Read Mayangna Ezequiel 36 Bible Online

Ezequiel 36 - Mayangna bible

Ezequiel 36

¹“Dawak man, muih al, yulbauta yang ayangki kau Israel asangni balna yakat, diyulta yang yulki dakakawang.

²Yang, Papangyang kat yultayang: Israel waihnila balna kidika kukulwi asang umani balna kidika witingna dinina,

³yamniki, bahang yang ayangki kau yakta diyulta aput: ‘Papang adika yulwi: Pa bitik kau manna yakat manakalbabauwi, dawak manadaukakalwi; sau ūk muihni balna kidika man yakat manalaihwi duduna, dawak muih balna kidika sarahni di dauh kapat manakukulwi.

⁴Kaput bahang, Israel asangni balna, Papang yulni kidika dakanauh asang balna yakat, asang ububulni balna yakat, was murwa balna yakat, sau langni balna yakat; pa daukalna muih dis balna yakat, dawak Israel tawanni nunuhni balna muih dis balna yakat bik, kidika laih yaihnitkau tawan ūk balna yaklauwi dinina dakyakwi duduna, dawak sarahni ditatalwa kidika.

⁵Papang adika yulwi: yang yulki balna kidika kulnik daukalna yulni balna bahang dahlwi kiwi tawan ūk balna niningna yakat, dawak tanit kidika laih Edom yakat, kat alasna nuhni karang sauki kidika duduna, dawak dauh talnin lani kidika tuhni palni karuk dini balna asangpas kau kidika laihwi duduna.’

⁶“Yang ayangki kau yakta yulta, Israel sauni yulni, dawak diyulta: ‘Papang adika yulwi, asang balna yakat, asang ububulni balna yakat, was murwa balna yakat, dawak sau langni balna yakat bik: Yang anna yulni dutayang, manna nisan ūk balna yaklauwi manauhusna kidika yulni.

⁷Kidika bahang, yang ayangni kau yaktik yultayang, manna yaihmatna kau tawan balna kidika asalnina kalahna karang.

⁸Kauna manna, Israel asangni balna, pan nunuhni manah kalna karang dawak minik bik manas yakna karang yang tawanki Israel dini karang, kat witingna kidika nawatwi ainin manah bahang.

⁹Yang lawik tanitdakki, dawak yamtingkat di dadahna karang.

¹⁰Yamtingkat, Israel muihni balna yakat yalalahwa kidika mahni kalna karang. Dawak tawan nuhni balna kidika muih manah buhngdana karang, kaput bik daukalna balna kidika watwi laihwi yayamna karang.

¹¹Yamtingkat manna kidika, muih dawak tinglau balna bik mahni kalna karang. Muih mahni kalna karang muhnilau dai kapat, dawak manna tanit yamni awanama muhnilau dai karak dawakat. Kaput dawak amanglalawarang yang laih Papangyang.

¹²Yamtingkat tawanki kidika manna mamatna munah lapapakna karang, Israel asangni balna, dawak witingna balna kidika manna dimana kidika kawi panina duduna karang, dawak manna kidika watwi walamanabis dis laih dadawas karang ki.

¹³‘Yang, Papangyang kat yultayang: Manna yakat, asang mana kidika, yulmana yayakwi muih kastamana, dawak tawan kidika walanibis dis yamtamana.

¹⁴Yamniki, manna watta muih yakat kastas awanama, dawak walaninabis dis laih datas awanama tawan kidika. Yang Papangyang kat yultayang.

¹⁵Datingkat watwi dakakawas karang, nisan balna kidika muih usna atnin; dawak kidika tawanni balna kaupak muih usnin lani kidika dis karang, kat manna kidika watwi walamanabis dis manadadawas karangki tawanmana balna yakat. Yang, Papangyang kat yultayang.’ ”

¹⁶Papang yang akat kaiwi yayulna:

¹⁷“Israel balna kidika witingna saunina yakat yalalahwa kat witingna dutni yayamna dai, tingnina warkni kau. Witingna yalalahwa lani balna kidika yang nikingyakat maisihni dutni dai.

¹⁸Kaput laih yang kulnik daukalna kidika witingna minitna yakat kalting kiunadai, kidika sauni yakat muih ihina kidika yulni, dawak bik amput wayani dauh balna yakat minitna yuyulna kidika bik,

¹⁹witingna dutni yayamna kidika yulni sau dawak nisan ūk balna pasyakat sihnayang dai.

