Read Mayangna Ezequiel 45 Bible Online

Ezequiel 45 - Mayangna bible

Ezequiel 45

¹“Manna sau kidika suerte kau ruhmta talnama mani kat sulanina balna kat kat diana atnin yulni, sau dakni as laihwattanama, naini niningkauh kidika kilómetro 12 minitkau papusbah dawak pirihta niningkauh laih kilómetro salap,[100] kidika laih Dawan dini yakna karangki.

²Kidika kaupak makat yulnin ūni dini kidika yakwi dana karangki, sau rabutni as pirini arungka balna kidika laih metro 250 duduwa karang, dawak yaihnit awaihwa balna kau sihrsihr manah kidika pirihta niningkauh laih metro 25 duwa karang.

³Dawan dini yakwi dana kidika laih sau as naini niningkauh kidika kilómetro 12 minitkau papusbah duwa karang dawak pirihta niningkauh laih kilómetro singka duwa karang, kidika laih Papang dini yakna palni karang: kidika pāni yakat makat yulnin ūni kidika sakkarang.

⁴Kidika sauni kidika laih sumalyang balna yakat diana karang Dawan ūni yakat wark yayamna kidika dawak bik witing yaihnit yakat uiwi dini yayamwa kidika. Kidika sauni yakat witingna ūnina papakna karang. Kidika laih sau as Papang dini yakwi dana karang, makat yulnin ūni dini.

⁵Baisa kidika minityakat, sau uk pakkarang naini niningkauh kilómetro 12 minitkau papusbah dawak pirihta niningkauh kidika laih kilómetro singka, kidika laih libait muihni balna makat yulnin ūni yakat wark yayamwa balna kidika dinina, kaput laih witingna tawannina nunuhni balna duwi yalahna atninna.[101]

⁶Witni kat, tawan nuhni kidika sau as yakwi duna atninki naini niningkauh laih kilómetro 12 minitkau papusbah dawak pirihta niningkauh laih kilómetro bu minitkau papusbah, sau dakni as Papang dini yakna kidika yaihnit yakat. Adika sauni laih Israel muihni balna dinina karang.

⁷“Kabamint kayang muihni kidika sauni bik as yakwi dana pakkarang. Sau dakni as kidika laih ma kilwa niningyakauh pakkarang dawak dakni uk kidika laih ma kawa niningyakauh pakkarang, yuldarangkat, Papang dini yakna kidika dawak tawan nuhni yamnin sauni kidika pirini balna yakat. Ma kilwa kaupak ma kawa kat, naini niningkauh kidika, sulani balna paskaupak as kalana atnin sauni naini kidika kaput karang.

⁸Adika sauni laih Israel kabamintni kayang kidika dini karang; kaput laih kabamint kayang balna kidika watwi yang tawanki yakat tataihwas karang, kaunah saunina kidika laih Israel sulani balna ampus kat kidika balna yakat diayawarang.

⁹“Yang Dawanyang adika lawik yultayang: ¡Kamahn aitaniki Israel kabamintni kayang balna! ¡Baisa dutni yayamwinih dawak bik dakyayakwinih! ¡Lā balna kat barangni yamtanauh! ¡Yang tawanki sauni maltamana kidika datanauh! Yang Dawanyang adika lawik yamnin yultayang.

¹⁰“Paun ānin dini balna kidika yayamnikat yusyamtanauh.

¹¹Di minik balna paun -ānin dini kidika laih sihm kapat atninki di wasni balna paun -ānin dini kidika karak. Homer 220 batal kidika laih tatuna karang. Di wasni manah bato as kidika laih homer sahyakna salap kaupak as duwa atninki, dawak di minik manah efa as kidika bik sihm homer sahyakna salap kaupak as duwa atninki.

¹²“Di tikini balna paun -ānin kidika bik sihm kapatki: Geras 20 kidika laih siclo as kalwi, dawak tikini niningkauh laih gramos 11 duwi; siclo 60 kidika mina as duwi.

