Read Mayangna Ezequiel 33 Bible Online

Ezequiel 33 - Mayangna bible

Ezequiel 33

¹Papang, yang akat kaiwi yayulna:

²“Man, muih al, wanaihma balna yakat yuldibauta aput diyultah: ‘Yang lawik war sihtayang sau as yakat, bahang kidika sauni muihni balna laih muih as yakwi sisihwi mayakat kilwi maintalna atnin.

³Makau kilwi maintalwasak kidika talwak waihla balna kidika aiwi uliswakat, trumpit kidika puhwi, muih balna yakat baisa kau isningna pakwi.

⁴Muih as kat trumpit puhwa kidika dakawi kulwas dawarangkat, dauwarang kidika laih witing alas dutni yakat kiuna karang,

⁵kat trumpit puhwak dakana kauna, witing, yakat kulwas danadai bahang; kidika laih witing alas yul dakawas dana, kauna kidika yakat dakana dai katlaih, sangnika laihwi yakwitdai.

⁶Kauna makau kilwi maintalyang kidika waihla kiwi kawak bik trumpit kidika puhwi muih balna yakat isningnapakwas kat, waihla balna kidika uiwi kawi muih ihina kat, kidika laih witing alas dutni kidika yulni dauna, kauna yang lawik makau kilwi maintalwa yakat minit kalyulna awaki muih dauna kidika yulni.’

⁷“Kat, man, muih al, makau kilwi maintalwa kapat mahanayang Israel tawanni pasyakat. Man, yang yulki balna kidika duta, muih balna yakat isningna paknamki.

⁸Sipki, yang muih dutni yamyang as niningyakat lani yamtik daunin yakat yakna awaki, dawak man kidika muihni yakat yulkalbautas awamakat kulnin wirlanin, dawak witing bik yamwas karangkat, kidika muihni dutni yamyang kidika witing alas dutni yakat dauna karang, kauna yang lawik man yakat minit yulna awaki dauna kidika yulni.

⁹Nawatwak, man lawa isningpakma muih dutni yamyang yakat, witing kulnin wirlana atnin, kauna witing yamwas karangkat, witing alas dutni yakat dauna karang, kauna man sangmaka laih laihta yakna awama.

¹⁰“Man, muih al, Israel tawanni yakat kalyulta: ‘Manna yultamana: Mayang dutni kidika trukdi. Kidika bahang sangka mayang yakauna dutladi. ¿Mayang amput dadi sangka atninyah?

¹¹Kauna, yang Papang, ayangki kau yaktik yultayang, yang dukihyawas ki muih dutni kidika dauna atnin, kauna yultayang, dutni yamwa kidika kaupak dawi sangka kawang. Israel, man sangmaka dutni yakat duyawaman kidika datah. ¿Man aisyamta daumayah?’

¹²“Man, muih al, manna pa aslah mana muihni balna yakat diyulta: ‘Muih yamni as dutni yamwarangkat, tatuna kau witing isning yamni duwa balna dai kidika yaklauwi laihwi yakwas karang, dawak muih dutni as dutni yamwa kidika dawarangkat, witing tatuna kau dutni yamna balna dai kidika yulni laih dauwas karang ki. Muih yamni as dutni yamwarangkat, tatuna kau yamni balna yamna dai kidika yaklauwi sangnika kalawas karangki ban sangka atnin.

¹³Yang lawik muih al yamni as kau sangnika kalaki, dawak adika alni witing kulnin yamni duwadai kidika yakat kulwi, witing dutni yamwarangkat, yang lawik witing yamni balna yamna dai kidika as bik talas awaki, kaput laih witing dutni yamna kidika yulni dauna karang.

¹⁴Dawak muih dutni as daunin yakki, dawak adika muihni dutni yamwa kidika dawi yamni yamwarangkat, dawak bik la kat yamwarangkat,

¹⁵dawak di wayaki dunaman dai kidika watwi daniwan balna yakat dukiwi diawarang kat kaput bik sangnika kalawa lani balna yakat yamwarang, dawak kaput bik watwi dutni yamwas karang kat, rahm kidika laih witing sangka dawak bik dauwas karang.

¹⁶Kat waralaih witing kidika yamni yamwa bahang, dawak bik la kat yamwa bahang witing dutni yamna balna kidika wattik yang kulnik yakat dutas awaki.’

¹⁷Manna pa aslah mana muihni balna kidika yaklauwi yuyulwarang yang la kat yamtasyang; kauna di rahm kidika laih witingna laihtak la kat yayamwas ki.

