Read Mayangna Daniel 6 Bible Online

Daniel 6 - Mayangna bible

Daniel 6

¹King Darío yaklauwi, witing king kāwa sauni yakat gabamint manah 120 āna dai di balna kidika witingna yamna atnin.

²Kidika balna minitna yakat muih bās āna dai, witingna awaihwi talna atnin gabamint warkni balna kidika ampat yayamwapa, tanka laih king kidika dutni kalahnin awas yulni. Tunan muihni balna bās āna as kidika laih Daniel dai,

³witing laih sirihni palni as balna kidika tanitna bayakna dai, kat uba di amanglawa dai bahang, kidika yulni king kulna dai Daniel kidik tunan āna atnin witing kingkawa sauni yakat.

⁴Minit talyang balna dawak kabamint muihni balna karak kalpakwi tanka wawalna dai amput yamwi Daniel dutni as yamna kat kalyakna atnin kidika sauni pasyakat kingni lani kidika, kaunah witing laih al as barangni bahang dutni as bik kalyayakwas dai, kaput bahang king yakat uiwi yulwas dadana witing niningkauh.

⁵Kaput kaunah witingna kulwi uiwi aput yuyulna: “Mayang Daniel niningkauh di as bik yakdas karang ki, kaunah witing Papangni lani karak laihtak mayang sipkarang yaknin”

⁶Kaput laih tunan muihni awaihwi talyang balna dawak gabaminit balna karak aslah kalpakwi yulwi talwā dawi king Darío yakat uiwi aput yuyulna: —¡King man kidika sangka ban kaput awama!

⁷Gabamint muihni balna dawak tunan muihni balna ūk bik aslah kalahwi yulbauwi lā as ānin kukulna, bahang kidika laih, ma 30 pasyakat, muih as bik dawan dauh as kau bik minityulnin awaski, dawak al askau bik, kaunah king manyakat manah sipkarang minityulna atnin. Kidika lani kat wais dakawi yamwas karang kat, layanh ūni yakat rumhna karang.

⁸Kaput bahang king adika lani man parasni kalatah, dawak ayangma ultah, lani balna adika satuk wirlanin-awas yulni, medos dawak persas lani yakat sip- awas karang yakpamna atnin.

⁹King Darío yaklauwi adika lani parasni kalawi ayangni ulna dai.

¹⁰Daniel dakana dai kidika lani king yaklauwi ayangni ulna kidika, bahang ūni yakat kiwi, kama pani yaihnitkau windar kidika apahna, bahang kidik winnidar kaupak laih, lāih talwa dai Jerusalén tawanni nuhni kidika, dawak limbabahwi Papang kau ayangni nuhni yamna. Ma bitik pasyakat witing wat bās kaput yamwa dai, niningh.

¹¹Kidika ahalni balna kalpakwi uiwi kakana Daniel ūni yakat, dawak Daniel kidik Papang ayangni nuhni yamwi minit yulwasak dai.

¹²Usnit kat king yakat uina, witingna lā yayamna kidika kalyulna atnin: —King man lā as ānaman, kidika laih ma 30 pasyakat, dawan dauh kau minit yulwarang, kidika awaskat muih al as kau bik minit yulwarang kat, man yakat minit yulwas dawi, kidika muihni laih, layanh balna panina yakat rumhana karang atnaman, ¿kaput-awasdaih? King yaklauwi yulna: —Kaput dai. Lā kidika yakat yamna atnin ki, medos dawi persas lani yakat yamna atnin ki, bahang kidika lani laih sip-awas ki dauhyamna atnin.

¹³Kaput laih witingna baisa yuyulna: —Ju muihni as Daniel kidika rispik mawas ki dawak lā yakat bik rispik kalawas ki, uman talnayangna witing kidika ma as pasyakat wat bās minityulwi.

¹⁴Adika dakawi, king kulnin bukna, dawak tanka manas walna Daniel kidika laihwi yakna atnin. Ma kakiwasīk kat tanka walna laihwi yakna atnin,

¹⁵kaunah kidika ahalni balna watwi king yakat aiwi kalyuyulna: —King man yamni amanglataman, medos dawak persas balna lānina yakat, lā as kau king yaklauwi ayangni ulna kidika sip dauh yamwas ki.

¹⁶Kaput dawak king yaklauwi pakna Daniel kidika duwi uina atnin witing yakat, kaput laih layanh balna panina yakat rumhanin. Kaunah baisa rumhahawas tanit kauh, king yaklauwi Daniel yakat kalyulna: —¡Man Papangma, witing yakat kulnam bitik kau dini yamtaman kidika yaklauwi malaihyakna karang!

¹⁷Daniel layanh pani yakat rumhahana kat, panikungmak yakat kipala as kau puputna dai, dawak king witing tampni, dawak muih nunuhni balna tampnina kau bik taihna dai minit yakat, kaput laih lā yakat yamna atnin yulni.

¹⁸Usnitkat king witing ūni yakat kiwi masan dini kaswas dawi kalangna, dawak bik witing nining alasna duwa kidika bik yamwas dana dai; dawak bik pukta kidika kamas payahna.

¹⁹Payahlawak witing mahka yaklauwi kiuna layanh balna panina yakat.

²⁰Panikungmak yaihnit yakat kiwi, king sarahwi yulna: —Daniel, Papang sangka kidika warauni, ¿man Papangma kau kulnam bitik duta dini yamtaman kidika witing sip daih malaihwi yakna atnin layanh balna kaupak?

²¹Daniel yaklauwi nangnitlana: —¡King man kidika ban kaput sangka awah!

²²Yang Papangki innisal sihna dai, bahang witing yaklauwi layanh balna tininapas putna dai yang akat yakasnin-awas yulni, dawak Papang amanglawi yang dutni yamtasyang, dawak man namangkauh bik dutni yamtasyang kidika.

²³Kaput laih king kulnin alasna kalahna, dawak pakna Daniel kidika mahka layanh pani kaupak yakna atnin. Yayakna kat, witing muihni yakat kusna as bik dis dai, kat witing Papangni yakat barangni kulna bahang.

²⁴King yaklauwi pakwak, Daniel yulni yayakna balnadai kidika duahaina, dawak yalnina, walaninabis balna karak libitwi layanh balna panina yakat rumhahana, baisa uiwi bubukwas kat layanh balna laihwi kaswi bibisna dai.

²⁵Kaput laih king Darío yaklauwi sau muihni balna bitik yakat ulna, tūni satni balna yuyulwa balna yakat bik, aput diyulna: “Dukih yāwi manna kidika kulnamna aslah dawak baraknin lani dutanang kat,

²⁶dawak yang lawik paktayang, king āwayang sauni bitik yakat, rispik kalanin, nuhni kulnin Daniel Papangni yakat. “Kat witing laih Papang sangka ki, dawak witing laih ban kaput atnin ki, witing king kawa kidika laih sip daukalwas karang ki dawak parasni nuhni duwa kidika bik saran diski.

²⁷Witing laih laihwi yakyang, dawak di taldas dini balna kidika yamwi, kisang yakat, dawak sau yakat bik. Witing yaklauwi Daniel laihwi yakna layanh tipisnimak kaupak.”

²⁸Daniel laih witing muih nuhni as dai Darío kingkawa sauni yakat, dawak king Ciro Persia kau kingkawa dai yakat bik.