¹³“Adika minitdis kalanin dini balna kidika yamtanama: plamanawar balna dawak cebada balna minik kidika sahyakna 60 yaktanama sihm kapapat, dawak kidika balna kaupak as, minitdis kalanin dini yakat ātanama.

¹⁴Disala dutanama kidika bik sahyakna 100 sahyaktanama sihm kapapat, dawak kidika balna kaupak as, minitdis kalanin yakat ātanama.[102]

¹⁵Sīp balna niningkauh kidika laih, 200 balna paskaupak as as duma, Israel sihrni sihr yayamni balna kidika paskaupak. Adika balna laih minitdis kalanin dini plawar satni balna minik, sakripais karauni kauna balna kidika dawak sakripais yamwi wanaihni karak watwi yamni kalahnin dini balna karang, dutnina dawak disnin yulni bubuswa kidika. Yang Papangyang adika lawik yamnin yultayang.

¹⁶“Adika sauni bitik yakat muih balna kidika laih adika minitdis kalanin dini kidika Israel kabamintni yakat kalaninna ki,

¹⁷witing yaklau didauh balna sakripais karauni kauna yamnin kidika diawa karang, dawak waiku wisam balna yakat, yakurupdinin mani[103] balna yakat dawak Israel alasnina mani balna yakat bik minitdis kalanin dini plawar satni balna minik dawak wain kauna bik diawa karang. Dutnina yulni sakripais yamnin kidika, minitdis kalanin dini plawar satni balna minik, sakripais karauni balna kauna dawak sakripais yamwi watwi wanaihni karak yamni kalahna atnin balna kidika bik duaina karang, Israel dutni dawak dinin yulni.

¹⁸“Yang Dawanyang adika lawik yultayang: waiku tatuna kalahwak ma tatuna yakat manna lawa sakripais yamtanama turuh almuk wahma as sakahwa awaskat, makat yulnin ūni kidika dutni kaupak maisihnidis yamna atnin.

¹⁹Sumalyang yaklau dutnina yulni didauh sakripais yamna āni kidika duwi makat yulnin ūni dūrni rahni balna yakat, sakripais busnin pāni sipintang arungka balna yakat dawak watak paskau dūrni balna rahni yakat bik kahwarang.

²⁰Kidika wainiku ma tiaskaubu yakat sihm kaput yamwarang wais kat isning aiwas dutni as yamna kidika yulni. Kaput laih makat yulni ūni kidika maisihnidis yamna karang.

²¹Waiku tatuna kawak ma tatuna yakat manna insal kaiwi bayakna mani alasnina kidika yamtanama, dawak ma tiaskaubu pasyakat plawar pupuhnin dini dis busna kidika kastanama.

²²Kidika mani kabamint kayang muihni kidika turuh almuk wahma as sakripais yamwarang witingna silp dawak tawan muihni balna bik dutnina yulni,

²³dawak ma tiaskaubu alasna manah karang kidika turuh ahalmuk wawahma tiaskaubu dawak sīp ahalmuk tiaskaubu sakakahwa awaskat duahaiwarang, Dawan yakat sakripais karauni kauna buswi kalana atnin. Baisa kidika minityakat, ma as yakat kuts almuk as sakripais yamwa karang dutnina yulni.

²⁴Turuh almuk as dawak sīp almuk as kidika yakat minitdis kalanin dini plawar satni balna minik batal 20 dawak disala batal bu minitkau papusbah minitlakna karang.

²⁵“Pan ting kau ū labanni yayamna dai kidika alasnina yakat bik, waiku tiaskaubu kawak ma 15 yakat alasnina yamna kidika, kabamint kayang muihni kidika laih ma tiaskaubu pasyakat sakripais yamnin ki, ma yapak kat kaput sakripais yamwarang dutnina yulni, didauh bik kaput buswarang dawak sihm minitdis kalanin dini plawar minik satni balna dawak disala kauna duaiwarang.