Read Mayangna Ezequiel 32 Bible Online

Ezequiel 32 - Mayangna bible

Ezequiel 32

¹Kurih salap minitkau bu laihna kaupak waiku salap minitkau bu laihwak ma as yakat, Papang yang akat kaiwi yayulna:

²“Dauna laniwana adika unbautah fero Egipto kingni yakat: ‘Nisan balna layannina as kapat man; kuma paskau di as wayakani dutni kapat man, wasma yakat tumtaman, kalma kau was kidika buhuttaman, dawak was parasni kidika kalatang purwi.

³‘Adika Papang yulwi: Tawan mahni pasyakat awama bik, yang laihnik dini dutayang kidika mamat yakat ruhmki, kidika kau malaihki.

⁴Sau yakat malaktik mamurki, dawak kaput sau yakat madatuski. Yamting kat uhu balna bitik mamatyakat kilwi ma-atatakwarang, dawakat man muihma kidika asangpas dini anyang balna makakasna karang.

⁵Man muihma dutlana kidika kau, asangpas balna dawak langni balna bitik yakat buhngdaki.

⁶Man āma kau sau kidika bitik suihki, bahang kidika laih asangpas balna kat kiuna karang, bahang kidika kau was tani balna kidika banghna karang.

⁷Yang, man yakat madaukalpamki kat, yamtingkat makau kisang kidika puksani kalna karang, yala balna bik pina karang; dawak ma kidika mukus kau puhta awaki, dawak waiku kidika baisa yaringni yakwas karang.

⁸Man yulma makau kisang kau yaringwa balna kidika bitik pina awaki, dawak man sauma kidika puksani manah kalna karang. Yang, Papangyang kat yultayang.

⁹‘Man daukalnaman yulni kidika sau balna talasman pāni dai yakat kiwikawakat, yang yamtingkat, kidika tawanni manas witingna isningna abalhwarang.

¹⁰Man yulma, tawan manas muihsak iki; king balna manas muihsak dadauwarang yang iskiparah kidika yaktik witingna niningna yakat wauhtingkat. Man buktangkat, witingna yamaduduwak diyukwarang sangninaka yulni.

¹¹‘Papang yulwi: Babilon kingni isniparah kidika man mamatyakat bukna karang.

¹²Yamtingkat man tawanma mahni kidika, kalbauyang balna tanit dudutni balna isninaparah kau didakna karang. Egipto nuhni kaldakawa kidika yakat kiu'watna karang, dawak tawanni mahni kidika dahnkalna karang.

¹³Turuh balna mahni wasma yakat didiwa kidika bitik imukki, watbik muih karangpa dawak tinglau karangpa kalnina kau atakwi buhuhutwas karang.

¹⁴Kaput laih yamtingkat wasni kidika sangni kalwarang yamni sihm disala kapat. Yang Papangyang kat yultayang.

¹⁵Egipto kidika kauhmak wanilang yamtik sauni kidika di dis pāni manah yamki muih as bik dis, kaput dawak watwi amangkilalawarang, yang adika Papangyang.’

¹⁶“Adika laih dauna laniwana as ki, bahang kaput unbabauna karang yayal balna kidika, nisan balna satni manas pasyakat kakaidinih kukulwarang kat Egipto yulni, dawak muihni balna yulnina bik. Yang, Papangyang kat yultayang.”

¹⁷Kurih salap minitkau bu, kaupak waiku 12[65] laihna kaupak, ma salap minitkau singka laihwakat, Papang yang akat kaiwi yayulna:

¹⁸“Man muih al, nisan balna satni paskau yayal balna yakarak kalpakta dauna laniwana kidika unbautanauh, Egipto tawanni mahni balna yulnina, dawak tanituna balna[66] yulnina bik: ‘Parasni nuhni duyang balna kidika sau dinit yakat bubukwi, uman sau-ū yakat yaklalakna balna karak kalpakwi.

¹⁹¿Man kidika kau tanit nuhni yamniman katpah ūk balna karak dawak? Lakwa yawa alangwah, man bik, Papang yakat tatalwas muihni balna karak.’

