Read Mayangna Daniel 3 Bible Online

Daniel 3 - Mayangna bible

Daniel 3

¹King Nebokatnesar yaklauwi pakwak gol kau di wayani as yayamna dai, naini niningkauh metro 30 duwa dai, dawak panuhni niningkauh laih metro bās duwa dai, dawak dipakna dai Dura wanilang yakat dukiwi dulausaknin, bahang kidika laih Babilon sauni yakat dai.

²Usnit kat kabamint tunani muihni balna bitik yulwi dukiuna, kalbauyang balna taninatuna, lalah maintalyang balna, wihta balna dawak tunan muihni uk uk balna bitik yulwak uina dai, witing sihwakat di wayani yamna alasnina pasyakat atnin.

³Adika nesan tunan muihni nunuhni balna kidika bitik uina dai di wayani yamna kidika yakat alasnina duna atnin.

⁴Adika alasnina tunan bahwarang muihni kidika yaklauwi yulni parasni sarahwi yulna: “Yamni dakanauh tawan muihni balna bitik, nesan balna bitik kau, dawak tūni sat sat yuyulwa balna bitik kau:

⁵Manna trompit puhwak dakanamakat, bara bik puhwak dakanama, paswi yakisdinin dini bik dakanama, dawak puhwi yakisdinin kapat dawak yakisdinin dini satni balna bik dakanama kat, manna king Nebokatnesar yaklauwi gol kau di wayani yamna yakat limbabahta mamatna yultanama.

⁶Wais kat limbabahwi minityulwas karang kat, di wayani yakat, kidika muihni laih kuh pasyakat rumhna karang.”

⁷Kaput laih, muih mahni kalududuhna sakkidika, puhnin dini kidika dakakana kat mahka limbabahwi minitna yuyulna, gol kau di wayani yamna yakat.

⁸Caldeos balna buas witingna king muhni yakat uiwi Ju wawahnima balna yulnina yayakna,

⁹aput yuyulna: —¡King ban sangka kaput karang dawak ayangni kidika laih dinitnakahwas ban duduwarang!

¹⁰King man lawa lā as ānaman, puhnin dini balna kidika puhwak dakakawarang kat, muih bitik gol kau di wayani yamna man yakat limbabahwi minitna yulna atnin,

¹¹angdika muihni yamwas karang kat kuh daihni yakat rumhana atnin.

¹²Ju muihni balna buas bangki, man lawa tunan muihni ānaman dai kidika Babilon sauni akat, man yakat rispik binibin bik mamawas ki, dawan dauh balna yakat bik minitna yuyulwas ki, dawak gol kau di wayani yamna yakat bik minitna yuyulwas ki. Kidika balna laih, Sadrac, Mesac dawak Abed-nego.

¹³Nebokatnesar kulnin daukalna, dawak yulwak duwi uina Sadrac, Mesac, dawak Abed-nego. Witing muhni yakat bangkat,

¹⁴diyulwi dakana: —¿Ramhyah manna dawan dauh balna yakat mamatna yultas mana kidika dawak gol kau di wayani pakting yayamna yakat bik mamatna yultasmana kidika?

¹⁵¿Manna ridi manah, puhnin dini kidika puhwak di wayani yamnayang kidika yakat limbabahta mamatna yulnamna? Manna mamatna yultas awanama kat, warminitni kuh pasyakat mana rumhana karang; ¿angdika daniwan sipyah manalaihwi yaknin?

¹⁶—Adika yulni sip kalbildas ki, —wawahma bās kidika kaput yuyulna—.

¹⁷Yangna Papangkina kau mikitna yultayangna kidika yaklauwi kuh dalhwa paskaupak yanalaihwi yakwarang, dawak man, king, yangna kau dutni yanayamnin kultaman kidika bitik yanalaihwi yakna karang.

¹⁸Kaunah baisa kaput yamwas karang bik, king dakah, man damawan dauh balna dawak gol kau di wayani yamna man yakat bik limbabahtik mikitna yultas awanaki ki.

¹⁹Nebokatnesar adika yulni dakawi, muhni bitik pauni kalna dai, kulnin daukalwakat, adika wawahnima balna bās niningna yakat. Kaput laih pakwak kuh kidika baisa biwi daihni yayamna minit yakat wat tiaskaubu praisni;

²⁰usnit kat kalbauyang balna tanit pararasni yakat pakna, Sadrac, Mesac, dawak Abed-nego balna yakat sitwi kuh payakat rumhana atnin.

²¹Wawahma bās kidika, witingna muih nunuhni praknina kakana yakauna laihwi sitwi kuh payakat rumhahana.

²²King yaklauwi yulna kidika minitni yakat yamnin yulna bahang, kuh kidika uba dahlna sak dai, bahang kalbauyang balna yakat paknadai kidika, wawahma bās kidika laihwi kuh yakat rumhana atnin, witingna kauh dibusyamna dai,

²³dawak wawahma balna kidika tingnina sitna yakat kuh pasyakat kawi uina dai.

²⁴Kaput dawak king Nebokatnesar muihsakdauwi yaklauwi, lā sumalyang muihni balna yakat diyulna: —¿Muih ahal bās sitdi kuh pasyakat rumhadas daih? — Agha —kaputki kalatwi kalyuyulna dai.

²⁵—Yang talayang muih ahal arungka tingnina uluhna tuluki, kuh pasyakat lapapakwi di as bik dilaihwas ki, ahal arungka kidika laih ensal kapatki.

²⁶Dawak Nebokatnesar dai kidika adika yulwīnah, kuh dalhwa sakkidika yaihnit yakat kiwi sarahna: —¡Sadrac, Mesac, dawak Abed-nego, Papang makau sakkidika dini yamyang balna alahwa akat aiwanauh! Bāspak kuh dalhwa paskaupak kalalahna,

²⁷dawak Babilon sauni kau tunan muihni balna kaluduhna bang dai kidika bitik yaihnit yakat uina, dawak kidika ahalni balna muihnina yakat apis bik buswas dai, basnina bik dawak asninana balna bik kuh wayau pur bik awas dai.

²⁸Kidika minitni yakat Nebokatnesar parasni sarahwi yulna: “¡Ayangni nuhni yamna ki Sadrac, Mesac dawak Abed-nego balna Papangnina yakat, kat witing innisal balna sihwak aiwi dilaihwi yakna, witing dini yamyang kasak balna kidika, king yulna yakat yayamwas dai, kau yamni kukulna dauna atnin, witingna Papangnina awas yakat minitna yulnin karak dawakat!

²⁹Kaput bahang yang lā ātayang angdika muihni adika balna Papangnina yakat dutni yulna karang kat, sarhna karangki muihnina kidika dawak ūnina kidika bik bahwi dis yamna karang, angdik, angdik pani kaupak karang bik, ais tūni yulwa karang bik, kat Papang ūk diski kaput laihwi yakna atnin.”

³⁰Kidika usnit kat, wawahma bās kidika Babilon sauni yakat wark tanit yamni kidika diana dai.