Read Mayangna Daniel 4 Bible Online

Daniel 4 - Mayangna bible

Daniel 4

¹“Yang, king Nebokatnesar, dukih yāwi kulnin aslah dunin dawak baraknin bik, tawan balna kidika, dawak sau bitik yakat bik, tūni satni balna yuyulwa kidika sau akat.

²Yang dukih yāwi manna amanglana atnamna di amangladas dini as Papang makau sakkidika yaklauwi yang kau yayamna kidika.

³¡Ampus nuhniyah taldas dini yamwa kidika! Witing king kawa kidika ban kaput karang, dawak parasni duwa kidika bik sulani tilahkau ban kiwarang.

⁴“Yang, Nebokatnesar ūki yakat yamni yalahtayang dai, dawak bik di manas palni dutayang dai.

⁵Kaunah pukta as kat alangwana tusyang kat, amana as talik muihsakdaunayang, dawak kulnik yakat, mikpa kau talayang kidika bik yaklauwi laih muihki bitik laih muihsak daunayang dai.

⁶Kaput laih sins nuhni duyang balna bangkidika Babilon sauni kau, diyulnayang dai aiwi yatalna atninna, dawak witingna yaklauwi tanka lāih yakwi yayulna atninna amana talnayang kidika.

⁷Sukiah balna bitik aina; di kaiwi kalahwas kau talwi yuyulwa muihni balna, sins nuhni duyang balna dawak yala yakat tanka walwi tatalwa muihni balna Babilon kaupak aina yakat yang diyulnayang dai amana talnayang dai kidika, kaunah witingna sip yayuyulwas dadana tanka balna kidika.

⁸Usnit kat Daniel kaina, witing ayangni ūk duwa kidika laih Beltsasar, yang dakiwan dauh kidika risnipik kau laih ayangni kaput duwa dai, dawak witing sangnika kidika laih Papang spiritni holi kidika yaklauwi tanit kawa dai, dawak amana talnayang balna dai kidika yang lawik aput kalyulnayang:

⁹‘Beltsasar, sukyah balna taninatuna, yang amanglatayang Papang spiritni holi kidika yaklauwi tamatuna duwi, dawak di amangladas balna kidika bitik amanglataman. Dakah waradika, yang amana talnayang kidika, dawak man lawa tannika kidik yāyultah.

¹⁰Yang alangwana tuskauna mikpa yakat adika talnayang: “Sau adika papus yakat pan nuhni naini as sak dai.

¹¹Panan kidika barakwi nuhni kalna dai; sutni kidika kisang kat kilwi kana dai bahang kidika kaupak sip dai sau adika naikau kidika balna bik talna atnin.

¹²Basni balna kidika nunuhni yayamni dai dawak minik bik dahni laihna dai, bahang kidika kaupak sip dai bitik bayahna atnin. Asangpas dini balna laih kidika panan dinit sanni yakat kakawa dai, di lawani balna kidik tingni rahni yakat ūnina yayamwa dai, dawak sau akat sangnika duwa balna bitik kidika panan kaupak duduwa dai.

¹³“Kidika minitni yakat talnayang dai kisang kaupak maintalyang insal as yaklakkaiwakat,

¹⁴dawak yulni parasni kau yulwa dai: ‘Pan kidika pihpamtanauh, tingni rahni kidika bik daktanauh, basni balna kidika bik, dawak minik balna kidika laih pini rumhtanauh. Kidika panani dinit kau di asangpas balna kalalangwa kidika bik kikirang dawak tingni kau di lawani balna bangkidika bik.

¹⁵Kaunah panani sarani dawak rikni balna kidika laih sau yakat datanauh; ayan dawak bras sinni kau sittanauh, dawak asangpas dinibasta balna pasyakat datanauh. Witing minit yakat diwas kidika utuhwang, dawak asangpas dinibasta balna kidika di tinglau, asangpas dini balna karak kalpakwi kakaswarang.

¹⁶Sinsni kidika daukalwarang, dawakat tinglau kapat as kalwang, dawakat kidika dutni kidika witing muihni yakat kurih tiaskau bu kalduwang.

¹⁷Adika kuduh la balna ahana kidika Insal balna yaklauwi, muih balna bitik amanglana atnin yulni kat Papang makau sakkidika laih parasni nuhni duwi sau muihni kingni balna minitna yakat, kat witing yaklauwi wais yakat kabamint kidika kalanin kulwa kidika yakat kalawi dawakat nesan as tanituna awi muih balna paskaupak tanit kulnin bukwa muihni kidika yakat.’

¹⁸“Adika kuduh, yang Nebokatnesar amana talnayang kidika. Waralaih Beltsasar adika tanka yāyultah, yang king awayang sauni akat sins duyang muihni balna as bik diski tanka yayulna atnin; kaunah man laih sipman yayulna atnam, kat Papang spiritni holi kidika man yakat bahang.

¹⁹“Kaput laih Daniel, witing ayangni Beltsasar kalatwa dai kidika, kulwi talna kidika minitni yakat, bahang yamaduna dai, witing sinsni balna yakat kaiwa kidika yulni. Kaunah yang king yang kat kalyulnayang: ‘Beltsasar, kulwi kalbauwinih yang amana talnayang kidika yulni, dawak kidika tannika bik.’ Beltsasar yaklauwi nangkitlana: ‘¡Alakaih, amana tannika bitik kidika king man waihmala balna minit yakat bukwangh!

