Read Mayangna Ezequiel 29 Bible Online

Ezequiel 29 - Mayangna bible

Ezequiel 29

¹Kurih salap laihna kaupak waiku salap laihwak, ma salap minitkau bu laihna yakat, Papang yang akat kaiwi yayulna:

²“Man, muih al, waralaih fero yakat yawah, Egipto kingni yakat, dawak yang ayangki kau yakta witing niningyakat yulta, dawak Egipto niningyakat bik.

³kalyultah: ‘Adika Papang yulwi: Yang man waihmala alahwayang, fero, Egipto kingni, di dutni wayakani nuhni wasma pasyakat tusman kidika, man yultaman: Nilo wasni kidika laih yang, yang yamnayang.[62]

⁴Man nangmatak yakat di rahni duwa kidika kapat kat as āki, dawak bik yamtingkat waspa dini balna kidika kisima yakat bibirwarang. ¡Man wasma kidika kaupak mayakki kisima kau waspa dini birna balna kidika bitik!

⁵Kauhmak wanilang yakat maruhmpamki, wasmapa dini balna bitik karak libittik; di dis ahni manah yakat bukma, dawak muih as bik dis karang malaihwi manuna atnin. Yamtingkat nawah anyang balna kidika makakasna karang, dawak uhu balna bik makakasna karang.

⁶Egipto muihni balna bitik amanglalawarang, yang adika laih Papangyang. Israel muihni balna kidika man yakat ilp wawalna dai, kauna man laih sihm suku kapatman dai:

⁷tingnina kau malalaihna kat, man bahnaman dai, dawak pirinina yakat daknaman dai; witingna kidika man yakat madihunin yayamwakat, man bahnaman dai, dawak yamtang kat bukna dai.[63]

⁸‘Kidika bahang yang Papangyang kat yultayang: Egipto, yamtingkat namangyakat isparah kau makalbabauna karang, dawak tingmalau balna dawak ahalma balna bitik laih ihina karang.

⁹Kauhmak wanilang kalma, dawakat muih balna kidika watwi amangkilalana karang, yang laih Papangyang. Man yulnaman: Nilo kidika laih yang diki, dawak yang yamnayang.

¹⁰Yamni ki, mayultayang yang laih man waihmala yang, dawak wasma murwatus kidika bik. Kauhmak wanilang mayamki, muihsak daunin dini dawak di balna bik diskarang, Migdol kaupak Asuán kat, dawak Etiopía sauni kiwi watwakat.

¹¹Kidika yakat muih dawak tinglau balna bik bayayakwas karang. Kurih muihasluih bu kidika pāni yakat muih as bik yakat yalalahwas karang.

¹²Egipto yang mayamna awaki, sau as di dis pāni; kurih muihasluih bu tawanma nunuhni balna kidika daukakalna karang, dawak muihma balna kidika laih yaktik sau ūk nisan balna pasyakat sihki.

¹³‘Yang, Papangyang kat yultayang: Kurih muihasluih bu bayakwak usnitkat Egipto muihni balna kidika wattik uduhki, pa balna kau ruhwi uina kidika kaupak.

¹⁴Yamtingkat, Egipto muihni silak kau bangkidika pri kalahwi, Egipto sauni wadah niningkau yakat uiwi panina duduna karang, witingna nining panina dai yakat, bahang kidika yakat kaluduhwi king pāni as yayamwarang kauna parasni dis karangki.

¹⁵Kidika kingni lani laih dibin dauh karang ūk balna karak dawakat, dawak watwi yaklauwas karang nisan ūk balna minitna yakat. Dibin kalyamna awaki, sau ūk yakat taihnin-awas yulni;

¹⁶dawak Israel tawanni kidika watwi Egipto yakat kulnin awi duwas karang, bahang adika yaklauwi diyamwak tatalwarang, witingna mistik yayamna dai kidika Egipto yakat uiwi ilp wawalna dai kidika. Kaput laih watwi amangkilalana karang, yang adika laih Papangyang.’ ”

¹⁷Kurih muihasluih minitkau tiaskaubu laihna kaupak waiku tatuna kidika kawak, ma tatuna yakat; Papang yang yakat kiwi yayulna:

¹⁸“Babilon kingni Nebokatnesar, witing kalbauyang ahalni duwa dai kidika sihwak uina Tiro nining yakat kalbauna atnin; witingna tunanina bitik tulupna, dawak pul manah duwi salahnina kidika, kauna witing dawak kalbauyang ahalni balna bik kidika Tiro niningyakat yaklalauwa kaupak di as bik yayakwas ki.

¹⁹Kidika bahang, yang, Papangyang kat yultayang: Yamtingkat Nebokatnesar kidika Egipto yakat kawi duwarang, dawak ritsni balna duwa kidika bitik laih dakyakna karang, bahang malwa kidika kau sipkarang kalbauyang muihni balna duwa kidika minitnalauna atnin.

²⁰Yamtingkat, Nebokatnesar witing Egipto yakat kawi duwarang, Tiro niningkauh yaklauna dai kidika minit duna atnin, kat yang warkki yamna bahang. Yang Papangyang kat yultayang.

²¹“Kidika mani balna yakat yamtingkat Israel parasni kidika nuhni kalna karang, dawakat man, Ezequiel, sip atnam lāih yulkalbauna atnin. Kaput laih watwi amangkilalawarang, yang adika laih Papangyang.”