Read Mayangna Oseas 9 Bible Online

Oseas 9 - Mayangna bible

Oseas 9

¹Alasna kalahwinih Israel, alasna kalahwi sutwinih, tawan ūk balna yayamwa kapat, kat man laih lā bahnaman, Papangma ruhmta danaman yulni. Di minik balna unitak sakwi yayakwa pāni yakat la bahtaman minit kidika yakta dukih mawi.

²Israel muihni balna kidika di minik dawak wain bik diskarang; wainni wisam kidika mahni awaskarang.

³Efraín kidika nawatwi Egipto yakat kiwarang, dawak Asiria sauni yakat kasnin dini awas kidika kaswarang. Papang sau yakat baisa yalahwas karang,

⁴baisa wain didiwas karang Papang ayangni kau, dawak yakat bik baisa sakripais bubuswas karang. Witingna plawar busna kakaswarang kidika laih dalani wauhnin as kapat karang, dawak wais kaswarang kat muihni kidika maisihni kalna karang. Kidika planiwar busna kakaswarang kauna Papang uni yakat laih duwi uiwas karang.

⁵¿Alasna mani yakat manna dis yamtanamayah, Papang lasnina yamni mani yakat?

⁶Witingna kikirana, bahwidis dawarang kidika yulni, bahang Egipto yaklauwi diduwarang, dawak Menfis yakat dinununa karang. Witingna lalahnina kidika ortiga manah bahngna karang, dawak ūnina lababanni papakna dai yakat wakal manah ukusna karang.

⁷¡Wah dunin mani kidika uman kiwikana! ¡Lauwi dianin mani kidika uman kiwikana! ¡Israel balna amanglalana karang umani ui'kakana kidika! Manna yultaman: “Prapit laih tapani dadasni ki. Muih as papang spiritni kalana kidika laih sinsni disna.” Yuyulwi, kat witingna kidika di dutni manah dibahngna bahang, dutni talnin kidika nuhni duduwi.

⁸Papang pranipit kidika witing yaklauwi āna mayakat kilwi talwa atnin Efraín yakat, kauna manna lawa tanipas yakat kal laihnin dini kidika laknamana; ¡Papang uni kidika bik dutni manatalwi![29]

⁹Bitik palni daukalna, Gabaa mani balna dai kapat. Kauna dutni yayamna kidika Papang laih dinitkahwas karang, dawak wah diana karang dutni yayamna kidika yulni.

¹⁰Papang yulwi: “Israel kidika kalpakna yang kat alasna alahwanayang dai. Yuldarang kat kauhmak wanilang kau wain minik yakda kapat. Manna muihmana bararak balna dai kidika laih yang mikpa yakat ani minik damni kapat dai. Kauna Baal-peor yakat uina kat dawan dauh balna yakat wiryaklalana dai, dawak dutni palni kakalna dai, sihm dawan dauh kapat.

¹¹Efraín nuhni kalna kidika uhubin kapat yaklauwi kiuna karang. Muihbinina kidika baisa batanh dadawas karang, muih yal muihkaruk kidika bik diskarang, dawak baisa muih duduwas karang ki.

¹²Dawak kaput bik ban walaninabis mumuhwarang, kat, yang lawik didakyakna awaki, as bik datas awaki. ¡Alakaih kidika muihni balna kaupak damuktik naikau alahwaki mani yakat!

¹³Efraín yakat kaltalayang, amput witing walanibis balna yakat diyamwa kidika, sihm di iyang alni tingni yakat tinglau as bukwa kapat yamwi: walanibis kidika yakwi diawi ina atnin.”[30]

¹⁴¡Kalatah Papang, kalanam dini kidika! ¡Diatah baninapas yakat muih duwas atnin kidika, dawak taniwas dis atnin kidika bik!

¹⁵Papang yulwi: “Gilgal yakat di dutni manah yayamna, dawak kidika kaupak dutni yayamna kidika yulni ūki kaupak yakmukki; baisa bik dalani ditalas awaki, kat tanituna balna bitik laih kulninna dutni bahang.

¹⁶Efraín kidika muihni yakat dakna ki; sihm pan as rikni dutlana kapat ki, dawak minik bik yakwas kapat. Walanibis duwarang bik yang lawik yamting dauwarang ki.”

¹⁷Adika tawanni yang Papang ki yulni dakakih kalawas dana; kidika bahang Papangki yaklauwi ruhmwi dawang ki, dawak muih balna pasyakat pini pa dis tulu tulu karang.