Read Mayangna Oseas 10 Bible Online

Oseas 10 - Mayangna bible

Oseas 10

¹Israel laih wain minik dahni laihna ki, dawak minik kidika baisa dahni laihwakat, sakripais busnin pāni bik baisa manas yamna dai; dawak saunina kidika bik baisa yamni nuhni dawakat, daninawan dauh kinipala kidika baisa tanit yamni nuhni dai.

²Israel kulnin kidika bu sahwi kalahna, dawak waralaih dutni yamna kidika minit lauwarang ki. Papang yaklauwi witingna sakripais bubuswa pāni kidika daukalmukwarang ki, dawak daninawan kinipala balna kidika bik tukwi lakmukwarang ki.

³Waralaih adika tawanni yulwarang: “King dismayang, kat papang kau nuhni kulnin lani kidika dismayang bahang. Kauna ¿king kidika ais yamnin sipyah mayang mayulki?

⁴Dauh manah yulbauwi, pramis balna kidika alas manah yamwi; witing lani balna kidika laih pan as puisin duwa kapat ki, asangpas kau bararakwa kidika.”

⁵Samaria muihni balna kidika diyukwi; tuninaruh, Bet-avén[31] disna kidika yulni kakaidi. Kidika yulni kakaidi tawan dawak tunan muihni balna bik, kat witingna alasnina kidika disna bahang.

⁶Tuninaruh wayani kidika Asiria yakat duwi kiuna karang king yakat kalana atnin. Kaput laih Efraín kidika asalni nuhni kalahna karang, Israel kidika asalni kalahna karang daniwan dauh[32] kidika yulni.

⁷Samaria kingni kidika disna karang, sihm di yayahbin as was minit yakat uruhnwa kapat.

⁸Dawan dauh balna panina kau Israel dutni yamwa dai kidika balna bitik laih daukalpamna karang. Sakripais buswa pāni balna dai yakat wakal ukusna karang, dawak muih balna yaklauwi asang balna yakat diyuyulwarang: “¡Maimaltanauh!”, dawak asang nunuhni balna yakat bik diyuyulna karang: “¡Mamikit yakat buktanauh!”

⁹Papang yulwi: “Israel dutni yamna kidika dawas ban yamwi, Gabaa kau dutni yamna dai kidika kaupak. ¡Dutni yamwa kidika ban dawas yamwi! Kidika bahang, war kidika ditaihna karang adika muihni dudutni balna Gabaa kau bangkidika yakat.

¹⁰Adika tawanni yakat wah kalana awaki, angdika mani kalanik kultayang yakat. Muih mahni kalududuhna karang witing niningkauh, yang lawik wah kalating kat dutni yamna kidika yulni.

¹¹“Efraín laih turuh yal sirau limahna kapat dai, plawar minik sakwi yaknin kidika laih dukih kalawa dai. Yang lawik dinimak yakat pan anayang kar kidika murna atnin; dawak Judá laih di dahnin pāni kidika tukwi yudutni yamna karang, dawak Jacob laih rik murna karang.

¹²Diyulnayang: Manna lā yamni kidika dutanauh, dawak dalani lani kidika minik bahtanauh. Di dahnin sauni kidika watta ridi yamtanauh, kat waradika laih Papang walnin mani bahang, witing kaiwarang kat sangka atnin wasni kidika duaiwarang ki manna mamatna yakat.

¹³Kauna manna laih dutni kidika dahnamana, dawak lā awas kidika bahnamana, kaput bik alas minik kidika kasnamana. “Kalbaunin kārni balna[33] yakauh rahm kulnaman bahang, dawak bik kalbaunin mahni balna yakauh kulnamana bahang,

¹⁴manna pasyakat pini kiri yaklalawarang, uma pararasni balna kidika daukalna karang, sihm Salmán kingni Bet-arbel kau daukalna kapat kalbabauna mani yakat, nanangni dawak walanibis bik taihwi lababanna dai.

¹⁵Manna yakat bik sihm kaput kalahna karang, Betel muihni balna manna dutni nuhni yamnamana kidika yulni. ¡Israel kingni kidika ma payahlawa yakat dauna karang!