Read Mayangna Daniel 12 Bible Online

Daniel 12 - Mayangna bible

Daniel 12

¹‘Kidika minitni yakat kiwi kalahwarang Miguel, insal nuhni as witing tawanni nanitdakyang kidika. ‘Kulnin kaidinin awarni karang, kidika laih minit as, ma uk balna kapat as bik diskarang nesan balna kalahna kaupak. Kidika awarni kiwi kawakat, witing tawanni balna laih bitik laihwi yakna karang ayangnina wauhtaya yakat ulna balna kidika.

²Sau ū yakat mahni palni kamama balna kidika sahmumuhna karang: buas kidika ban kaput sangka atnin yakat dawak ūk balna kidika laih asalni dawak yamadangni ban kaput atnin yakat.

³Ahal sins duyang balna kidika muih mahni ta barangni yakat duwi uinadai kidika kisang kau yaringwa kapat kakalna karang; ¡yaringni kidika kaput ban karang, yala balna kapat!

⁴‘Kaunah, man, Daniel, adika dini balna malta apakta dutah, dawak wauhnitaya kidika tamp taihtah, mani witni kaiwi kawarang kat. Muih manas pini aiwarang uiwarang satni bik yayamwarang, sins kidika baisa walwi.’

⁵“Yang, Daniel, talnayang muih ahal bu bik yaklaunaraudai, waskung nakaskau, nakaskau.

⁶Dawak as kidika yaklauwi kalyulwi dakana muih al linin asnina kana sakkidika yakat, was balna minit yakat yaklauna sakdai kidika yakat: ‘¿Mampat kat adika dini tanit yamni adika danh yamtanamayah?’

⁷Muih al linin asnina kanasakdai kidika tingni ibin yakat dulauna, dawak Papang sangka kidika ayangni kau yakwi, yulna: ‘Taim bās kaupak papusbah, pasyakat Papang tawanni parasni daukalwidis yamwa kidika dawakarang kat, adika dini balna bitik laih danhkalna karang.’

⁸“Yulwa kidika yang dakanayang kaunah sip amanglatas danayang. Kaput laih kalyultik dakanayang: ‘Dakiwan, ¿ais kalahwarangyah, adika balna bitk usnit kat?’

⁹Dawak witing yaklauwi nangkitlana: ‘Man tāma munah tamatyakat yawah, Daniel, kat adika dini laih malnikau manah dunin karangki, mani balna witni kiwi kawarang kat.

¹⁰Wauhnin kaiwarangti yulna kidika, muih mahni laih wawauhna karang, dawak kidika munah maisihnidis dawak barangni bik kakalna karang. Muih dudutni balna kidika ban dutni yayamwa karang, di balna kalahwa kidika amanglalawas ban karang, kaunah ahal sins duyang balna kidika laih amanglalana karang di balna kidika bitik.

¹¹Ma 1,290 bayakna karang, ma bitik sakripais yayamwadai kidika laihwatwarang kaupak, dawak holi dini kidika resnipik dis dawak wayakani ahawarang kidika Papang ūni yakat.

¹²Isninglak karang, angdika alni tahawa kidika ramh kulwi, ma 1,335 bayakwarang kat.

¹³Kaunah man, Daniel, lapakta witni kat ban yakwah, dawak wingmata puhtah, kat mani witni yakat lawa mamat kidika duma.’ ”