Read Mayangna Ezequiel 41 Bible Online

Ezequiel 41 - Mayangna bible

Ezequiel 41

¹Usnit kat muih al kidika yaklau sihm makat yulnin ūni pasyakat yaduwi kiuna, dawak ū rahni balna kidika kulwi talna dai: bupak pirihta nuhni[89] kidika laih metro bās duduwadai.

²Dūr pirihta niningkauh kidika laih metro singka duwadai; pirini balna panuhni niningkauh kidika laih metro bu minitkau papusbah duduwadai. Usnit kat papuskau ahni panuhni pakkidika kulwi talna, dawak naini niningkauh kidika laih metro 20 duwadai dawak pirihta niningkauh kidika laih metro salap duwadai.

³Usnit kat ū paskau ahni panuhni pakkidika yakat kiwikawa ūni rahni balna kidika kulwi talna, dawak kidika balna as tubakni kidika laih metro as duwadai. Kiwikawa pāni panuhni niningkauh kidika laih metro bās duwadai, dawak ū rahni balna pirini nakas[90] tubakni kidika laih metro bas minitkau papusbah duduwadai.

⁴Usnit kat ū paskau ahni panuhni pakkidika kulwi talna, dawak pirini balna kidika laih metro salap duduwadai. Bahang yayulna: “Adika ki holi pāni kidika.”

⁵Usnit kat muih al kidika yaklau makat yulnin ūni daklana ahni niningkauh kidika kulwi talna, dawak kidika tubakni laih metro duwadai. Makat yulnin ūni yaihnit kidika laih, silak ūni balna bangdai, pasluihni niningkauh laih metro bu duduwadai.

⁶Adika sinilak ūni balna laih tilana kat dakni bas bangdai, dawak dakni as kidika yakat silak ūni manah 30 bangdai. Makat yulnin ūni daklana kidika laih dakni uk balna yakat baisa tirisni kalnadai, dawak adika sutni balna kalalahwa kidika minityakat silak ūni dinitkau pan rababutni balna kidika tataihwādai, bahang kaput laih daklana kidika minityakat tataihwasdai.

⁷Silak ūni balna ahni niningkauh makat yulnin ūni awaihdadakwadai kidika yakat pan as sakdai kidika laih maluih yakau kilwi kiwadai, dawak kaput laih sipdai sau kaupak kilna atnin dakni papuskau yakat, dawak makau yakat bik.[91]

⁸Makat yulnin ūni pirini balna bitik yakat talingkat makat yulnin ūni kidika laih kalni balna maluih sakdai, sihm kidika minityakat silak ūni balna kidika yayamna bangdai. Adika ūni kalni maluihni niningkauh kidika metro bas duwadai,

⁹silak ūni balna ahni niningkauh tubakni daklana kidika laih metro bu minitkau papusbah duwadai, dawak makat yulnin ūni yaihnit balna bitik, silak ūni balna walsah yakat awaihwadai kidika dawak ū pas daklana sumalyang balna payayahwa pāni yakat, ahni panuhni as dauh pakdai, kidika pirihta niningkauh laih metro salap duwadai.

¹¹Silak ūni balna kidika laih ahni panuhni pakkidika karak aslah tangpakna dai, dūr as tingpal niningkauh dawak wadah niningkauh sakdai yakat. Ahni panuhni naini pakkau daklana tubakni kidika laih metro bu minitkau papusbah duwadai.

¹²Ma kawa, watak daklana niningkauh yakat, ū nuhni as tusdai, kidika pirihta niningkauh laih metro 35 duwadai dawak naini niningkauh laih metro 45 duwadai, dawak daklana tubakni kidika laih metro bu minitkau papusbah duwadai.

¹³Muih al kidika laih makat yulnin ūni kidika kulwi talna dai, dawak naini niningkauh laih metro 50 duwadai. Watak daklana paskau pirihta nuhni kidika, baisa ū nuhni kidika dawak daklana balna kauna kidika bik, metro 50 duduwadai.

¹⁴Makat yulnin ūni pirihta niningkauh, kidika minityakat baisa ma kilwa niningkauh watak itikna pakdai kidika laih metro 50 duwadai.

¹⁵Usnit kat ū nuhni naini niningkauh kidika kulwi talna dai makat yulnin ūni dangnit yakat tusdai kidika, watak daklana muhnitkau, baisa daklana pirini balna kidika laih metro 50 duwadai. Makat yulnin ūni paskau ahni panuhni pakkidika dawak watak kiwikawa pāni kidika

¹⁶tat kau nanitdakna dai. Windar balna ayan panani kau lakwi pardawi birna kidika dawak yaihnit yakat daklana balna dai kidika pirini bāspak tat kau nandakna dai. Sau kaupak windar balna kat ahni naini kidika, dawak dūr kaupak makau kidika balna bik nandakna bangdai. Makat yulnin ūni daklana balna kidika, pasyakat dawak ahni yakat bik,

¹⁸daklawi kidika yakat di lawani dawak kuku satni balna wayani yamna dai. Di lawani as kidika muhni bu duwadai;

¹⁹muhni nakas kidika yakat, muih al muhni as kat kuku satni as yakat talwadai, dawak muhni uk kidika laih, layan muhni as kat kuku satni as yakat talwadai. Kaput makat yulnin ūni yaihnit bitik yakat

²⁰di lawani wayani balna dawak kuku satni wayani balna yayamna bangdai, sau kaupak dūr balna makau kat. Papuskau ahni nuhni daklana yakat,

²¹dūr kungni kidika laih ū rahni balna kidika rababutni kat duwadai. Holi pāni kiwikawa muhnityakat di as sakdai kidika laih sihm

²²sakripais busnin pāni tat kau yamna kapatdai, pirini balna kidika laih metro as as duduwadai, dawak maluihni niningkauh laih metro as minitkau papusbah duwadai. Sipintang balna duwadai, dawak uknin panani[92] dawi pirini balna kidika laih tat kau dai. Muih al kidika yaklau yulna: “Adika tinibil adika ki Dawan muhni yakat sakkidika.”

²³Papuskau ahni panuhni kidika dawak holi pāni kidika bik dūr bu bu duduwadai, kidika balna laih daklana niningyakauh apapahwadai.

²⁵Papuskau ahni panuhni dūrni balna kidika laih di lawani wayani balna dawak kuku satni wayani balna bik yayamna dai, sihm daklana kau duwadai kapat. Ū nuhni kiwikawa pāni, ahni niningkauh yakat, pan kararauni lakwi pardawi pana[93] kidika as sakdai.

²⁶Ū watak kiwikawa balna bitik kidika windar balna yakat ayan kararauni lakwi pardawi birwi kuku satni balna kidika yayamna manahdai. Silak ūni balna makat yulnin ūni yaihnit yakat bangkidika bik ayan kararauni lakwi pardawi birna kidika duduwadai.