Read Mayangna Ezequiel 37 Bible Online

Ezequiel 37 - Mayangna bible

Ezequiel 37

¹Papang tingni kidika yang mikit yakat yuna, dawakat yamwak witing parasni kidika yabuhngdana, dawakat langni as kat muih wakalni manah yakat yaduwi kiuna.

²Dawak Papang yaklauwi yamwak bitik awaihtik talnayang; wakal balna kidika sangni kidika bitik bunghdai, mahni palni dai, dawak wakalni balna kidika yamni buhlalana dai.

³Kaput laih yayulna: “¿Man sip kultaman wakal balna kidika watwi sangninaka duduwarang?” Yang lawik nangnitlana yang: “Papang, kidika laih man manah amanglataman.”

⁴Kaput laih Papang yaklauwi yayulna: “Yang ayangki kau yakta wakal balna yakat diyultang aput: ‘Wakal buhlana, dakanauh adika Papang yulni kidika.

⁵Papang yaklauwi manayulwi: Yamtingkat manna sangmanaka dutanama, kaput laih watta sangka kalna atnamna.

⁶Wakalmana salauhni kidika ātik manaki, dawak muihmana bik atik manaki, umanatak, dawak sangmanaka manaki sangka kalnamna yulni. Kaput dawak manna amangkilatanama, yang adika Papangyang.’ ”

⁷Yang yulbaunayang, witing yaklauwi yapakna kaput. Dawak yang yulbautasakyang kat, di as dakanayang: kidika laih sau isihna, dawak wakal balna kidika mahka kal-libibitna.

⁸Dawak talnayang, witingna minitna yakat wakalni salauhni balna dawak muihni unitak balna bik aiwi kalalahwakat. Kaunah sangninaka laih disdai.

⁹Kaput laih Papang yaklauwi yayulna: “Yang ayangki kau yakta yulta sangnika yakat, dawak aput yulta: ‘Papang aput yulwi: sangnika man kidika, aiwah sau sutni arungkapak, dawak sangnika diata adika muihni dauna balna sangninaka dis balna yakat.’ ”

¹⁰Yang, Papang ayangni kau yulnayang, witing yaklauwi yapakna kaput, dawak sangnika kidika kaiwi witingna yakat kana, dawak witingna sangka kalwi kalnina kau yaklalauna. Mahni palni dai, kalbauyang balna kaluduhna nuhni as kalnadai.

¹¹Kaput dawak Papang yaklauwi yayulna: “Israel tawanni kidika laih sihm kidika wakal balna kapat ki. Witing yuyulwi: ‘wakal balna buhlalana, tahnin as bik dudaski, bahang disnamayang.’

¹²Yamniki, bahang yang ayangki kau diyulta aput: ‘Adika Papang yulwi: Yang tawanki, manna saumana-ū balna kidika apahki; dawak kidika kaupak manayaktik Israel sauni yakat manasihki.

¹³Yang lawik manna saumana-ū kidika apahtik kidika kaupak manayakting kat amanglatanama, yang tawanki, yang laih Papangyang.

¹⁴Manna yakat yang sangkika dutayang kidika āna awaki, dawak manna sangka alahwanama, dawakat manna saumana palni yakat manaki. Kaput dawak manna amanglatanama, yang laih Papangyang, yulnayang, dawak yamnayang. Yang Papangyang kat yultayang.’ ”

¹⁵Papang, yang akat kaiwi yayulna:

¹⁶“Pan as duta kidika yakat ultah aput: ‘Judá dawak Israel balna karak aslah kalalahna kidika’. Usnit kat pan ūk duta ultah: ‘José laih Efraín pāni yakat, dawak Israel muihni balna ūk karak aslah kalalahna balna bitik kidika kauna.’

¹⁷Usnitkat, man tingma yakat bupak libitta, yuldarangkat aslah atnin.

¹⁸Manna aslahmana kidika manayulwarang: ‘Adika tanka maiyulta’ matwarangkat,

¹⁹diyulta: ‘José panan kidika laihtik duki, Efraín tingni yakat duwasak kidika dawak Israel balna karak aslah kalalahna muihni balna kidika bik, dawakat pan ūk yakarak libitki, pan aslah yamna atnin yulni yang tingki yakat.’

²⁰Tingmana yakat dutanauh, witingna muhnina yakat, pan bu man ulnaman dai kidika.

²¹Usnit dawak diyulta: ‘Papang adika yulwi: Yang Israel balna kidika yakna awaki nisan balna pasyakat uiwi wawatna kidika kaupak; pa bitik kaupak waltik duaitik uduhki, dawak yamtingkat watwi saunina yakat aiwarang.

²²Witingna kidika nisan aslah yamna awaki adika pāni Israel asangni akat, dawak witingna king aslah duduwarang. Witingna kidika watwi nisan bu sahyakna awas karang, dawak king bu naikau naikau bik awas karang.

²³Watwi bik dawan dauh balna yakat minitna yuyulwi maisihni kalkakahwas karang, dawak dutni balna manas bik yayamwas karang. Yang lawik laihtik yakna awaki, barangni awas[74] yayamwa balna kidika kaupak, dutni yayamwa kidika kaupak klin diyamki. Witingna kidika yang tawanki balna karang dawak yang laih witingna Papangnina awaki.

²⁴Yang diki yamyang Devid kidika witing manah king karang, dawak ūk diskarang witing manah karang sīpnina maintalyang kidika, dawak witingna yulki balna dakakawarang, laki balna kat yayamna karang.

²⁵Yang diki yamyang Jacob yakat sau kalanayang dai yakat witingna yalalahna karang, dawak kidika pāni yakat muihnina bararak balna yalalahna dai yakat. Kidika yakat witingna dawak walaninabis balna bik ban kaput yalalahna karang, dawak sulanina balna kalalahwarang balna kidika bitik; dawak diki yamyang Devid kidika witingna taninatuna ban karang.

²⁶Witingna karak pramis as yamki bahang kidika laih witingna isningnalak yalahninna yulni. Kidika pramis laih ban kaput karang sarandis. Yamting kat witingna kidika mahni kakalna karang, dawak witingna pasyakat ban kaput atnin āna awaki ūki holi kidika.

²⁷Witingna pasningna yakat yalahki, dawak yang laih witingna Papangnina awaki, dawak witingna kidika laih yang tawanki balna karang.

²⁸Yang ūki holi kidika witingna pasningna yakat ban sakkarang mani balna yakat, nisan balna ūk kidika amanglalawarang yang lawik Israel kidika yaktik dunayang yang palni diki holi kapat.’ ”