Read Mayangna Ezequiel 31 Bible Online

Ezequiel 31 - Mayangna bible

Ezequiel 31

¹Kurih salap minitkau as laihwak kaupak waiku salap minitkau arungka laihna kaupak ma as laihwa yakat, Papang, yang akat kiwi yayulna:

²“Egipto kingni fero yakat kalyulta, dawak muih as balna yakat bitik: ‘¿Man nuhniman kidika ais karak libitnin sipyah?

³Ciprés[64] panan as kapat man, kidika awaskat Líbano suhunni kapat, tingni rahni nunuhni duwa kidika kau asangpas yakat sanni duwi, bahang witing laih naini ki, mukus kat kilwi kawi.

⁴Waslauwa kidika dawak sau suihni duwa kidika yaklauwi kalawak barakna; dahna yaihnitkau kidika bitik laih was murwa bang bangdai; kidika wasni kau pan balna bitik yakat utuhna dai.

⁵Was kidika manas duwa bahang, pan ūk balna karak tanit barakna dai; rahni balna kidika manas kalahna dai dawak panuhni bik kalnadai.

⁶Uhbinina satni balna kidika rahni yakat ūnina yayamna dai; dawakat asangpas dini balna satni bik kidika panan dinit yakat binina yayakwadai. Kidika panan dinit sanni yakat sipdai nisan balna mahni yalahna atnin.

⁷Pan as tanit yamnidai, dawak nuhni palni dai, tingni rahni bik nanaini dai, rikni balna kidika was manas yakat kawi kiunadai.

⁸Papang dinipulu dahna pāni yakat suhun as bik sip kal-libibitwasdai witing karak; awas panan as bik kidika rahni duwa kapat disdai, castaño bik kidika basni duwa kapat disdai; Papang dinipulu dahna pasyakat pan as bik disdai, kidika pana yaksihni kapat.

⁹Yang lawik yaksihni yamnayang, dawak tingnirahni manas; Papang dinipulu dahna pāni kau pan balna kidika kaltutumna.

¹⁰‘Yamniki, bahang adika Papang yulwi: Kidika panan laih naini kalnadai, bahang sutni kidika mukus kat kilwi kanadai; uba nuhni palni barakna bahang, witing manah kapat kaldakanin kidika kulnin yakat bahngna dai.

¹¹Kidika bahang yang lawik ruhmtik dapamnayang, datingkat sau ūk tunan muihni tingni yakat bukna karang, bahang dutni kalyamna karang, witing amput dutni yamna kaput.

¹²Pa ūk muihni tanit dudutni balna kidika yaklauwi dakwi dawi dapapamna karang; tingni balna kidika bahwi bubukna karang asangpas bitik yakat, langni balna yakat, was wakarhni balna yakat, dawak tawan balna bitik kidika panan dinit yakat yalalahwadai kidika dawi kikirana karang.

¹³Uhbinina satni balna bitik panan bukna tusyakat aiwi kilwi panina duduna karang, dawak tinglau balna satni bitik tingni rahni yakat kikilwarang.

¹⁴Dawak pan as bik waskung yakat sakkarang bik sip kidika panan dai kapat barakwas karang, was yamni utuhna karang bik sip naini mukus kat kilwas karang, naini kaput maluihni kilwas karang. Bitik laih daunin yakat diwirlana karang sau dinit yakat yaklakwi uina karang, sau kau dauna balna karak kalpakna atninna.

¹⁵‘Yang, Papangyang kat yultayang, panan kidika dauna balna panina yakat kawi kiwarang kat, yamtingkat kulnin bukna kau kuma tuhni kidika buhlana karang; was murwa balna kidika bik laihwatki; kidika yulni Líbano kidika kulnin bukna kidika kalmuklakna karang, dawak kaput bik pan balna kidika bitik laih kusulalana karang.

¹⁶Yang lawik yamtingkat, daunin pāni yakat yaklakkiwarang kat dauna balna karak kalpakna atnin, bukwak parasni yulwarang kidika nisan balna bitik diyukna karang. Kidika pāni sau dinitkau kidika Edén pāni kau pan balna kidika walaniānin as dakakawarang, pan kau nuhni yamni was bik yamni utuhna kidika Líbano asangni yakat.

¹⁷Witingna bik kidika yakat yaklak'kiwarang, daunin pāni yakat, kalbauwi dadauna balna karak kalpakna atnin. Sanni yakat yalalahwa balna dai kidika laih kalruruhna karang nisan balna pasyakat.

¹⁸Edén kau pan balna bangkidika as bik sip kallibibitwasdai kidika panan yaringni dawak naini dai kidika; dawak kaput kauna, Edén panan balna karak kalpakwi sau dinit yakat yaklakwi uiwarang, Papang yakat amanglalawas balna karak kalpakwi yalalahwarang, muih balna war yakat kalbauwi dadauna balna kidika. ‘Panan kidika laih fero dawak muihni balna bitik. Yang, Papangyang kat yultayang.’ ”