Read Mayangna Oseas 4 Bible Online

Oseas 4 - Mayangna bible

Oseas 4

¹Israel balna, manna dakanauh Papang yulwa kidika. Witing adika sauni muihni balna karak kalbilwi, kat muih pasyakat di rahm kidika diski, barangni lani, dawak Papang tanka bik amanglalawas ki.

²Kauna nawatni kauh laih, alas yulnin laih banghna palni ki, muih inin, malnin, yal karak dawak al karak dutni yamnin, kaput bik laih muih kidika dauwi kaiwasak ki.

³Kidika bahang adika sauni kulnin bukna manah ki; kidika yakat baisa sangka bangkidika uman parasnina dis dana ki; asangpas dini, dawak di lawani balna kidika dadauna ki, kaput bik waspadini balna bik.

⁴Papang yulwi: “¡Muih as bik yulnin-awas ki, ūk dutni yamwa kidika, dawakat bilnin bik awaski! Yang yultayang kidika laih man namang yakat manah ki, sumalyang.[13]

⁵Man madah palni bukma, dawak pukta yakat laih bukna karang man karak prapit kidika, dawak man laih madaukalpamki ki.[14]

⁶Yang tawanki kidika di amanglawas ki, kidika bahang kaldaukalpamna ki. Dawak man sumalyang nuhni man kidika di amanglanin kidika dukih awasman dai, kaput bahang yang bik man yakat sumalkiyang warkni kaupak mayaktayang.

⁷“Sumalyang nunuhni ampus mahni kalalahna kidika, kaput bik laih yang nikingkauh baisa mahni dutni yayamna dai, kaput bahang witingna risninapik kidika ninignakauh wirlaki.

⁸Yang tawanki dutni yamwa kidika kau sangka ki, kidika bahang, dukih diawi, yang tawanki kidika baisa dutni yamwak talna atnin.

⁹Sumalyang balna bik tawan yamwa kapat yayamwi, witingna yayamwa yulni kidika wah diaki ki.

¹⁰Papang dini yamnin dai kidika dadana bahang, di kakaswarang, kauna dibanghwas karang; yal dawak al karak dutni yayakwarang kauna walaninabis yayakwas karang.

¹¹“Yal karak payahnin dawak wain karak libitwak, la kat yamnin dai kidika dispapamwi.

¹²Yang tawanki kidika, pan kau dawan dauh wayani yayamna yakat di kalyulwi dakakawi, pan bin naini as duwi di balna kaikalahwas kidika tanka wawalwi. Yal karak payahnin kidika uba minitna bayakna, yang tawanki kidika ta dutni yakat kiwi: Papangni kaupak naikau kalahwi di dutni yamwi.

¹³Asang tuna kau balna yakat, walapni bubuswi, sakripais bubuswi, dawak pan nunuhni dinit kau sanni yakat yayamwi. Kidika bahang manna walamanabis yayal balna kidika bik ahal karak kalalangna dawak walamanabis yalnina balna bik.

¹⁴Kauna, yang walamanabis yayal balna yakat wah diatas awaki, dutni yayamna kidika yulni, kaput bik walamanabis yalnina balna yakat bik, kat manna palni dutni yamtamana bahang, sakripais busnin kat yayal dutni balna karak yawamana kalpakta, kidika yalni dudutni balna laih al karak dutni yamnin prinias yayamwi. ¡Kaput laih tawan as kidika kawi kiwi, sinsni sirihni awas kidika yulni!

¹⁵“Israel yal karak payahyang man kat, kauna Judá laih dutni yamnin awaski. ¡Manna Gilgal yakat uiwinih, dawak Bet-avén[15] yakat bik kilwi uiwinih, dawak Papang ayangni kau bik yakta yuyulwinih!

¹⁶Israel laih muih dutni ki, turuh yal sirau minikratni kapat, kaput kidika, ¿Papang witing maintalwarang yah sihrsihr yamni yakat sihm sīp bin as kapat?

¹⁷Efraín[16] kidika dawan dauh yakat bukna. ¡Bitik laih wasak diyang muihni balna kapat uiwi bubukna! Wat wat dutni yayamwi, witingna rispik lani, dawak, asalni lani kauh wawalwi.[17]

¹⁹¡Wing kaiwi didulauwi aiwarang, dawak dawan dauh yakat kukulwa dai kidika asalnina kalahwarang!