Read Mayangna Oseas 13 Bible Online

Oseas 13 - Mayangna bible

Oseas 13

¹Efraín muihni balna kidika yulbabauwa kat, Israel muihni ūk balna laih rispik lani kat dai; kauna Efraín dauna witing alas pāt duwi Baal yakat minit yulna kidika yulni.

²¡Dawak baisa dutni yayamwi! Lalahnina balna yakau arwi dawan dauh wayani yayamwi, witingna amput yamkih diawa yakat. Usnit dawak yuyulwi: “¡Sakripais yamta kalatanauh!”, muih balna laih turuh almuk wayani dawan dauh balna yayamna yakat uhumwi.

³Kaput bahang witingna kidika sihm mapiris mukusni kapat karangki, dawak payahlawarah yalawas bukwa kapat bik karang ki, bahang kidika laih payahlawak dislawi, di unitak wing wauhwi dukiwa kapat bik karangki, dawak wayau kapat bik karang ki.

⁴Papang yulwi: “Yang man Papangma yang, Egipto kau sakman dai kidika kaupak; ūk balna yakat dawan kapat ditalwinih, kauna yang akat manah yatalah, kat yang manah ki malaihyakyang yang kidika.

⁵kauhmak wanilang sauni daihni yakat yang mainmatalnayang.

⁶“Kauna manna kasnamna kidika minit bayak dunamana kat, manna manah kaldakamana ismangna yakat, dawak yang laih damatnakahna dai.

⁷Kaput bahang, witingna niningna yakat layan kapat awaki, dawak nawah bulni tapas kau tahawa kapat lik awaki.

⁸Nawah yal walanibis disna kat walwa kapat witing yakat alahwana awaki isning kidika bitik daktik dis yamki. Layan kapat kidika yakat kasna awaki.

⁹Madaukalna awaki, Israel, muih as bik sip-awas karang malaihwi yakna atnin.

¹⁰¿Waralaih angkat sakyah kingma kidika, tawanma nunuhni balna bitik kau laihwi yaknin? ¿Tamatuna muihni balna angkat bangyah, kidika balna yakat kingma yulnaman dai kidika?

¹¹Antik man yakat king manayang dai, dawak antik man kaupak king kidika madakyaknayang.

¹²“Efraín dutni yamna kidika ulna sakki; witing dutni yamna kidika ulna sakki.

¹³Israel laih batanh danin awarni kidika kaina ki, kauna walanibis kidika mutu, sip amput batanh dawarang pāni kat bik duwas ki.

¹⁴¿Dawak sau ū parasni kaupak laihtik yaknik kidika sip karang yah? ¿Daunin kaupak laihtik yaknik karang yah? ¿Angkat sakyah[40] daunin man parasma kidika? ¿Angkat sakyah sau ū man dutma kidika? ¡Adika muihni balna akat wattik minikun dakanin kidika dutas awaki!”

¹⁵Israel kidika dibasta kapat[41] puluwarang bik, ma kilwa kaupak wing kaiwarang, kauhmak wanilang kaupak wing parasni wauhwa kidika yaklauwi kusulawarang, dawak wasni balna kidika bitik laih buhlana karang. Witing waihnila balna kidika yaklauwi lalahni balna kidika dakyayakna karang.

¹⁶Samaria tawanni kidika wah duna karang kat Papangni niningkauh yaklauna dai bahang. Isparah kau dadauna karang, dawak walaninabis balna kidika sau yakat ruhwi babahrna karang, dawak, yayal muih kararuk balna kidika laih pipitna karang.