Read Mayangna Daniel 1 Bible Online

Daniel 1 - Mayangna bible

Daniel 1

¹Judá kingni Joacim, witing king kana kaupak kurih bās laihna yakat, Babilon kingni Nebokatnesar witing kiwi Jerusalén kidika awaihdakna dai witing kalbaunin muihni balna duwa kidika karak.

²Papang yaklauwi kaldawak Nebokatnesar kidika Joacim yakat laihna dai, dawak bik makatyulnin ūni paskau di mahni balna bang dai kidika bik witing tingni yakat bukna dai. Nebokatnesar witing muih balna kidika laihwi Babilon[1] yakat duwi kiuna dai, warau lani kau, Papang ūni kau di balna yakna dai kidika laih witing daniwan dauh ūni yakat uiwi āna dai;

³dawak baisa minit yakat Aspenaz, king ūni yakat wark yayamwa balna kidika taninatuna,[2] yakat kalyulna, Israel sulani, king walanibis balna kidika dawak bik muih nunuhni balna kidika walaninabis balna bik duwi kiuna atnin

⁴wawahma tanit yayamni kidika, sakahwa awas kat, sinsnina yamni atnin, di bitik yakat amanglana atnin, kaput bik witingna kidika sip atnin king ūni yakat wark kalahnin. Bahang kaput bik laih caldeos muihni balna tunina dawak uhulwa kidika bik laih sumalna karang.

⁵Nebokatnesar yaklauwi pakna witing dikaswa kidika dawak wain diwa kidika, simh wawahma balna yakat bik kaput bayahna atnin, dawak kaput bik kurih bās di sumalna atnin, kidika usnitkat laih sip karang witing warkni yakat āwak wark kalahna atnin.

⁶Adika wawahma balna laih bang dai, Daniel, Ananías, Misael dawak Azarías adika balna laih Judá sulani balna dai,

⁷adika balna witingna mahka king ūni yakat wark kalalahna mani kat ayangnina kidika satuk paknadai: Daniel kidika laih ayangni paknadai Beltsasar; Ananías laih Sadrac; Misael laih Mesac, dawak Azarías laih Abed-nego.

⁸Kaunah Daniel laih witing king kaswa kidika kaswas, dawak wain diwa kidika bik dīwas dai, maisihni kalnin-awas yulni, dawak kalyulna dai king ūni kau wark yayamwa muihni balna taninatuna yakat witing yakat pakwak kasnin dini balna kidika kaswi maisihni kalnin-awaski.

⁹Papang yaklauwi kalawak, king ūni kau wark yayamwa muihni balna taninatuna yaklauwi yamni kaltalna dai,

¹⁰kaunah kalyulna: —Yang kingki yakat yamanidutayang. Witing yaklauwi yayulna manna ais kasnamna dawak ais dinamna kidika, bahang manna kidika muihmana yamni-awas karang kat manna salahmana yakat karang king yaklauwi daunin yakat yawirlawarang kat.

¹¹Daniel yaklauwi kalyulna, king ūni maintalyang yakat, bahang kidika muihni laih, king ūni kau wark yamyang balna taninatuna yaklauwi āna dai, Daniel, Ananías, Misael dawak Azarías kidika balna yakat maintalna atnin yulni, bahang kalyulna:

¹²—Yang man kalma dinit yakat buktik yultayang, man dima yamyang balna adika karak traitalah: man lawa paktang kat ma salap kidika di minik manah yanabayayahwarang, dawak was karak.

¹³Kidika mani bayakwakat, man lakta talma wawahma ūk balna king kasnin kakaswa balna kidika dawak yangna karak, dawak usnit kat man ais yamnin kulma kidika yakat yamna man karang.

¹⁴Tunan muihni dai kidika yamni kulna, bahang ma salap kidika di minik dawak was karak manah dibayahna.

¹⁵Ma salap bayakwakat, witingna muihnina kidika tanit yamni dai, wawahma uk balna karak dawakat.

¹⁶Kaput laih, king ūni maintalyang kidika yaklauwi duwi kiuna, di kasnin dini, dawak wain bik, bahang kidika balna laih witing kasninna dai dawak bik dininna dai, kaunah di minik kidika dukiwi diawa dai.

¹⁷Adika wawahma arungka kidika Papang yaklauwi sinsnina yamni diana dai di bitik amanglana atnin, wauhtaya balna bitik kau dawak sins lani balna bik bitik kau. Baisa kidika minit yakat Daniel yakat kalana dai amana balna tanka kidika amanglana atnin.

¹⁸King yaklauwi mani āna dai, wawahma balna kidika witing muhni yakat duwi kiuna atnin, bahang kidika mani uman kiwi kana dai, bahang king ūni kau wark yamyang balna taninatuna kidika duwi kiuna wawahma balna kidika.

¹⁹King kidika witingna karak yulbauna, dawak wawahma balna uk kidika pasyakat as bik yakwas dai Daniel, Ananías, Misael dawak Azarías balna kapat, kaput bahang witingna laih king dini yamnin wawatna dai.

²⁰Wark balna bitik yakat sins lani tuhni balna dukih kidika yakat, king diyulwi dakana dai, bahang king talna witing sauni kau sukyah balna bang kidika minitna yakat wat salap praisni di amanglalawa dai.

²¹Dawak Daniel laih witing watna dai Ciro king kana kurih as laihwak kat.