²⁰Pan naini nuhni as kisang kat kilwika sakkat talnaman kidika king, dawak kidika kaupak sip dai kidika pa balna naikau bik talnin,

²¹basni bik yayamni duwa dai kidika, dawak minik bik dahni palni duwa dai bahang kidika kaupak sip dai kidika bitik yakat dibayahna atnin, panani dinit kau sanni duwak di kalni arungka duwa balna yaihnit yakat uiwa dai kidika, dawak panani tingni kau di lawani balna ūnina yayamwa dai kidika,

²²panan laih man, king, barakwi parasni nuhni kalna kidika, King man parasma kidika laih nuhni kalwi kisang kat kilna ki, dawakat parasma bik sau bitik yakat kiuna ki.

²³King, man talnaman, kisang kaupak insal as yaklakkaiwi yulna dai: panani kidika pihtanang sau yakat bukwak daukalpamtanauh, kaunah sarani kidika dawak rikni balna kidika bik sau yakat datanauh, kaput laih sarani kidika ayan dawak bras sinni kau sittanauh, dawak asangpas dinibasta pasyakat dapamtanauh. Dawak diwas kidika witing minit yakat bukwang, dawak dibasta balna kidika asangpas dini balna karak kalpakwi kakaswang kurih tiaskau bu pasyakat.

²⁴Kidika tanka laih Papang makau sakkidika yaklauwi, king man lāma yamna, kaput man namangkauh.

²⁵King, man muih paskaupak māyakna karang ki, dawak tinglau balna pasyakat masihna karang ki; dibasta kasma ki, turuh kapat, dawak diwas kidika man yakat masuihna karang muihma yakat. Kaput man kurih tiaskau bu lik-awama ki, angdika mani kat man amanglama kat Papang hibin kau sakkidika yakat, kat witing parasni nuhni duwi sau kingni balna bitik minitna yakat, dawak witing yaklauwi kabamint balna āwi, angdika yakat ānin kulwa yakat.

²⁶Sau yakat panan sarani dawak rikni bik danin yulna kidika tanka laih, king, man yakat watwi king lani kidika manakarang ki, kauna angdik mani kat man amanglama kat, Papang laih parasni nuhni duwa kidika.

²⁷Kaput bahang, king yang yul mayulki yakat daka yamta: barangni awah dawak watwi dutni yamwinih, dutni yamtaman kidika datah, dawak muih miniknakunni balna yakat ilp diata. Sipkat, king man kidika ban sangka awama kulnin aslah lani dawak tanit yamni baraknaman karang.’ ”

²⁸Adika yulni balna bitik Nebokatnesar yakat kalyulna balna kidika bitik kalahna:

²⁹Kurih as bayakwak usnitkat king witing yaklauwi lāpakwa lik dai ūni tuna kau langni yakat, Babilon yakat,

³⁰aput yulna: “¡Talnauh Babilon adika ampus nuhniyah! Yang, paraski nuhni kau yamnayang, king āwayang tawanni nuhni, bahang kidika tanka laih paraski nuhni dutayang kidika niningkana atnik.”

³¹Kidika yulbauwasakkat, hibin kaupak yulni as dakana, bahang aput yulna: “Adika dakah, king Nebokatnesar. Waradika king awaman kidik man dima awas ki;

³²muih paskaupak māyakna karang, kaput laih tinglau balna pasyakat awama; kurih tiaskau bu dibasta kasma, angdik mani amanglama kat Papang hibin kau sakkidika parasni duwa kidika, sau kau king balna bitik minitna yakat, dawak witing yaklauwi kabamint balna āwi, angdika witing kulwa yakat.”

³³Kidika minitni yakat amput lani yulwi yamna dai kidika yakat kiwi kalahna, Nebokatnesar dai kidika muih paskaupak laihwi yakna dai: turuh kapat dibasta kasna, dawak witing muihni kidika diwas kalsuihna, basni dawak tipisnimak balna kidika nanaina dai, di lawani butuni kapat dawak yakal nuhni tipisnimak kapat bik dai.

³⁴“Mani balna kiwi kawa kat, yang, Nebokatnesar, hibin yakat talnayang dawak ising ainayang sinski pini kalnayang dai kaupak yamni alahwanayang dai; kaput laih Papang makau sakkidika yakat ayangni nuhni yamnayang, dawak adika yulni balna kau ayangni nuhni yamnayang dai: ‘Parasma nuhni dutaman kidika ban kaput karang; king awaman kidika ban kaput karang sulani uk, uk kawi bayakwarang bik.

³⁵Witing niningyakat, sau muihni balna kidika laih di dauh as kapatki. Witing kulnin lani kat yamwi, hibin kau yamwa kaput dawak sau akat bik. Di as bik diski witing parasni niningyakat yaklaunin dawak kalyulwi dakanin bik, amput dawak witing kaput yamwa kidika.’

³⁶“Kidika minitni yakat lā yamni kidika dunayang, dawak yang kingki lani bik dawak ayangki nuhni kidika bik. Lā sumalyang muihni balna, kingki paskau muih nunuhni bang kidika bik aiwi yāwawalna kaput laih wattik yang sauki tanituna awanayang dai, tatuna king awanayang dai kidika karak tanit parasni dunayang.

³⁷“Waralaih, yang Nebokatnesar. hibin kingni yakat ayangni nuhni yamtayang kat witing di bitik yamwi kidika laih ramh palni ki dawak bik maisihni diski, dawak wais nuhni kaldakawa kidika muihni yakat sau kau lakwi.”