Read Mayangna Oseas 6 Bible Online

Oseas 6 - Mayangna bible

Oseas 6

¹Manna bitik aiwanang nawatdi mawanang Dawan yakat. Witing yaklauwi dutni maiyamna, kauna witing yaklauwi watwi yamni maiyamwarang ki ma muihki yakat maidakna kauna kidika witing yaklauwi yamni maiyamwarang ki.

²Sirihni mamuihki yamni maiyamwarang ki, maidulauwarang ki witing muhni tani yakat yamni yalahna atnin.

³¡Mayang Papang karak kaltalyang malahwanang! Papang kidika mayang akat kaina karang rahm palni, sihm mapiris ma kilwa kapat dawak bik diwas sau yakat bukwi suihwa kapat kurih mani kat.

⁴Papang yulwi: “¿Efraín, man yakat ais mayamki yah? ¿Judá, man yakat ais mayamki yah? Manna yangkau dalani yatalamana kidika laih sihm mapiris sau kau mukus bukwa kapat ki, dawak bik payahlawarah diwas bukwa kapat ki.

⁵Kidika bahang, prapit balna munah pakting ihina dai, dawak yang yulki munah bik inayang dai. Yang laki barangni kidika awas yaringni kidika kapat ki.

⁶Yang manna kaupak di as dukih yawa kidika laih manna yang kau dalani yatalnauh, kauna yangkau sakripais busnamna laih awaski, kauna yang adika Papang kapat yakultanauh, sakripais laih awaski.

⁷“Kauna yang tawanki kidika Adán kapat ki, yang ais diyulnayang yakat yayamwas ki, yang niking kauh barangni awaski witingna kidika.

⁸Galaad muihni balna laih dutni yamyang balna, witingna kalnina atatakna balna kidika laih ā manah ki.

⁹Sumalniyang balna kidika laih di mayang balna, muih balna yakat tanina tahahawi laihwa atnin, dawak laihwi iwi dutni yayamwi, Siquem tani yakat.

¹⁰Israel muihni balna yakat talnayang di yamadangni kidika: Efraín laih la bahna, dawak Israel laih dutni kidika bitik witing yakat kallaihna.

¹¹Judá man laih wah manik mani kidika yaknayang sakki. “Yang tawanki Israel suerniti kidika satuk, wirlakuh tingkat,