Read Mayangna Ezequiel 24 Bible Online

Ezequiel 24 - Mayangna bible

Ezequiel 24

¹Kurih tiaskauarungka laihwi bayakwak, waiku salap bayakwak, ma salap laihwa yakat, Papang yang akat kaiwi yayulna:

²“Man ultah adika mani, wainiku, dawak kurihni bik; kat warmani Babilon kingni yaklauwi Jerusalén niningyakat kalbauna.

³Dawakat adika tawanni niningyakat yul damni as yultang dakakawang. Bahang kidika laih yang yultayang kidika diyulta: ‘Suba as kuh yakat ilta, dawak was utuhta pasyakat;

⁴kidika pasyakat dimuihni atah, barahnimak dawak dangni muihni balna bik atah, dawakat wakalni yayamni balna yaka bik atah.

⁵Usnitkat sīp tanit yamni kidika as laihta, dawak kuh[46] uduhta dinityakat, wakalni balna bitik yamni lahnin yulni.

⁶‘Kat Papang yulwi: ¡Alakaih, tawan nuhni as muih iyang kidika! Kidika laih suba as bubuh laihna kapat ki, dawak bubuh laihna kidika sip kalahwas ki. Man yaktah aslah, aslah, dimuihni dakna balna kidika, kaput laih yakta subani kidika pāni manah dasakma.[47]

⁷Tawanni nuhni adika, ā utuhna manah bunghki; sau yakat utuhwas ki, sau yahamni kidika minit yakat bukna atnin, kauna utuhna kidara di as bik dis kidika minit yakat utuhna.

⁸Āni kidika yang yakat daki, kidara minit yakat, kaput laih minit yakat di as bik bukwas karang, dawak yang kulnik daukalna kidika dahlwak, la barangni yamna karang.

⁹‘Kat Papang yulwi: ¡Alakaih, tawan nuhni muih iyang! Yang lawik kuh as bīki.

¹⁰Man kuh mahni duaita bitang dahlwang, dawak dimuihni kidika lahwang yamni, wasni kidika buhlakwak wakalni balna kidika buswang;

¹¹suba panimanah kidika kuh yakat ilsakta, bras kidika buswi pauni kalwang, dawak maisihni balna kidika buswi disyamwang; ¡dawak bubuh laihna kidika bik dis kalwang!

¹²Kaput kauna, bubuh yamni laihna kidika kuhpau kau bik sip buswak kalahwas ki.[48]

¹³‘Jerusalén, yang man kidika maisihni dis mayaknik kulnayang, maisihni warau maduwa kidika kaupak, kauna maisihnidis alahwas man. Yang kulnik daukalna kidika man mamat yakat kaiwarang manah laih sipki maisihnidis alahwanam.

¹⁴Yang, Papangyang kat yulnayang, bahang kaput karangki. Yang lawik yamki ki, yamtas laih datas awaki ki; minikun talas awaki ki, dawak kulnik bik wirlatas awaki ki. Man dutni yamnaman yulni wah maki ki. Yang, Papangyang kat yultayang.’ ”

¹⁵Papang yang akat kaiwi yayulna:

¹⁶“Yang, bauna aslah karak man dalani talaman muihni kidika madakyakki ki. Kauna kaidinih; mamakwas bik yakwinih.

¹⁷Ap dalani wauhta, dawak wauhtaman kidika lāih yakwinih muih ūk balna yayamwa kapat wanaihnina dadauwak. Tunama kurahta laih lik-atna, dawak kalpas manah bik kiwinih; dawak muhma bik mukwinih dalani wauhtaman kidika yulni, dawak witingna kapatnah yulni plawar busna kakaswa kidika bik kaswinih.”

¹⁸Mapiris niningyakat muih karak yulbaunayang, dawak maulahu yalki kidika dauna dai; dawakat payahwak, Papang yayulna kaput yamnayang dai.

¹⁹Kaput dawak tawan muihni balna yayuyulna: “Lāih yakta maiyultah, ais yulni man kidika kaput yamtaman.”

²⁰Yang diyulnayang: “Papang yang akat kaiwi yayulna:

²¹‘Israel tawanni balna yakat diyulta: Papang adika yulwi: Yang ūki yakat dutni yamki, manna talkih, dawak bik dukih manawa kidika, kaput bik manna manah kapat kaldakamana dawak parasmana kaldakamana yang ūki dutamana yulni; dawak manna walamanabis ahal dawak yayal Jerusalén yakat danamana bangkidika muih yaklauwi ihina karang.

²²Dawak diyulta: Manna yamtanama yang yamnayang kaput: manna muhmana puttas awanama dalani wauhta, dawak kidika yulni plawar busna kakaswa kidika bik kastas awanama.

²³Manna tunama ahni manah yawas awanama, dawak kalpas manah bik yawas awanama. Manna dutni yamnamana yulni parasmana dis kalna karang, dawak biri biri dalani wauhtanama.

²⁴Manna Ezequiel yamna yakat talnama, dawak witing amput yamna kidika bitik manna yamtanama. Kaput kalahwarang kat, manna amanglatanama, yang kuduh Papang.

²⁵‘Dawak waralaih Israel balna parasnina kidika dakyakki, bahang kidika kuduh yang ūki, yaksinh kidika talwi alasna kakalwi, kaput bahang talkih diawi dawak bik dukih diawi. Kaput bik laih walaninabis ahal dawak yayal kidika dakyakna awaki.

²⁶Dawak kidika mani, angdika muihni sipkat kiri yaklawarang kidika yul duwi kiwarang.

²⁷Kidika mani yulbautasman kidika dama, dawak kiri yaklana balna kidika karak yulbauma. Kaput laih tawan talnin as awama, dawak witingna amanglalawarang, yang kuduh Papang.’ ”