Read Mayangna Ezequiel 40 Bible Online

Ezequiel 40 - Mayangna bible

Ezequiel 40

¹Waiku kalahwak ma salap laihna yakat, kidika mani laih kurih wisam mani, bahang Papang kaiwi witing tingni kidika mikit yakat yuna, dawak amana kapat kau Israel sauni yakat yaduwi kiuna. Babilon yakat yanaduwi kiuna kidika uman kurih 25 laihna dai, dawak Jerusalén yakat kawi duna kidika uman kurih salap minitkau arungka laihna dai. Israel sauni yakat, papang yaklauwi asang maluihni as kau yailna dai; kidika kaupak wadah niningyakat talnayang, bahang bangdai u nunuhni balna manah dawak tawan nuhni as kapatdai.

³Papang yaklauwi kidika yakat yaduwi kiuna, dawak yakat al as talnayang kidika laih sihm bras kapat dai. Dūr yakat yaklauna sakdai, witing tingni yakat linin wahni di nuhni kulnin dini as duwasakdai, dawak di dibin kulnin dini pan kau yamna kidika as duwasakdai.

⁴Kidika alni yang akat yayulna: “Yamni talah dawak bik dakah; kaput bik yamni amangta talah di namangkaki kidika, kat Papang yaklauwi maduwi kaina man yakat namangkanik yulni. Usnitkat, man lawa Israel muihni balna bitik yakat diyulma man talaman adika.”

⁵Makat yulnin uni ahni niningkauh kidika daklawi awaih danadai. Kulnin dini pan as tingni yakat duwasakdai kidika laih naini metro bās duwadai. Kaput laih ahnikau daklana balna kidika kulna, kidika laih panuhni metro bās duwadai, dawak maluihni bik metro bās.

⁶Usnit kat ma kilwa niningkauh dūr kiwi kawa yakat kiwi ma yakat kilwi dūr kiwi kawa kidika kulwi talna dai, kidika panuhni niningkauh laih metro bās duwadai.

⁷Yaihnit balna kau daklana dibinina balna kidika bik metro bās duwadai naini dawak panuhni bik, dawak daklana dibinina libitna walsah kidika laih metro bu minitkau papusbah duwadai. Kidika kaupak kiwi kawa dūrni kidika sakdai, makatyulnin uni muhnit yakat. Bahang kidika dūrni kiwi kāwa yakat kidika panuhni metro bās duwadai.

⁸Alni kidika kulwi talna dūr kiwi kawa yakat, bahang metro arungka duwadai. Rahni nunuhni bu raudai bahang kidika balna laih metro as tubakni duduwadai.

⁹

¹⁰(Ma kilwa niningkauh kiwi kawa balna yaihnit nabupak daklana binina bās duwadai bahang bāspak kapaputdai, dawak rahni balna nunuhni raudai kidika balna bik sihm kapaputdai nunuhni.)

¹¹Usnitkat al dai kidika dūr kiwi kawa yakat kulwi talna: metro singka duwa dai panuhni, dawak kiwi kawa kidika laih metro tiaskauas minitkau papusbah duwadai.

¹²Daklana dibinina balna kidika muhnityakat tubakni daklana bangdai panuhni laih metro papusbah. Daklana binina kidika laih panuhni metro bās duwadai dawak naini bik metro bās dai.

¹³Usnit kat kiwi kawa panuhni ampus kidika bitik kulwi talna dai, daklana bin as kung kaupak muhnitkau daklana bin ūk kidika kung kat, dūr as bayakwi kiwak muhnitkau dūr sakkidika dawak kidika bitik kat metro 12 minitkau papusbah duwadai.

¹⁴Usnit kat muhnikau dūrni kiwi kawa pāni pakkidika kulwi talna: metro salap dai.[78] Uni nuhni yakat kiwi kanin kidika laih watak[79] awaih yakat duwadai.

¹⁵Naini bitik libitna kidika, ahni kaupak pastawa kau dūrni sakkidika kat duwadai metro muihasluih minitkau singka duwadai.

¹⁶Daklana binina dawak rahni nunuhni balna kidika bik, dawak pas yakauh yakat windar duwadai ayan lakwi pardawi birna kidika karak, ūni nuhni awaih kidika bitik yakat. Kiwi kawa kau pa pakkidika awaih yakat windar manah duwadai, pastawa niningyakauh. Rahni nunuhni balna rau kidika yakat kuku satni wayani balna yamna dai.

¹⁷Alni kidika usnitkat watakni kidika ahni niningyakauh yakat yaduwi kiunadai, watakni awaih kidika kipala kau yamwi awaihna dai, dawak kidika yakat daklana balna 30 duwadai.

