Read Mayangna Ezequiel 23 Bible Online

Ezequiel 23 - Mayangna bible

Ezequiel 23

²“Ma as kat yayal bu dai, witingna nanang aslah dai.

³Sirarau kaupak al suhlsuhl balna dai; Egipto yakat witingna dadawakat tanina yakat lalaihwa dai, kaput laih witingna yal diyayamna dai.

⁴Barakni kidika laih ayangni Ahola[41] (kidika laih Samaria yakat kalkulna ki), dawak wirahni yal ūk kidika laih Aholiba[42] (kidika laih Jerusalén yak kalkulna ki). Yang yalki balna dunayang dawak walakbis ahal yayal yayakna.

⁵Ahola yang yakat barangni awas dai, Asirio muihni kalbauyang balna yakat kulnin awi duna,

⁶praknina pauni kakana, witingna bitik kidika laih tunan muihni dawak kabamint muihni balna, wawahma kulninna dadasni, witingna aninaras yakat kikilna dai,

⁷¡Asirio muihni balna pasyakat walwi yakna ahalni dai! Ahola, witing kidika balna karak dutni yamna dai, dawak kaput laih daninawan dauh balna yakat bik kulnin awi duna dawakat minit yulna.

⁸Egipto yak sak dai kidika kaupak al suhlsuhl kalna dai, dawak kidika lani sip dawas dana dai. Sirau dai kidika kaupak ahal manas witing karak kalalangna, dawak yal kalyayamna, kaput laih witing al suhlsuhl kalna.

⁹Kidika bahang witing yamni talwa ahalni balna tingnina yakat anayang, Asirio balna, kidika balna yulnina kulnin yak awi duna,

¹⁰dawakat witingna yaklauwi risnipik didisna; usnitkat walanibis ahal dawak yayal kidika bik dakyayakna, dawakat witing yak laih isparah kau ihina, kaput witing lani yayamna. Dawak witing yulni kidika nuhni kulna dai yayal balna pasyakat.

¹¹“Wirahni yal Aholiba kidika balna bitik talna dai, kaput kauna witing bik yamna, wirahni yamna kapat tanit dukih kalawa kidika dawak al suhlsuhl lani kidika.

¹²Witing bik Asirio balna yakat yamni talna, witingna bitik kidika tatuna muihni dai dawak kabamint muihni balna, kalbauyang muihni praknina yamni kakana, aras yakat kikilna, wawahma kulninna dadasni.

¹³Yang amanglanayang witing bik dutni yamna kidika, wirahni yamna kaput witing bik yamna dai kidika.

¹⁴Kauna witing laih baisa tanit yakat naikau kiuna al suhlsuhl lani kidika: Babilon muihni balna wayanina kidika yayamna kat talna, pauni kau kahwi yayamna dai; wayani balna bitik laih tunan muihni balna wayanina dai, kat baninamak sitwa kidika dawak tunanina sisitwa yakat lāih dai.

¹⁵

¹⁶Babilon muihni balna yak talwak kulnin yak dukih dana, kaput laih Babilon yak yul sihna dai;

¹⁷dawak Babilon muihni balna kidika aiwi witing karak kalalangwi dutni yayamna, al suhlsuhl lani kidika kau. Dutni lani kidika minit bayak yayamna dai bahang nawatwakat tiningna dulihna.

¹⁸Kaput laih al suhlsuhl lani kidika lāih muih muhnitna yakat yamna, muihni nuhni kidika asna dis muih yakat niningna kana, kaput bahang yang bik tiking dulihna witing niningyakat sihm sirihni kau kulna yang dai kapat.

¹⁹Kauna al suhlsuhl lani kidika baisa yamna, sirau dai kidika mani balna yakat isningkatwak Egipto kau yamna dai kidika

²⁰Egipto muihni balna yakat witing kulnin yakat kulna, dawakat muihni nuhni al dukih kalawa kidika laih biriku kapat dawak aras almuk kapat.

²¹“Man, Aholiba, kulnam bukna dai sirau man kat pri lani dutaman dai kidika yulni, Egipto muihni balna tama yakat lalaihwa dai.

²²Kidika bahang yang, Papangyang kat yultayang: Yang yamtingkat man ahal dalani talaman balna kidika, warmani talang tamangdulihwa kidika, waihmala balna kakalna karang. Pa bitik yakat man namangkauh sihna awaki

²³Babilon balna, Caldeo balna, Pecod balna, Soa dawak Coa, asirio balna bitik; witingna bitik kidika laih wawahma kulninna dadasni ki, tatuna muihni balna, kabamint muihni balna war muihni;[43] kidi muihni balna bitik kidika laih aras kilyang muihni balna.

²⁴Man namang yak aiwarang, kar mahni duwi dawak kalbauyang muihni balna; pa bitik yakat ma awaih dadakwarang witingna kalbaunin dini duduwa karang, pakninna dini dawak tanitna daknin dini karuk, dawak yang lawik witingna yak diaki lama yamna atnin, kaput laih witingna lanina kat lama yayamna karang.

²⁵Man mamatyakat kulnik daukalna kidika sihting kaiwarang, dawak witingna kidika dutni mayayamna karang; nangmatak dadakna karang dawak tapama bik, buas sangka bang bangkidika isparah kau ihiwarang. Walamabis ahal dawak yayal kidika bik namangyayakwarang, witni kat kuhkau mabusna karang.

²⁶Prakma dudutwarang dawak alahtaman dini balna kidika bik duduwarang.

