Read Mayangna Ezequiel 43 Bible Online

Ezequiel 43 - Mayangna bible

Ezequiel 43

¹Muih al kidika yaklau ma kilwa niningkauh dūr sakyakat yaduwi kiuna,

²dawak Israel Papangni alasnina yaksihni kidika laih ma kilwa niningkaupak kaina dai. Binka parasni as yulwadai, sihm was mahni murwa kat, dawak sau kidika laih yaringni bahngna dai.

³Sahmuhni amana kapat talnayang kidika laih sihm Dawan yaklau Jerusalén daukalpamna kaiwak talnayang dai kidika dawak Quebar wasni kungkau talnayang dai kidika kapat ki. Abuktik muhki kidika sau kat suknayang dai,

⁴dawak Dawan alasnina yaksihni kidika laih makat yulnin ūni kat kanadai ma kilwa niningkaupak dūr sakmunah.

⁵Bahang Papang parasni kidika yadulauwi paskau watak pakyakat yaduwi kiunadai, dawak Dawan alasnina yaksihni kidika laih makat yulnin ūni kidika bahngwakat talnayang dai.

⁶Muih al kidika laih yang yaihkit yakat yaklauna, dawak Dawan yaklau makatyulnin ūni kaupak yulyabauwakat dakanayang dai

⁷dawak aput yayulnadai: “Adika ki yang tronki pāni dawak bik kalki balna laktayang pāni; adika pāni akat Israel balna walsah yakat ban kaput atnin yalahki ki. Witingna dawak kingnina balna bik watwi yang ayangni holi yakat rispik dis yayamwas karangki: watwi kingnina balna dadauwakat kipala kau di wayani yamwi diayawas karangki,

⁸kidika awaskat ūnina nunuhni balna yayamwakat dūrni balna kidika yang ūki dūrni balna karak libitni, papusyakat daklana aslah atnin awaski. Witingna laih yang dutni talayang dini balna kidika kau yamwi yang ayangki holi kidika yakat rispik dis yayamna; kidika yulni witingna karak kulnik daukaltik -imuknayang.

⁹Waralaih yang kaupak naikau yayakwang witingna dutnina kidika dawak kingnina balna yakat kipala kau di wayani yamwi diayana kidika bik, dawak yang laih witingna pasningna yakat ban kaput atnin yalahki ki.

¹⁰Dawak, muih al man laih, Israel muihni balna yakat diyultah makat yulnin ūni dawak sauni langni balna kaupak ais talnaman kidika, witingna dutnina yulni yakasaldana atninna.

¹¹Dawak ais yayamna balna kidika bitik yulni yakasasaldarang kat, makat yulnin ūni ampat dawak kidika yakat ais bangkidika bik diyulma, kalahnin pāni dawak kanin pāni balna, witni kat pāni langni kidika bitik diyulma, dawak la balna kat yamninna kidika bik diyulma. Adika wayani bitik lāih yamta diatangkat talwi yayamwang. Lā balna kidika bik ulta diatah, witingna kaput laihwi yamna atninna yulni.

¹²Adika ki makat yulnin ūni lāni kidika: makat yulnin ūni yaihnitkau sau awaihwa kidika bitik, asang minit munah, kidika laih pa as Papang dini yakna karang.”

¹³Sakripais busnin pāni kulwi talna balna kidika laih adika balna dai, muhnilaukau kulwi talna balna kidika karak. Sakripais busnin pāni yaihnit yakat sau sahna as tusdai, kidika pasluihni niningkauh laih metro papusbah duwadai dawak pirihta niningkauh bik metro papusbah duwadai, kidika ahni niningyakauh dawak yaihnit kung maluihni yaklauna kidika laih centímetro 25 duwadai. Sakripais busnin pāni uknin panani kidika laih aput dai:

¹⁴sau sahna paskaupak sau niningkauh kung kat kidika, maluihni niningkauh metro as duwadai. Muihninuh sau kauh pirihta kidika laih metro papusbah duwadai. Muihninuh papuskau maluihni niningkauh kidika laih metro bu duwadai, dawak pirihta niningkauh bik sihm metro bu duwadai.

¹⁵Muihninuh makauh, sakripais bubuswa pāni kidika, maluihni niningkauh laih metro bu duwadai, tamni balna arungka duwadai, kidika balna laih mayakauh uhuhrni dai.

¹⁶Sakripais busnin pāni, muihninuh makauh kidika laih rabutni dai, pirini balna kidika laih metro tiaskauas duduwadai.

¹⁷Muihninuh papuskau kidika bik rabutni dai, pirini balna kidika laih metro tiaskaubu duduwadai. Yaihnitkau sau sahna tusdai kidika laih, pirihta niningkauh kidika metro papusbah duwadai, dawak kungkau yaklauna dai kidika laih, pirihta niningkauh kidika centímetro 25 duwadai. Sakripais busnin pāni yakat kilnin tipni balna kidika laih ma kilwa niningkauh uiwadai.

¹⁸Usnit kat Dawan yaklau yayulna: “Sakripais busnin pāni yamnin mani kidika kaiwi kawarang kat, adika lani laihta yamtanama: sakripais busnin pāni kidika minityakat didauh karauni kauna as bustanama, dawak sakripais busnin pāni kidika laih ā kau rastanama.

¹⁹Libait muihni, Sadoc sulani sumalyang balna kidika, witingna laihtakat yang yaihkit yakat aiwi diki yamninna ki, turuh almuk wahma as diama dutnina yulni sakripais busna atninna. Yang, Dawan yang kidika lawik yamnin yultayang.

²⁰Usnit kat kidika āni apis duta tamni balna arungka yakat, tamni papuskau sakkidika sipintang balna arungka yakat dawak kung yaklauna yakat bik rasma. Kaput laih kidika dutni kaupak maisihnidis yamma.

²¹Usnit kat dutnina yulni turuh almuk wahma sakripais yamna kidika duta, makat yulnin ūni kaupak ahni yakat busma, sakripais busnin pāni yakat.

²²Kidika payahwakat dutnina yulni kuts bin as sakahwa awas kat sakripais yamnaman karang, dawak sumalyang balna kidika laih sakripais busnin pāni kidika maisihnidis yayamwarang, turuh almuk wahma karak yayamna kaput.

²³Maisihnidis yamnin kidika yamta dama mani kat, turuh almuk wahma as dawak sīp almuk as duta, bupak sakakahwa awaskat,

²⁴dawak yang yakat sakripais yamta yama. Sumalyang balna kidika yaklau kuma wasni kau raswi dawi sakripais karauni kauna bubuswarang yang riskipik kau.

²⁵Ma bitik yakat, ma tiaskaubu pasyakat, dutnina yulni kuts almukbin as sakripais yayamna karang, dawak turuh almuk wahma as dawak sīp almuk bik as sakripais yayamwarang, bitik laih sakakahwa awaskat.

²⁶Ma bitik yakat, ma tiaskaubu pasyakat, sumalyang balna yaklau maisihnidis yamninna karangki sakripais busnin pāni kidika, Papang warkni balna yamna atnin yulni.

²⁷Kaput manah ma tiaskaubu yayamwarang, dawak ma tiaskaubās kaupak tanitkauh kidika laih sakripais karauni kauna balna dawak sakripais buswi wanaihni karak watwi yamni kalahna atnin kidika yayamwarang. Yang Dawanyang adika lawik yultayang.”