¹⁸Muih al yamni kidika, yamni balna yamwa kidika dawi, dutni kauh yamwarangkat, witing yamwa kidika yulni dauwarang.

¹⁹Dawakat muih dutni kidika, dutni balna yamwa kidika dawi di yamni dawak la kat kidika yamwarang kat, kidika yulni witing sangka karang.

²⁰Manna muhnilau dai kaput watta yultamana: ‘Papang laih la kat yamwas ki.’ Kauna yang lawik manna lamana yamki, Israel balna, manna warkmana amput yamna mana kidika kat.”

²¹Kurih salap minitkau bu laihwi bayakna, pa ūk yakat yanaduwi kiuna kurihni, dawak waiku salap laihwi bayakwak ma singka laihwa yakat, Jerusalén kaupak kalahwi kirana dai kidika kaiwi yang akat yayulna, tawan nuhni dai kidika waihla tingni yakat bukna.

²²Kalahwi kirana kidika kaiwi kawas tanit kau puknita yakat, Papang witing tingni kidika yang mikit yakat yuna dai; dawak payahlawak mapiris niningkauh kiwi kanadai, al kidika kiwi kawak, Papang kidika watwi yang tuki kidika yana dai yulbauna atnin, dawak kaput laih ban tubi awasyangdai.

²³Papang, yang akat kaiwi yayulna:

²⁴“Muih balna Israel tawanni nunuhni yakat yalalahwadai kidika, bitik laih daukakalna atwi: ‘Abraham laih aslah dai, kaput kauna, witing kidika sauni bitik laih witing dini kalnadai; mayang laih mahni mayang baisa marahmki dudi adika sauni mayang madiki kalna atnin.’

²⁵Kidika bahang diyulta: ‘Papang aput yulwi: manna di muihni kidika ānimahn kat kastamana, dawan dauh yakat mamatna yultamana, muih itamana, ¿bahang manna kultamana laih, adika sauni manna dutanama kultamanah?

²⁶Manna kalbaunin manah kultamana, yang di dutni talayang kidika yamtamana, manna bitik laih muih ūk balna karak kalduta payahtamana, ¿bahang manna adika sauni dutanama kultamanah?’

²⁷“Dawak adika bik diyulta: ‘Papang aput yulwi: Yang sangkika kau yaktik yultayang, tawan nunuhni balna daukalna paskau yalalahwa balna kidika bik muih yaklauwi ihina karang, dawak asangpas kau yalalahwa balna kidika laih yamtingkat di anyang balna kakasna karang, dawak kipala nunuhni walsah yakat yalalahwa balna, dawak pa sulihni paskau yalalahwa balna kidika bik siknis kau diating dadauna karang.

²⁸Sauni kidika laih kauhmak wanilang yamki, daukalpamki, kaput bik parasni nuhni duwi witing manah kapat kaldakawa kidika bik daukalpamki. Israel asangni balna kidika kauhmak wanilang yamna awaki, muih as bik witingna yulnina kidika pāni munah bayayakwas karang.

²⁹Witingna saunina kidika yang lawik daukalpamtik kauhmak wanilang yamki kat, witingna dutni yayamna kidika yulni, watwi amangkilalana karang, yang adika laih Papangyang.’

³⁰“Manna pa aslahmana muihni mana kidika, daklana yaihnit yakat man yulma babauwi, dawak kaput bik durkung balna yakat kalpakwi biri biri yuyulwi: ‘Aiwanang mawi dakadanang Papang kaupak ais yulni sihna pa.’

³¹Dawak kaput laih yang tawanki kidika aiwi man muhmat yakat yalalahwi, witingna nining yayamwa kaput, man yulma kidika dakana atnin. Kauna witingna man yultaman yakat laih yayamwas ki. Dawak witingna wat wat lamwi yuyulwi sihm muih as kau yaksinh talwi lawana unbauwa kapat, kauna witingna isningna kidika laih lalah yakat usnit uhuiwi.

³²Witingna yaklauwi man yakat makukulwi, muih as kat lawana dauh guitarra kau paswi unbauwi, dawak dinit bik yamni muihni unbauyang as kapat makukulwi. Man yulma balna kidika dakakawi kauna, yultaman kaput laih yayamwas ki.

³³Kaput kauna, yultaman balna bitik laih kidika yakat kalahwarang ki; dawak yulnaman yakat kalahwakat, witingna amanglalana karang witingna pasningna yakat prapit as sakdai.”