Read Mayangna Daniel 10 Bible Online

Daniel 10 - Mayangna bible

Daniel 10

¹Persia kingni Ciro kidika kingkana kurih bās yakat, Daniel, ayangni uk kidika laih Beltsasar, witing amana kapat sahmuni talna, di ramh kidika, kaunah tanka amanglanin laih dadasni dai.[11] kaput kaunah Daniel witing kidika yakat yamni palni talna dai, bahang witing sip dai kidika tanka amanglana atnin.

²“Kidika mani balna, yang Daniel, uba kulnik bukna dai wīk bās.

³Di kasnin auhni balna kidika kastasyang dai, dimuihni dawak wain bik ditasyang dai, dawak di walapni balna bik kahtasyang dai, kidika wīkni bās kidika bayakna kat.

⁴Kurih kawak tatuna waiku kidika ma 24 yakat, yang Tigris wasni nuhni kungyakat sakyandai.

⁵Sirihni kat yang talnayang muih al as witing linin prakni kat kana, dawak banimak sitnin dini kidika laih gol kau yamnadai.

⁶Witing muihni kidika kipala lalahni yaringni kapatdai, dawak witing muhni kidika alwana lapwa kapatdai, dawak minikpa balna kidika kuhtuturni kapatdai, tingni balna dawak kalni balna kidika laih brās kapatdai, dawak witing dinit yulwa kidika muih mahni yulbabauwa kapatdai.

⁷“Amana kapat kidika laih yang manah sipdai talnik, kat yaihkit kau muih balna kidika laih amanglalawasdai, kat muihsak dadauna dawak kiri uiwi yakmamaldana.

⁸Yang alas sakkauna adika amana kapat kidika talnayang. Muihki bitik laih āki dis kapat pihni kalnayangdai, dawak ising-aitingkat paraski dis kalnadai.

⁹Yulbauwak dakik, sangkadautik buknayang, kaput laih sau yakat tusyangdai.

¹⁰Usnīt kat muih tingni as yalaihwi yadulauna, kaput laih tingki kau dawak kalaskimak kau lawik taihnayang.

¹¹Usnit kat yayulna: ‘Daniel, wais yakat Papang yaklauwi dalani talwa kidika, yamni dakah mayulki kidika: lawah kat yang adika yasihna manyakat,’ “Kidika yulni balna yulwi danh dawak, yukwinah lawanayangdai, lawik kalkikau ataknayang.

¹²Kaput laih yayulna: ‘Yamaduwinih, Daniel, kat tatuna kaupak di amanglanin dadasni kidika amanglakuhti yamnaman, dawak Papangma muhni tani yakat buknaman kidika, man mamatyulnaman balna kidika dakana. Kidika bahang yang aiwanayang.

¹³Insal, Persia kingni walanibis tatuna kidika nikingkauh yaklauna ma 21 praisni; kaunah Miguel, insal balna pasyakat tanit nuhni kidika, kaiwi ilp yana, kat yang alas alahwanayang dai bahang Persia kingni balna karak.

¹⁴Kaput bahang tanka yamni mayulna aiwanayang, man tawanma yakat di kalahwarang kidika ma balna kaiwarang yakat, kat man amana kapat talnaman kidika laih, kidika mani di balna kalahwarang tanka.’

¹⁵“Witing kidika yayulwak, yang sau yakat mikpa kidika talasakyangdai yul as bik yultas.

¹⁶Sirihni muih as kaina muih al walanibis as yang kungkimak yakat sukna. Kaput dawak kalyulnayang muhkitani kau sakkidika yakat: ‘Dakiwan, amana kapat talnayang kidika kulnik kaida kidika bunghdana, dawak paraski bik disdana.

¹⁷¿Amput man dima yamyang adika yulbauwarang yah, paraski bitik palni disdana kidika dawak wingkita bik sip dutasyang kidika?’

¹⁸“Kidika muihni, simh muih al walanibis kapatdai kidika watwi yasukna, dawak baisa paraski wisam yana

¹⁹dawak yayulna: ‘Yamaduwinih dawak bik kulta kalbauwinih. Papang dalani matalwi; ¡Kulnam dulautah, dawak bik kulnam dadasni yamtah!’ “Yulyabauwa sakkat, kaldakanayang paraski apis dunayang, dawak yulnayang: ‘Dawan, yulyabautah, waralaih paraski yanaman.’

²⁰Kaput laih yayulna: ‘¿Amanglatamanh, ais yamtik matalna aiwanayang kidika? Kat waralaih, wattik kalbauki bahang, insal kidika karak Persia kingni walanibis tatuna kidika. Dawak kidika karak kalbautik danh daki kat, Grecia kingni walanibis al tatuna insal kidika kaiwarang ki.

²¹Waralaih mayulki, wauhnitaya as ramh kidika yakat ulna kidika tanka: Kidika balna niningna yakat kalbautayang kidika, ilp dutayang Miguel kaupak manah, israel kingni walanibis al tatuna, insal kidika.