¹⁸Kipala kau lakna kidika laih sau niningyakauh dai, ū nunuhni balna yamna kidika kiwi kawa pirini balna yakat duwadai, dawak panuhni laih ū nunuhni balna naini niningkauh kidika sihm kaput duwadai.

¹⁹Alni kidika kulwi talna dai sau niningkauh dūr muhnit kaupak pas niningkauh dūrni[80] ahni kidika kat naini ampus duwa kidika, kidika laih metro 50 duwadai.[81]

²⁰Kawi yaklanin pāni as sakdai, kidika laih tingpal niningkauh watakni ahni niningkauh yakat. Al dai kidika yaklauwi kulwi talna panuhni dawak naini bik.

²¹Pirini nabupak daklana dibinina kidika bās raudai, dawak rahni nunuhni balna dawak kiwi kawa kau ahni pakyakat bupak nunuhni kapapatdai, ma kilwa niningkauh yakarak libitwak, yuldarangkat naini niningkauh metro 25 duwadai dawak panuhni laih metro 12 minitkau papusbah.

²²Kiwi kawa kau panuhni pakkidika, windar balna dawak kuku kapapat bangkidika laih sihm kapapatdai, ma kilwa niningkauh bangkidika karak, bahang kidika yakat kilnin kat, ta kilitna tiaskaubu duwadai, kidika munah kilnin dai, dawak kiwikawa kau ahni pakkidika laih pastawa niningyakauh[82] pakdai.

²³Ma kilwa niningyak dawak tingpal niningyak, dawak ahnikau kawi yaklawa muhnit yakat, bik dūr ūk sakdai watak pas niningkauh yakat kanin. Al kidika kulwi talna kanin pāni bu kidika balna bik, bahang bitik kat metro andat papusbah duwadai.

²⁴Usnitkat al dai kidika wadah niningyakat yaduwi kiuna, bahang kidika yakat dūr as sakdai, dawak kulwi talna kiwi kawa kau ahni pakkidika dawak rahni nunuhni balna kidika bik, bahang kidika laih sihm kapapatdai nunuhni.

²⁵Uni nuhni kiwi kawa kidika dawak, kiwi kawa yakat pa ahni pakkidika, yaihnit awaih kidika bik laih windar duwadai, as balna kapat. Bitik kat metro 25 dai naini, dawak panuhni laih metro 12 minitkau papusbah dai.

²⁶Dawak ta kilitna as duwa dai, kilitna balna kidika tiaskaubu, dawak kiwi kawa kau ahni pakkidika laih pas niningyakauh pakdai. Dawak rahni nunuhni balna kidika kuku kapapat wayani balna yayamna dai pirini nakaskau bupak.

²⁷Pastawa niningkauh watak pakkidika bik dūr duwadai wadah niningyakat. Al kidika witing kulwi talna dūrni balna kidika bupak, wadah niningkau balna yakat, dawak bitikkat metro andat papusbah dai.

²⁸Usnitkat wadah niningkauh dūrni yakat yaduwi kiuna, pas niningkauh watak pakyakat. Wadah niningkauh dūrni kidika kulwi talna, dawak sihm muhnilau dūr balna kulwi talna dai kaput dai nuhni.

²⁹Daklana dibinina, kiwi kawa kau ahni pakkidika, dawak rahni nunuhni balna bik sihm nunuhni kaput dai. Uni nuhni kiwi kawa kidika, dawak kiwi kawak kau ahni pakkidika bik sihm windar awaih duwadai, dawak bitik kulwi talwak metro muihasluih minitkau singka duwadai naini, dawak pirihta laih metro salap minitkau bu minitkau papusbah duwadai.

³⁰

³¹Kiwi kawa kau ahni pakkidika laih ahni niningyakauh pakdai. Rahni nunuhni balna kidika yakat kuku satni wayani balna yamna dai. Adika dūrni laih ta kilitna tiaskaubās duwadai.

³²Usnitkat ma kilwa niningkauh pastawa kau watak pakyakat yaduwi kiuna, kiwi kawa kau yakat kulwi talna, dawak sihm uk balna kaput dai nuhni.

³³Daklana dibinina, rahni nunuhni balna, kiwi kawa kau ahni pakkidika, ūk balna karak sihm kapapatdai. Uni nuhni kau kiwi kawa kidika dawak kiwi kawa kau ahni pakkidika, yaihnit awaih kidika windar duwadai, naini kidika metro muihasluih minitkau singka duwadai, dawak panuhni laih metro 12 papusbah duwadai.

³⁴Kiwi kawa kau auhni pakkidika laih ahni niningyakauh watak yakat dai. Rahni nunuhni balna kidika yakat kuku satni balna wayani yamna dai. Kidika dūrni yakat ta kilitna as sakdai kidika munah kilna atnin, bahang kidika tani laih kilitna tiaskaubās duwadai.

