Read Mayangna Ezequiel 35 Bible Online

Ezequiel 35 - Mayangna bible

Ezequiel 35

¹Papang yang akat kaiwi yayulna:

²“Seir asangni yakat nawatta yawah, dawak yang ayangki kau duta witing nining yakat yulta.

³Dawak kalyulta: ‘Adika Papang yulwi: Yultayang, yang laih man waihmalayang, Seir asangni, wah mana awaki kauhmak wanilang mayamki dawak madaukalpamki.

⁴Man tawanma nunuhni balna kidika bitik daukalna awaki, dawak man laih walang kauhnimak kalna awama. Kaput dawak watta amangkilana awama, yang adika Papangyang.

⁵‘Man laih Israel balna waihninala ban man kaput, dawak man lawa war diyamnaman dai witingna kidika dutni yayamna yulni wah duduwa mani balna dai yakat.

⁶Kauna yang Papangyang kat, yang sangkika kau yaktik yultayang, daunin yakat mahaki, dawak daunin kidika yaklauwi mauiwarang. Man dutni yamnaman[73] kidika laih dauinin dini daunin, bahang daunin kidika yaklauwi mauina karang.

⁷Kauhmak wanilang mayamtik madaukalpamki, Seir asangni, dawakat datingkat muih as bik bayayakwas karang man munah.

⁸Yamki, man asangmana balna, sauma langni balna, wasma balna, kidika bitik muih dadauna manah bahnghlwarang war kau dadauwa kidika.

⁹Kauhmak wanilang mayamki ki ban kaput atnin, dawak muih as bik man tawanma nunuhni balna yakat yalalahwas karang. Kaput dawak amanglalawarang yang adika Papangyang.

¹⁰‘Man yulnaman: Israel sauni kidika yang diki kalna karang; yang witing daniwan awaki, Papang kidika pasyakat yalahwakarang bik.

¹¹Kauna, yang Papang, yang sangkika kau yaktik yultayang, sihm kulnin daukalna dutaman kidika kau mayamki ki, tumnin lani dutaman dawak waihla talnin lani dutaman kidika Israel yakat, sihm kaput mayamna awaki. Yang wah maki yakat, witingna amangkilalawarang.

¹²Kaput dawak man talma, yang Papangyang, man Israel asangni balna yakat dutni yulnaman balna dai kidika bitik dakanayang. Man yulnaman: ¡Adika laih kauhmak wanilang as ki; waralaih sipki mayang malawi kasna atnin!

¹³Tampas wakahta niking kauh lawanaman, dawak tuma kidika yang nikingkauh yulna. Dawak yang dakanayang.

¹⁴‘Yang Papangyang kat adika yulni yultayang: Sau bitik alasna kalahwarang yang madaukalpamting kat.

¹⁵Man alasna dunaman dai, Israel witing sauni duna dai kidika daukalwakat, bahang sihm man bik kaput makalahna karang: man kidika kauhmak wanilang as kalma, Seir asangni, yuldarang kat Edom sauni. Kaput dawak amangkilatanama, yang adika laih Papangyang.’