Read Mayangna Daniel 8 Bible Online

Daniel 8 - Mayangna bible

Daniel 8

¹“Belsasar king kana kurih bās yakat, yang Daniel amana as talnayang dai, yang muhnilau talnayang dai kidika kapat uk.

²Amana kau talnayang kidika Susa tawanni yakat sakyang kapat dai. Elam sauni pisni yakat, dawak Ulai wasni kung yakat.

³Naikau talnayang, waskung yakat kuts pihni as sak dai, tamni nanaini bu duwa dai, as kidika laih witni kau kalahna kauna kau tanit naini dai.

⁴Talingkat tamni kau wauhwa dai, makawa nining yakat, tingpal nining yakat, dawak wadah niningyakat bik, asangpas dini kidika awas kat tinglau as bik sip-awas dai witing nining yakat yaklaunin. Witing kulnin lani kat yamwa dai, dawak baisa, baisa laih parasni yamwa dai.

⁵“Di talnayang balna kidika baisa kulnik yakat kultasakyang kat, yamni ising aiting kuts almuk as ma kilwa kaupak kaina, parasni kiri kaina, kalni kidika sau atakwas. Adika kutsni almuk minikpa walsah yakat tamni nuhni as duwa dai,

⁶sīp almuk tamni bu duwa dai yaihnit yakat kiwi, bahang kidika laih waskung yakat sakkat talnayang dai, bahang tamni yakau parasni bitik palni pāna dai.

⁷Dawak tamni bu kidika bahyamna dai, sīp almuk kidika parasni dis dai niningyakat yaklauna atnin. Usnit kat kuts almuk kidika yaklauwi sau kat bauwi lakna dawi kalni kau atakna

⁸“Kuts almuk dai kidika baisa parasni kalna, dawak baisa parasni kalwa yakauna tamni dai kidika tirhna, kidika pani yakat tamni arungka kalahna, bahang kidika balna laih wing tani arungka nining yakat yulna dai.

⁹Kidika balna paskaupak as kidika tamnibin ūk kalahna, dawak bik naini palni kalna wadah niningkauh, ma kilwi niningkauh, dawak sau nuhni yaksihni[7] niningyakat bik.

¹⁰Barakwi ban kilwi kiwi kana hibin kau kalbauyang balna bangkidika yakat, dawak yala balna kidika buas tuklakna dawi kalkau atakna.

¹¹dawak baisa, kalbauyang balna taninatuna yakat bik kiwi niningkauh yaklauna, ma bitik[8] yakat sakripais bubuswa dai kidika laihwatna, makatyulnin pani yakat bik dutni yamna.

¹²Dutni palni yamna kidika laih witing kalbaunin duwa muihni balna kidika sakripais[9] bubuswa pani yakat kiwi pani duna, dawak di ramh balna kidika bitik laih dauh yamna. Witni kat witing amput yamnin kulna kidika yakat yamna, dawak di bitik yamna kidika yakat minit bayakna.

¹³“Usnit kat, insal as yaklauwi insal ūk yakat kalyulwak dakanayang: ‘¿Mampat kat danhkalwarangyah, sakripais buswa pani kau talda kidika? ¿Ma ampus ban kaput karangyah, dutni nuhni yamna kidika Papang pani holi kau, dawak simh kidika yakat kasak kulyang muihni balna bik bangkidika, bahang kalni kau atakna kidika?’

¹⁴Nangnitlana kidika laih aput dai: ‘Masan, mapiris manah 2,300 kat. Kidika bayakwak usnitkat, holi pani kidika maisihni dis yamna karang ki.’

¹⁵“Yang, Daniel, adika amana talik tanka amanglakuhtik kulta sakyangkat, yang muhkit yakat muih al wayani as kapat kalahna,

¹⁶dawak muih dinit as Ulai wasni kaupak kaiwak dakana yang, bahang aput yulna: ‘Gabriel, adika alni akat di balna tanka kidika lāih kalyultah.’

¹⁷“Kaput laih witing kidika yang yaihkit yakat kaina. Yang muihsak daunayang, dawak limbabahtik muhki kidika sau kat laknayang, kauna witing yayulna: ‘Muih al walanibis, man yamni amanglata awah adika di balna talaman kidika laih mani balna witni tanka.’

¹⁸“Witing yulyabauwa sakkat, sangka dautik sau yakat buknayang; kauna witing yaklauwi yalaihna, kalki kau lawik atakna atnik,

¹⁹dawak yayulna: ‘Yang tanka mayulki, Papang kulnin daukalna kidika kaupak bayakwak ais kalahwarang kidika, di balna talnaman kidika laih mani witni balna yakat karang ki.

²⁰‘Sīp almuk tamni bu duwa kidika tanka laih Media kingni balna, dawak Persia king.

²¹Kuts almuk talnaman kidika laih Grecia kingni, witing minikpa walsah kau tamni nuhni as talnaman kidika laih king tatuna kalahwarang kidika ki.

²²Tamni tatuna kalahna dai kidika bahbukwak pani yakat ūk arungka kalahna dai kidika laih, adika sauni akat king arungka kalalahwarang ki, kauna tatuna parasni duwa dai kapat laih-awas karang ki.

²³‘Adika kingni balna bu, king kakawa kidika manina danh kalwarang mani kat, dawak dutni lani kidika nuhni palni minit bayakna karang kat, king tapani dadasni as, dawak bik alas yulnin lan palni as kawi parasni kidika duna karang.

²⁴Parasni nuhni duna karang ki, kauna witing alas parasni-awas karang ki; witing di daukalwarang kidika nuhni palni daukalna karang ki, dawak di bitik yamwarang yakat minit bayakna karang ki. Muih ahal pararasni bik minit bayakna karang ki, dawak Papang tawanni manas bik.

²⁵Witing alas yulwi lan bahang, alasni lani kidika minit bayakna karang. Witing manah kapat kaldakanin kidika kalbangwarang dawak muih manas dadauwas kapat kaldakakawa dai kidika, malni lani kau sangninaka dakna karang ki. King walanibis balna taninatuna kingni walanibis yakat, niningkauh yaklauna karang, kauna witing yaklauwi daukalpamna karang ki.

²⁶‘Amana kau, masan balna, dawak mapiris balna talna kidika laih, di ramhki, kaunah malni yakat dutah, bahang adika dini kaikalahna karang ki ma mahni bayakwak kat.’

²⁷“Yang, Daniel kaldakanayang paraski dis dana dai, ma buas siknisyang dai. Usnīt kat, lawik gabamint warkni balna yamnayang dai. Kauna kulnik kulwi kalbauna dai, amana talnayang kidika yulni, kat yang tanka dutasyang bahang.