Read Mayangna Oseas 7 Bible Online

Oseas 7 - Mayangna bible

Oseas 7

¹dawak yang tawanki Efraín, Samaria kidika yamni kalyakkuh tingkat, witing dutni balna kidika laih kalahwi. Kat witingna bitik kidika laih alas yulnin kidika lan kalalahwa bahang; dimalyang balna kapat muih ūnina yakat kakawi, dawak ta pas yakat muih dinina kidika tingninapas kaupak dakyayakwi.

²Witingna kukulwaski dutnina balna bitik yang laihtik dutayang kidika. Waradika laih witingna dutni yayamna yulni diawaihdakna ki bahang kidika laih yang mikpa tani yakat ban sakki.

³“Witingna dutnina dawak alas yuyulwa kidika kau king yakat alasna kalyayakwi, dawak tunan muihni balna yakat bik.

⁴Witingna bitik kidika la bahyang balna; sihm plawar busnin pāni kapat ki, plawar busnin pāni kidika kuh biwak yamni dahlwi dawak dasakwi, kaput laih witingna tahahawi plawar kidika pupuhna atnin.

⁵Mayang makingki ahana mani dai yakat, tunan muihni balna yaklauwi diyayamwa kat siknis kalalahna dai, wain daihni kau. ¡Dawak witing yaklauwi tingni yuna dai sarahni tatalwa muihni balna yakat!

⁶Witingna isningna kidika dutni kukulna, sihm plawar busnin pāni kapat, plawar busyang kidik pukta kidika bitik kami, kauna payahlawak plawar busnin pāni kidika dahlna sakki.[21]

⁷Witingna bitik kidika plawar busnin pāni kapat di dahlwi, bahang kingnina balna bitik dibusyamna. Kingnina balna bitik laih bubukna, dawak muih as bik diski yang akat yayulna atnin.

⁸“Efraín kidika muih ūk balna karak aslah kalpapakna. Efraín laih sihm tuhrtia muhni nakaslah busna kapat ki.

⁹Kaltalyang muihni-awas kidika yaklauwi parasni bitik dis yamna witing isning aiwas kat. ¡Witing basni bitik pahni kalna, witing isning aiwas kat!

¹⁰Israel witing manah kapat kaldakawa kidika laih witnis as ki witing nining yakat. Kidika bitik kalahna kauna witingna Papangnina yakat wawalwas dai.

¹¹Efraín laih buhtuku kapat ki, mutu, di amanglawas ki, Egipto yakat ilp yulwi, usnitkat Asiria yakat bik kiwi...

¹²Kauna witingna kidika yakat uiwarang kat, minitna yakat laihnin dini kidika ruhmki ki, sihm uhbinina kapat diyamting bubukwarang, witingna dutnina yulni[22] dilaihna awaki.

¹³“¡Alakaih, witingna yangkaupak naikau yaklalana kidika! Dutni kidika dilaihna karang, kat yang nikingkauh yaklalauna bahang. Yang laihtik yaknik kultayang, kauna nikingkauh alas yuyulwi.

¹⁴Witingna panina yakat kalangna bangbang bik sararahwi, kulninna kidika rahm kulwi laih yuyulwas ki. Wain dawi plawar minik kidika yulnin yulni muihnina yakat dadakwi;[23], ¡Yang niking kauh yaklalauna!

¹⁵Yang lawik sumalnayang dai, dawak tingnina yakat bik parasnina dianayang dai, kauna witingna yang niningkauh dutni yayamna.

¹⁶Dawan dauh balna yakat wiryaklalana;[24] sihm las kawaini kapatki, dawak sinibang kidik ruruhmwa yakat kiwas ki. Witingna uba dutni yayamwa kidika yulni tanina tuna balna kidika isparah baini kidika kau dadauna karang, dawak Egipto yakat sarahni diyuyulna karang.