³⁵Usnit kat al dai kidika tingpal niningkauh kiwi kawa yakat yaduwi kiuna, dawak kulwi talwakat sihm as balna kapatdai

³⁶dawak kidika yakat bik daklana dibinina duwadai, rahni nunuhni balna dawak kiwi kawa kau ahni pakkidika bik, dawak yaihnit awaih kidika bitik windar duwadai. Uni nuhni kiwi kawa kidika metro muihasluih minitkau singka duwadai naini, dawak panuhni laih metro 12 minitkau papusbah duwadai.

³⁷Kiwi kawa kau ahni pakkidika[83] laih pakdai ahni niningkauh watak yakat. Dawak rahni nunuhni balna kidika yakat kuku satni balna wayani yayamna dai. Adika dūrni laih ta kilitna munah kikilwadai, tani kidika laih kilitna tiaskaubās duwadai.

³⁸Daklana as sakdai, kidika laih kiwi kawa kau ahni[84] pakyakat kalahwadai. Bahang kidika yakat tinglau balna sakripais yayamwarang kidika susuhwadai.

³⁹Kiwi kawa kau ahni pakyakat tibil arungka bangdai, nakaskau bu bu lakna dai, kidika yakat sakripais karauni kauna dawak dutni dawak disnin yulni sakripais buswarang kidika bik ilwi ihiwadai.

⁴⁰Kiwi kawa kau ahni pakkidika[85] kaupak ahni tingpal niningyakat bik nakaskau tibil bu bu lakna bangdai,

⁴¹yuldarang kat tibil arungka bangdai pastawa yakat, dawak arungka uk kidika laih ahni kiwi kawa yakat bangdai: bitik kat tibil tiaskaubās bangdai. Kidika minit yakat lakwi di ihiwadai.

⁴²Tibil arungka kidika laih kipala pahrna kau yayamna dai, kidika minit yakat ilwi bubuswadai sakripais, naini centímetro muihasluih bās minitkau salap minitkau singka duwadai, panuhni bik sihm kaput dai, dawak maluihni laih centímetro andat papusbah dai, kidika balna minit yakat minitdis kalanin dini balna kidika ilwadai. Daklana pastawa niningkauh yaihnit awaih kidika yakat di laknin panuhni centímetro tiaskauas duwadai, bahang kidika yakat minitdis kalanin dini plawar kidika ihilwādai, dawak di uk balna witingna di duduwa dini balna kidika bik ihilwādai, kidika balna yakau sakripais busnin dini balna ihiwadai.

⁴³

⁴⁴Pastawa niningkauh watak kidika, dawak pastawa dūrni balna kidika kaupak ahni niningyakat, daklana bu[86] raudai, tingpal niningkauh dūrni sakkidika yaihnit yakat, as kidika laih muhni kidika wadah niningyakauh dai, dawak ūk kidika laih, pastawa kau dūr sakkidika yaihnit yakat dai, bahang muhni kidika laih tingpal niningyakauh sakdai.

⁴⁵Al kidika yaklauwi yayulna: “Daklana as wadah niningyakauh muh sakkidika laih sumalyang makat yulni ūni yakat wark yayamwa balna panina,

⁴⁶dawak daklana as tingpal niningkauh muh sakkidika laih sumalyang balna walapni busnin pāni yakat wark kalalahwa balna panina. Kidika balna laih Sadoc sulani balna, dawak libait balna pasyakat witingna manah sipki Papang yaihnit yakat uiwi dini yamna atninna.”

⁴⁷Usnitkat al dai kidika watak pastawa niningkauh yakat kulwi talna, watakni kidika laih rabutni dai, bahang kungni arungka balna kidika aslah andat papusbah metro duwadai, sakripais buswa pāni kidika laih makatyulnin uni muhnit yakat sakdai.

⁴⁸Al kidika yaklauwi yaduwi kiunadai makat yulnin ūni kiwikawa kau ahni pakyakat, dawak rahni nunuhni balna kidika kulwi talna, bahang rahni balna kidika aslah pirihta duwa dai nuhni metro bu minitkau papusbah, dawak dūrni kidika laih duwadai metro tiaskaubu pirihta panuhni, dawak kiwi kawa kau ahni pakkidika dūrni yakat laih watnin dini āna kidika[87] laih panuhni metro as minitkau papusbah duwadai panuhni, aslah.

⁴⁹Kiwikawa kau ahni pakkidika panuhni metro salap duwadai dawak naini niningkauh laih metro tiaskauas[88] duwadai, bahang kidika yakat kilnin kat ta kilitna as sakdai, kidika laih kilitna salap duwadai, rahni balna kidika yaihnit balna yakat rahni ūk bik duwadai.