Read Mayangna Ezequiel 47 Bible Online

Ezequiel 47 - Mayangna bible

Ezequiel 47

¹Usnit kat muih al kidika yaklau makat yulnin ūni kiwikawa yakat yaduaina dai. Bahang dūr kidika dinit kaupak was buhrwi kalahwakat talnayang dai, dawak ma kilwa niningkauh makat yulnin ūni sakdai yakat murwi kiwadai. Was kidika laih makat yulnin ūni kaupak tingpal niningkauh dawak sakripais busnin pāni kaupak wadah niningkaupak murwi yaklakwadai.

²Usnit kat makat yulnin ūni sauni kaupak yaduwi kalahna dai tingpal niningkauh dūr as sakdai munah dawak ahni yakat yaduwi awaihna dai ahni ma kilwa niningkauh dūr sakdai kat. Kiwikawa kaupak wadah niningkauh yakat wastuna as utuhwa sakdai.

³Muih al kidika laih tingni yakat was as duwa kalahwi kiunadai ma kilwa niningkauh yakat, metro 500 kulwi talna dawak was murwa munah yaduwi dakyaklana; was kidika laih burikimak kat dai.

⁴Usnit kat metro 500 uk kulwi talna dawak was murwa munah yaduwi dakna; bahang was kidika laih kalaskimak kat dai. Metro 500 uk kulwi talna dawak was murwa munah yaduwi dakna; was kidika laih uman bakimak kat dai.

⁵Metro uk kulwi talna dawak was murwa kidika laih uman was nuhni dai muih as bik dakyaklanin sip-awasdai; wasnuh tuhni kalna waihwi manah dakyaklanin sipdai.

⁶Bahang yayulna: “Yamni talah ais talaman dai kidika.” Usnit kat waskung munah yaduaina,

⁷dawak waskung bupak yakat pan mahni bangkat talnayang dai.

⁸Bahang yayulna: “Adika wasni laih ma kilwa niningkauh sauni yakat murwi kiwi dawak Jordán wasni yakat kiwi kawi, kidika kaupak laih kuma dauna yakat kalahwi kiwarang ki. Kidika yakat kiwi kawarang mani kat, kuma wasni kidika laih damni kalwarang ki.

⁹Adika wasni pa angkat kiwarang bik, di wail satni balna bitik dawak waspa dini balna mahni bik sangka karangki. Kat adika wasni laih was tapahlni yakat damni yamna karangki, dawak di sangnika duwa mahni bik bangkarang ki.

¹⁰Engadi kaupak En-galim kat kidika waspa dini pamyang balna bangkarang, dawak kidika yakat waspa dini laihnin dini duduwa kidika bubuhna karang. Dawak kidika yakat waspa dini satni mahni minitbayak karang, sihm Mediterráneo kau kapat.

¹¹Kaunah lakun balna dawak wasmak utni balna yakat laih was damni dis karang; kidika laih was wilamni manah karang, kidika kaupak kuma yakna atnin yulni.

¹²Waskung balna bu kidika yakat laih panmak satni balna kidika bararakwarang. Basnina balna kidika laih sip bubukwas karang, dawak mininikwa kidika bik ban kaput karang. Waiku balna bitik yakat mininikwarang, kat makat yulnin ūni kaupak was kalahwa yakau utuhwa karang bahang. Minik balna kidika laih kasnin dini karang dawak basni balna kidika laih sika karang.

¹³“Yang Dawan yang adika lawik yultayang: Adika balna kuduh sau kiwi watwa balna Israel sulani balna 12 dipahni duduwarang kidika (José laih sau dakna bu duwarang ki).

¹⁴Yang lawik manna muihmana bararak balna yakat pramis diyamnayang dai adika sauni diana atnik. Kapapat sahyakta dutanauh. Adika sauni laih manna dimanapahni karangki.

¹⁵“Tingpal niningkauh sau kiwi watwa balna kidika, Mediterráneo kumani kaupak, Hetlón tawanni nuhni munah dawak zedad tawanni nunuhni balna,

¹⁶Berota dawak Sibraim munah bayayakwarang (kidika balna laih Damasco sauni dawak Hamat sauni karak walsah yakat bangki), dawak Hazar-haticón laih (Haurán sauni yakat kiwi watwa kidika).

¹⁷Kaput bahang, tingpal niningkauh sau kiwi watwa kidika laih Mediterráneo kaupak Hazar-enán kat kiwarang, Damasco dawi Hamat sauni balna kaupak tingpal niningkauh yakat.

¹⁸“Ma kilwa niningkauh sau uiwi wawatwa balna kidika laih Haurán sauni dawak Damasco sauni karak walsah yakaupak uiwarang Tamar[105] tawanni nuhni kat, kuma dauna yaihnitkau, Jordán wasni kaupak naikau kidika, kidika laih sau kiwi watwa pāni karang Galaad sauni dawak Israel sauni karak walsah yakat.

¹⁹“Wadah niningkauh sau uiwi wawatwa balna kidika laih Tamar kaupak uiwarang, Meriba-cades dawak Egipto wasni munah bayayakwarang Mediterráneo kiwi kawa kat.

²⁰“Ma kawa niningkauh sau kiwi watwa kidika laih Mediterráneo karang, Egipto sauni kiwi watwa kaupak kuma kung kat, Hamat kiwi kawa muhnitkau pakkidika.

²¹“Adika sauni balna ki, Israel sulani balna 12 sahyakwi duninna kidika.

²²Manna yakat dawak sau ūk muihni balna walaninabis karuk manna pasyakat yalalahwa balna kidika bik dininapahni karang. Israel sauni yakat batatahnna kapat dikultanama. Israel sulani balna pasyakat sau sahyaktanama mani kat, witingna yakat bik diatanama.

²³Sau ūk muihni balna kidika laih saunina duduna karang sulani as sauni yakat yalalahwa sauni kidika. Yang Dawanyang adika lawik yamnin yultayang.