Read Mayangna Ezequiel 44 Bible Online

Ezequiel 44 - Mayangna bible

Ezequiel 44

¹Muih al kidika yaklau watwi makat yulnin ūni dūrni ahni ma kilwa niningyakauh sakdai yakat yaduwi kiuna, kaunah kidika laih putna sakdai.

²Kidika yakat Dawan yaklau yayulna: “Adika dūrni laih putni sak atninki; apahnin awaski. Kidika yakut muih as bik kalahnin sip awas karangki, kat kidika yakut Dawan, Israel Papangni kawi yaklana kidika yulni. Kaput bahang, putni sakkarang ki.

³Kabamint kayang muihni manah kayaklanin sipkarang, kasnin dini Papang dini kidika Dawan muhni yakat kasna atnin. Ū kiwikawa kau watak pakkidika munah ka'yaklana karang dawak sihm kidika yakut kalahna karang.”

⁴Usnit kat muih al kidika yaklau tingpal niningkauh dūr sakyakat yaduwi kiunadai, makat yulnin ūni muhnitkau. Dawan alasnina yaksihni kidika makat yulnin ūni kidika yakat bahngna kat talnayang dai, dawak abuktik muhki kidika sau kat suknayang dai.

⁵Bahang Dawan yaklau yayulna: “Muih al, man, mamakpa balna kidika yamni sahmuhtah dawak yamni yadakah makat yulnin ūni lani balna mayulki kidika. Yamni talah wais balna kidika makat yulnin ūni yakat kaninna sip kidika dawak kidika kaupak wais balna kalahninna sip kidika bik.

⁶“Israel tawanni kulnin dutni yakat kalyultah: ‘Dawan yaklau aput yulwi: Israel tawanni, baisa dutni yamwinih.

⁷Manna lawa yang ūki kidika rispik dis yamtamana, datanangkat sau uk muihni balna kakawi, yang prakimis sainni kidika sinsni yakat dawak muihni nuhni yakat bik dis muihni balna kidika; salani kidika dawak sakripais yamna āni balna kidika duwi sihm kasnin dini kapat yawi rispik dis yayamwi dawak di dutni balna yayamwa kidika karak bik yang prakimis lani kidika yakat dutni yayamwi.

⁸Dawak amput Papang dini yaknin balna kidika kaput yayamwas ki, kaunah sau uk muihni balna tingnina yakat awi dadana.’

⁹“Kidika bahang yang Dawanyang adika lawik yultayang: sau uk muihni as bik yang ūki yakat kawas karangki yang prakimis sainni kidika sinsni yakat dawak muihni nuhni yakat bik duwas kat; ais wat Israel muihni balna pasyakat sau uk kaupak yalahwa karang bik kawas karangki.

¹⁰Libait muihni balna yang kaupak naikau kalalahna kidika, Israel muihni yang taki kaupak kalahwi yaruhmwi dana mani kat, wayani dauh balna yakat ayangni tanit nuhni yamna atnin yulni, dutnina yulni minitlalauwarang ki.

¹¹Yang ūki yakat wark balna yamninna sip karang dūr balna kidika maintalna atnin dawak makat yulni ūni warkni uk balna yakat bik; witingna yaklau didauh balna sakripais karauni kauna busnin kidika dawak tawan muihni balna yaklau minitdis kalanin dini duahaiwa kidika balna bik ihiwa karang; baisa kidika minityakat, witingna laih ridi atninna ki tawan muihni balna yakat wark ilp diana atninna.

¹²Witingna laih Israel muihni balna warknina yayamwadai wayani dauh balna yakat prinias yamna atnin, dawak kaput laih diyayamwakat dutni yayamna dai. Kidika bahang, dutni yayamna kidika yulni minitlalauna karang. Yang Dawanyang adika lawik yultayang.

¹³Yang wark ki balna yakat sumalyang kapat laih awas karang dawak yang diki balna yaihnit yakat bik uiwas karang, dawak baisa diki holi balna yaihnit yakat bik uiwas karang. Risninapik dis tururukna karang di dudutni balna yayamna kidika yulni.

¹⁴Makat yulnin ūni warkni yamnin balna kidika witingna tingnina yakat ānayang karang, kidika yakat ais yamnin dini balna bangkidika yamna atninna yulni.