²⁰“Witingna kidika bubukna karang war kau dadauwa balna yakarak. Isparah kidika laih ridi ki. Witingna karak muih mahni laih kalpakwi uina karang.[67]

²¹Tunan muihni balna tanit parasnina nuhni kidika egipto muihni balna kidika dauna balna pāni yakat duduna karang, dawak witing karak aslah kalpapakna dai kidika balna bik, bahang aput yuyulwarang: ‘¡Uman aiwi yaklalakna! ¡Papang yakat tatalwas muihni balna war yakat dadauna kidika uman kalalangna!’

²²“Asiria yakat sakki, kalbauyang muihni balna duwa kidika bitik witing sauni-ū yakat awaihdak duduwi. Bitik laih war kau dadauna.

²³Pa kudungni tanit tuhni yakat nununa. Dawak kalbauyang muihni balna kidika bilnina-lalauna muih balna baisa dauwas sangka bangyakat, kauna kidika balna uman dadauna war yakat, bahang waralaih Asiria sauni-ū yaihnit yakat awaih bangki.

²⁴“Elam yakat sakki, kalbauyang muihni duwa bitik kidika, sauni-ū yakat awaihdak ki. Witingna bitik laih war kau dadauna, Papang tatalwas balna sau dinit yakat kawi uina kidika. Sangka balna yakat bilnina-lalauna, kauna waradika laih sau-ū yakat yaklakwi uina.

²⁵Elam laih kalangna tuski, kalbauyang balna duwa dai kidika bitik dadauna papusyakat, kidika balna bitik laih Papang yakat tatalwas balna dai war kau dadauna kidika, waradika laih sauni ū minit yakat awaihdak duduwi. Dadauwas sangka balna yakat bilnina-lalauna dai, kauna waradika laih sau ū yakat bangki. Muih iyang balna pasyakat wawatna.

²⁶“Kidika yakat bangki Mesec dawak Tubal, kalbauyang muihni balna bitik sauni ū yakat awaihdak duduwi, Kidika balna bitik Papang yakat tatalwas balna kidika war kau dadauna, dadauwas sangka balna yakat bilnina-lalauna.

²⁷Tanit mani kau[68] dadauna balna karak nunuwaski, witingna kalbabauwa dini balna kidika tingnina yakat duwinah daunin pāni yakat yaklakwi uina kidika, witingna isninaparah kidika laih tunanina dinit yakat ahana, dawak nanitna daknin[69] kidika laih minitna yakat ihilna, sangka balna yakat bilnina-lalauna usnitkat.

²⁸“Egipto, man yakat sak-awama, Papang yakat tatalwas balna pasningna yakat, tuswi dakwi dawi war kau dadauna balna yakarak nununa kidika.

²⁹“Edom yakat sakki, kingni balna dawak kabamintni balna karak. Witing kidika parasni nuhni dai kauna, war kau dadauna balna pasyakat sakki, Papang tatalwas balna pasningna yakat sakki, dawak sau ū yakat yaklakwi uina.

³⁰“Yakat bangki, tingpal niningkauh tunan muihni balna dai kidika, Sidón muihni balna bik sihm bangki. Witingna parasnina nuhni duduwadai, dawak muih balna yakat uba bilnina-lalauna dai, kauna waradika laih war kau dadauna balna yakarak sau yakat kakana, risninapik dis. witingna laih Papang kidika tatalwas ki, risninapik dis nununa war kau dadauna balna karak, dawak sau-ū yakat awi uina.

³¹“Fero talwarang kat, witing muihni balna bitik dadauna kidika yulni walaniāna as karang, kat witing, dawak kalbauyang muihni balna duwa dai kidika bitik laih dadauna war yakat. Yang Papangyang kat yultayang.

³²Fero kidika muih sangka balna yakat bilninalauna, kidika bahang Papang yakat tatalwas balna karak nununa, war kau dadauna balna pasyakat, witing ahalni war kalbauyang balna karak. Yang Papangyang kat yultayang.”