papangyang.’ ”

¹⁷Papang, yang akat kaiwi yayulna:

¹⁸“Israel tawanni kidika yang niking yakat di dauhki kapat as ki, sihm ayan, bras, lalah busnin pāni yakat adi busdak yayahni watwa kapat ki.

¹⁹Kidika bahang, yang, Papangyang kat yultayang: manna bitik di yayahni dauh as kapat alahwanamana bahang, Jerusalén pasyakat manadaukalki.

²⁰Sihm, lalah, bras, ayan, lit, kidika balna bitik libitwi busnin pāni yakat awi kuhni bibiwak buswa kapat, yang kulnik daukalna yamadangni yulni, manna bitik manalaihtik mana-uduhtik busnin pāni yakat mana-atik manabustik maisihni dis manadaki.

²¹Agha, yang kulnik daukalna kuhni bīki ki, dawak manna bitik mana-uduhtik tawan nuhni papus yakat manabuski.

²²Sihm lalah kuh payak awi buswi maisihni dis yamwa kapat, tawan nuhni papus yakat malaktik manabuski, kaput laih manna amanglatanama, yang laih Papangyang, dawak kulnik daukalna kidika manna mamatna yakat sihting kaina.”

²³Papang yang akat kaiwi yayulna:

²⁴“Man, muih al, Israel yakat kalyulta: ‘Man laih kabamint sauni as man Papang yaklauwi wah mana kidika laih was kalawak lauwas ki,[38] dawak bik was diski,

²⁵kabamint sauni as, kabamintni kidika[39] laih layan kapat ki, bahang ihwi, dawak witing kasnin laihna kidik laih kaswi biswi; witing sauni yakat laih muih kidika laihwi kakaswi, dawak dinina balna yayamni kidika bitik mamalwi, kaput laih yayal balna kidika manas tingmak kakalwi.

²⁶Adika sauni sumalyang balna yaklauwi yang sumaltayang kidika satuk wirlalawi, dawak yang di as maisihni dis kultayang kidi risnipik kalalawas ki, dawak witingna satuk tatalwas ki di as maisihni dis kidika dawak di as dutni kidika karak, kaput bik ūk balna yakat sumamalwas ki amanglana atnin di dutni dawak yamni karak. Yang urupdinin mani[40] kukulwas ki, dawak ayangki bik nuhni yayamwas ki.

²⁷Adika sauni tanituna balna laih nawah balna di iwi kaswi iswi biswa kapat ki, witingna laih ridi ki muih ani utuhna atnin, dawak muih iwi lalah duyang kalnin.

²⁸Prapit balna laih di rahm kidika mamalwi, sihm tat yakat di pihni kahwa kapat; witingna miniknapa yakat di talwi yuyulwi, dawak muih balna yakat isningna papakwi kauna dauh manah kalahwi. Witingna yuyulwi yang ayangki kau yuldi atwi, kauna di rahm kidika laih yang yul as bik yultasyang.

²⁹Muih balna kidika kulninna dutni manah dawak di malnin karak; muih minikunni yakat kaltataihwi, di dukih kalawa muihni yakat, dawak kulninna dutni bahang dutni yayamwi, dawak lā kat yayamwas ki muih pa ūk kaupak aina muihni balna yakat.

³⁰Yang, kidika muihni balna pasyakat muih as walnayang, bahang witing kidika adik sauni ilpni yamna atnin yang muhki tani yakat, kaput laih yang daukalpamtas awaki, kauna yang muih as bik yaktasyang.

³¹Kidika bahang yang kulnik daukalna kidika witingna minitna yakat sihnayang, kaput laih kulnik daukalna kuhni kau bustik imuknayang, kaput witingna dutni yayamna kidika yulni. Yang, Papangyang kat yultayang.’ ”