²⁰Kaunah witingna tawan balna yakat uiwi kakana balna yakat ayangki holi yakat dutni yayamna, muih balna kidika yuyulna: ‘Adika Papang tawanni, kauna witingna saunina kaupak dawi kalahnin dai.’

²¹Kaput laih yang dalani dunayang, kat Israel dutni yamwak kaupak, yang ayangki holi kidika dutni yuyulna dai, nisan balna bitik yakat uiwi kakana dai yakat.

²²“Kidika bahang, Israel tawanni yakat kalyulta: ‘Adika Papang yulwi: Yang yamna awaki, kauna manna yulmana laih awaski, Israel balna, kauna yang ayangki holi kidika yulni yamki ki, kat manna lawa dutni yulnamana, nisan balna pasyakat yawanamana dai yakat.

²³Yang nisan balna yakat niningnakana awaki ayangki nuhni maisihnidis kat manna lawa dutni yulnamana kidika, yang yamki kat, witingna amanglalana yang adika Papangyang. Yang Papangyang kat yultayang.

²⁴Yang lawik kidika nisan balna paskaupak manayakki; manauduhki dawak wattik saumana yakat manaduaiki.

²⁵Was yamki kidika kau masuhki, dawak maisihni dutamana kidika bitik dis yamna awaki, dawan dauh balna yakat laihnamana kidika yulni klin manayakki;

²⁶dawak manna yakat isning wisam dawak spirit bik wisam āna awaki. Manna ismangna dadasni kipala kapat dutamana kidika yakki, dawak isning yudutni as āki.

²⁷Manna yakat yang spiritki kidika āki, dawak yamtingkat laki balna yakat yamtanama;

²⁸Witingna yalalahna karang, pa as muihnina bararak balna kau dianayang pāni yakat, dawak witingna kidika yang tawanki muihni balna karang dawak yang laih witingna Papangnina awaki.

²⁹Witingna yakat sani dilaihwa bitik kidika yang lawik dilaihtik yakki. Yamtingkat plawar minik kidika manas kalahna karang, dawak wattik yuh sihtas awaki.

³⁰Yamtingkat pan balna kidika minik mahni yayakna karang, dawak sau bik minik baisa yakna karang, dawak kaput laih manna kidika watta nisan balna niningna yakat asalmana yaktas awanama yuh yulni.

³¹Dawak witingna dutni yayamna kidika isningna aiwarangkat asalni kukulwarang manna yulmana dutni yamnamana yulni.

³²Yang, Papangyang kat yultayang: Israel balna dakanauh, yang yamtayang kidika manna yakat kaput manayamnin dai bahang tanka laih awaski; asalni dakanauh dawak bik amanglatas kapat bik awanauh dutni yamnamana yulni.

³³‘Yang, Papangyang kat yultayang. Manna dutmana kaupak klin manayakki kat, yamtingkat tawanmana nunuhni balna yakat yalahdanama dawak daukalna balna kidika laihta yamtanama.

³⁴Sau muih dis watna dai kidika, ban kaput kauhmak wanilang kalnin dai kauna kidika yakat di dadahna karang muih balna bayayakwa muhnina yakat.

³⁵Dawak yuyulwarang: Adika sauni muih dis kalna dai kidika, waradika laih Edén sauni kapat kalna; tawan nunuhni balna daukakalna dai kidika waradika laih ū pararasni kakalna dawakat kidika yakat muih yalalahwi.

³⁶Kaput laih, yaihnitkau tawan balna kidika tatalwarang yang adika laih Papangyang, bahang daukalna balna kidika wattik laihtik yamtayang, dawak buswi bayakkiuna dai kidika yakat wattik dahtayang. Yang, Dawan yang, kat yultayang, bahang kaput laih yamna awaki.

³⁷‘Yang, Papangyang kat yultayang: Baisa di as yamki ki. Israel tawanni kidika yang akat di as yayulwarang kat yamna atnik, yang yamtik kalana awaki; muihni balna kidika mahni kalna karang sihm tinglau balna kapat.

³⁸Tawan nunuhni daukalna balna kidika yakat muih mahni banghna karang, taldas laih sihm sīp balna sakripais busna Jerusalén yakat duwi uiwa kapat karang. Kaput laih yang adika amangkilalana karang Papangyang.’ ”