Read Mayangna Oseas 14 Bible Online

Oseas 14 - Mayangna bible

Oseas 14

¹¡Israel nawatta yawah, man Papangma yakat, man dutni yamta buknaman kidika kaupak!

²Papang yakat nawatta aiwanauh, adika makat yulnin yulni balna kidika duta yawanauh: “Dutkina balna bitik datang diswang dawak yamni yanadutah ayangma nuhni yamtayangna kidika.

³Asiria kidika sip yanalaihwi yakwaski, dawak bik sip aras kau ilwik irik lawas awanaki ki. Uman yultas awanaki ‘yangna Papangkina’ yangna tingkina kau yamnayangna kidika, kat Dawan man yakat manah, warau kidika minikun talnin lani yakwi.”

⁴Papang yulwi: “Kulnam annin manah dutaman kidika kaupak yamni mayamki; dalani matalna, man yakat kaput mayamnin awasdai bik, uman kulnin daukalnin kidika witingna kaupak yaklana.

⁵Israel nining yakat yang adika diwas kapat awaki, dawak witing kidika puluni yakna karang dipulu kapat. Dawak rikni balna kidika, parasni duna karang sihm líbano asangni kapat;

⁶tingni balna kidika nunuhni yakna karang, sihm olib tingni nunuhni yaksihn kapat, líbano suhunni walapni balna kapat karang.

⁷Israel kidika watwi yang tingki dinit yakat yamni karang; kaput laih plawar panina kapat yamni barakna karang, wain kapat puluna karang, dawak ayangni nuhni karang, Líbano wainni kapat.

⁸Efraín yulwarang: ‘¿Dawan dauh yakat ais baisa kulki yah?’ ¡Yang lawik maintalayang tawanki kidika! Yang laih awas sangni ban kidika kapat yang, dawak tawanki kidika yang akat minik kidika yakna karang walwi.”

⁹Muih sins duyang balna, adika yulni amanglalawang: Papang tani balna kidika laih barangni ki, dawak barangni muihni balna kidika usnit uhuiwi; kauna muih dudutni balna laih kidika yakat kalnina babauwi.