²⁷Kaput laih yang lawik pri lani kidika dawak, al suhlsuhl man kidika bik dahn yamna awaki, man muihma kidika Egipto muihni balna yakat dianaman dai kidika, kaunah waralaih watta Egipto muihni balna yakat talas awama dawak ismangkattas awama.

²⁸“Papang yang kat adika yultayang: Datingkat nisan balna tingnina yakat bukma, dawak tamangdulihni ditalaman balna yakat.

²⁹Witingna yaklau dutni mayayamna karang, wark alahwa di balna dunaman balna kidika bitik madakyayakna karang, dawak wahdis madadana karang; muihma kidika ahni manah kalna karang al suhlsuhl lani yamna man dai kidika. Pri lani dawak al suhlsuhl lani balna kidika

³⁰yaklauwi kuduh warmani di balna makalahwa kidika, kat kidika nisan balna karak dutni yamnaman dai bahang, dawak kidika nisan balna karang wayani dauh balna yakat mamatyulnaman dai bahang.

³¹Man wirahma amput yamna kaput usnit uinaman.

³²“Yang Papangyang kat adika yultayang: Wirahma dina sunitak yakau man bik dima, sutak nuhni, panuhni, dawak bik kudungni, niningkarinin dawak dauh kaltalnin lani manah buhng kidika,

³³kaput bik daukalna manah buhngki. Kidika kuduh man wirahma yal Samaria sunitak, kidika yakau wasak dauma dawak madalana karangki.

³⁴Bitik dima ki, dawak usnit kat bahta bikis damaki, dawak kidika kau tama yakat kuhrta bisma ki. Yang Papangyang kat yulbaunayang; yang yulki kidika mananayang.

³⁵“Kidika bahang, yang Papangyang kat yultayang: yang adika damatkahnaman, dawak dangmat yakat yalanaman, bahang pri lani kidika wauhnamki, dawak al suhlsuhl lani dutaman kidika bik.”

³⁶Papang yayulna: “Al man kidika, ¿Ahola dawak Aholiba lani yamna kidika yulkih mawi? Kaput kat muhni yakat yakta yulta di dutni balna yamna kidika.

³⁷Witingna yayal kidika bupak yang akat barangni awasdai, witingna tingnina kidika ā manah kalahna. Yang akat barangni awasdai dawan dauh balna yakat minitna yuyulna, dawak kidika ayangni nuhni yamwi walaninabis balna kidika sakripais bubusna kuhkau, witingna walaninabis yang karak yakna dai kidika.

³⁸Baisa minit yakat adika dini yang nikingkauh yayamna: ma as pasyakat yang ūki holi kidika yakat dutni yayamna, dawak yak-urupdinin mani[44] kidika risnipik dis yayamna.

³⁹Walaninabis iwi dawan dauh yakat sakripais bubusna mani kidika yang ūki holi yakat aiwi dutni yayamna. ¡Adika kuduh yang ūki palni yakat yayamna kidika!

⁴⁰“Yul muryang balna kidika sihna dai pa naikau muihni balna yakat isningnapakwak aina atnin, bahang kaput laih witingna aina dai. Witingna yayal bu kidika waskawi dawi miniknapa di ahana dawi alah balna satni kidika alalahna dai, aiwa balna karak kalpakna atnin;

⁴¹payahnin pāni yaksinh yakat yalalahna, dawak tibil yakat di balna lakna ridi, dawakat kidika yakat walapni busnin dini kidika lalakna dai, dawak disala yang diki kidika bik lalana dai.

⁴²Muih mahni sararahwa kidika dakakana dai, alasna duwi; kidika ahalni balna laih kauhmak wanilang kaupak aina dai, bahang witingna kidika yayal balna tingnina yakat ānin dini kidika ahana dawak tunanina yakat kraun kidika papakna dai.

⁴³Yang alas yultik dakanayang: ‘Waralaih kidika ahal suhlsuhl balna dutni yamna manah witna balna kidika yus yayamwarang ki. ¡Witingna yakat manah ki ūk diski![45]

⁴⁴Aiwi, Ahola dawak Aholiba balna yakat, dutni yaklauwi warau diduwa yayalni balna yakat, muih as ahal suhlsuhl balna yakat kiwa kapat.’

⁴⁵Kauna ahal la kat yamyang balna kidika yaklauwi, witingna niningna yakat la yayamwarang, ahal suhlsuhl balna dawak muih iyang balna minitna praisni kat diana karang. Kat yayal marid lani daukalyang balna kidika laih tingnina kidika ā manah ki.”

⁴⁶Papang adika yulwi: “Tawan muihni balna kidika kaluduhwi kidika yayalni balna niningna yakat, dawak muihsak dadauwang kaput bik laih dimamalwang;

⁴⁷tawan muihni balna bitik yaklauwi kipala kau barhwi ihiwang, kaput bik laih isninaparah kau pawi ahllalawang, dawakat walaninabis ahal dawak yayal balna kidika bik ihiwang, ūnina bik bubuswang.

⁴⁸Yang lawik yamtingkat kidika kulnin lani dutni kidika disna karang adika sauni kaupak. Kaput laih yayal balna kidika bitik talwi di lankakalwarang, dawak adika kulnin lani dutni kidika usnit uhuiwas karang.

⁴⁹Dawakat witingna balna bu kidika laih wah duduna karang sinsnina dutni yayamna kidika yulni, dawak dawan dauh yakat minitna yuyulna kidika yulni bik. Dawakat manna amanglatanama yang laih Papangyang.”