¹⁵“Sadoc sulani libait muihni sumalyang balna, yang ūki yakat wark yayamna dai kidika Israel muihni balna yang taki kaupak yaklalana mani kat, witingna laih yang yaihkit yakat aiwi diki yamninna sipki. Witingna laihtakat yang muhki yakat aiwi salani kidika dawak sakripais yamna balna āni kidika yaninna sipki. Yang Papangyang adika lawik yamnin yultayang.

¹⁶Yang ūki yakat bik kaya'klawi sakripais busnin pāni yang diki yaihnit yakat uiwi diki yamninna sipki, dawak yang diki yamnin balna kidika witingna tingnina yakat karang.

¹⁷Watak paskau dūrni kidika munah kakawarang mani kat, linin asnina prakni kaninna ki. Watak paskau yakat kidik awaskat makat yulnin ūni yakat wark yayamwarang kat, di utak prakni kakawas karang.

¹⁸Linin asnina kau tunan sitnin dini as tunanina yakat sitwi uinakarang, dawak ip bik sihm linin asnina kau yamna kat duwi uiwarang, dawak baninamak yakat diwalahnin asnina sisitwas karang.

¹⁹Dawak watak kaupak ahni niningkauh yakat kalalahwas tanitkauh tawan muihni balna bangyakat, makat yulnin ūni yakat prak kawi wark yayamna kidika yakwi makat yulnin ūni paskau daklana balna yakat dadana karang, prak uk kat kaninna karangki, prak balna holi kidika laih tawan muihni balna yakat diyaklanin awas yulni.

²⁰“Tunanina kakahrwas karang, dawak basnina nanaini bik dadawas karang; kaunah sutni manah dadakna karang.

²¹Sumalyang as bik watak pasyakauh yakat ka'yaklawi wain diwas atnin ki.

²²Tingmak as kidik awaskat marid kaldakwi kalahna yalni as laih dunin awaski, kaunah Israel yalni al kalpakwas kidik awaskat sumalyang tingnimak laihtakat dunin sipki.

²³“Sumalyang balna kidika laih yang tawanki muihni balna yakat disumamalwakat amanglaninnaki holi muihni balna dawak rispik dis muihni balna kidika karak, dawak holi dawi rispik dis lani kidika bik.

²⁴Muih kalbibilwa balna yakat, witingna laih sihm wihta balna kapat karang, dawak lā yayamwarang yang lāki balna amput kat kaput. Yang lāki balna dawak yulki balna kat laihwi yayamwarang yang alaskina balna yulni kidika, dawak yang diki yakna yakurupdinin mani[99] balna kidika bik rispik yayamna karang.

²⁵“Muih dauna muihni kidika sip lalaihwas karang, dutni kidika muihnina yakat yaklanin awas yulni, witing silp papangni, nanangni, walanibis al, walanibis yal, wirahni al kidik awaskat wirahni yal al duwas kat laihwarang laih takat.

²⁶Kidika yayamwarang kat, maisihnidis kalahninna karangki, dawak usnit kat baisa ma tiaskaubu tahana karang.

²⁷Makat yulnin ūni watakni paskau yakat watwi kakawarang mani kat, warknina kidika kat yamna atnin, dutnina yulni sakripais as bubusna karang. Yang Dawanyang adika lawik yamnin yultayang.

²⁸“Sumalyang balna sihm dipahni kapat as duninna pāni kidika laih yang awakiki. Israel yakat witing dini kalana atnin dini laih diskarang ki. Yang kuduh witing dini.

²⁹Witingna kasninna sipkarang Israel muihni balna dutnina yulni minitdis kalanin dini plawar satni balna minik dawak didauh balna sakripais yamwi yayawa kidika. Israel muihni balna yaklau yang diki yayakwa balna bitik kidika witingna dinina karangki.

³⁰Sumalyang balna kidika laih di minik balna yayamni tatuna kalalahwa kidika dawak minitdis kalanin dini balna kidika bik duduna karang. Dawak manna plawar busna atnin plawar laihtamana kat, yayamni balna kidika laih witingna yakat diatanama. Kaput laih yang blikisin kidika manna ūmana minityakat karang.

³¹Sumalyang balna kidika laih di lawani kidik awaskat didauh as pini dauna kidika, kidik awaskat di anyang as yaklau kaswi biswi dapamna kidika kasninna awaski.