Read Mayangna Ezequiel 6 Bible Online

Ezequiel 6 - Mayangna bible

Ezequiel 6

¹Papang yang akat kaiwi yayulna:

²“Israel asangni yakat talah, dawak yang ayangki kau duta diyultah

³aput ki: ‘Dakanauh, Israel asangni balna, Papang yaklauwi yulwa kidika asang balna yakat, asang ububulni balna yakat, was balna yakat dawak langni panunuhni balna yakat: Manna mamatna yakat kalatingkat wār kaiwarangki, dawak dawan dauh kau mamatna yultamana panina dutamana balna kidika balna bitik daukalmukna karang.

⁴Dawak manna sakripais bustamana pāni balna dawak walapni bustamana pāni balna bitik laih bahtikdis yamki, dawak bik yamting kat muih ahal kidika damanawan dauh muhni tani yakat dauwi bubukwarang.

⁵Israel balna dadauna balna muihnina kidika, damanawan dauh balna muhnina yakat ruhmlakki, dawak wakalni balna kidika yaihnit yakat uhtik awaihki.

⁶Kaput laih manna pamana balna bitik kau, dawak tawan nunuhni balna kidika laih bahwi disyamna karang, dawak dawan dauh balna kau sakripais bustaman pāni balna bitik laih daukalna karang. Sakripais busnin pāni balna dawak dawan dauh balna kidika bitik laih daukalpamna karang bitik kau; walapni busnin pāni bik tuklakna karang; manna di yamna mana balna bitik laih disna karang.

⁷Manna pasyakaupak muih mahni aiwi bubukwak kat dawak, amangkilatanama yang adika Papangyang.

⁸Kaunah yang lawik yamting manna kaupak, as as yaklalana karang daunin kaupak sangninaka duduna karang, dawak nisan balna pasyakat rawi kiuna karang.

⁹Dauwas yaklalana balna kidika witingna kidika nisan balna yakat, yang akat isningnakatna karang dawak isningna ahaiwarang, amput diyamting kat dutni wawauhna dai kidika[9] yang niking kauh barangni-awas dai kidika yulni, dawak yang kaupak yadawi naikau kalahwi dawan dauh balna yakat minitna yuyulna yulni. Witingna alas dutni yayamna kidika yulni tiningna dulihwarang, di tanit dutni yayamna kidik yulni.

¹⁰Kaput laih yang akat amangkilalawarang, yang adika Papangyang, dawak yang lawik dutni balna sihnik yulnayang dai kidika, dauh manah bilninalautasyang dai.’ ”

¹¹Papang yaklauwi yayulna: “Kulnam yakat dalani duta, tingma kau dawak kalma kau bik bauta; dalawa kidika yulni parasni sarahta, Israel tawanni di dutni palni yamna kidika yulni, bahang war kau dautanama, yuh kau, siknis kau bik.

¹²Pa naikau balna bang kidika laih siknis kau dadauwarang, dawak yaihnitkau bangkidika laih war kau dadauwarang, dauwas dawi yaklalawarang kidika laih yuh kau dadauwarang. Kaput laih kulnik daukalna kidika witingna minitna yakat lakki.

¹³Kidika muihni balna dadauna kidika, dawan dauh balna pasyakat tatalwarang kat, dawak sakripais bubuswa pāni yaihnit awaih yakat, asang ububulni balna yakat, asang nunuhni balna tuna yakat, pan nunuhni balna dinit yakat, kidika pāni balna yakat witingna daninawan dauh balna yakat walapni buswi kalalana dai, kaput laih yang adika amangkilalawarang Papang yang.

¹⁴Tingki dulauting witingna yakat wah diaki, wadah niningkauh kauhmak wanilang kaupak Ribla[10] kat tingpal niningkauh, witingna saunina kidika, bitik laih kauhmak wanilang manah yamki. Kaput laih amangkilalawang yang adika Papang yang.”