Read Mayangna Joel 1 Bible Online

Joel 1 - Mayangna bible

Joel 1

¹Adika yulni kuduh Papang yaklauwi sihna dai kidika Petuel walanibis Joel yakat.

²Manna adika yulni yamni dakanauh muih bararak balna, manna bitik kau, adika sauni muihni balna. ¿Manna di as kapat as kalahwak talas manah? ¿Manna muihmana bararak balna manina dai yakat, di kapat as kalahwak talasmana daih?

³Walamanabis balna yakat yultanang dakakawang, dawak witingna walaninabis balna yakat diyuyulwarang, dawak kidika kaupak ūk batatahnwarang yakat.

⁴Sisin balna yaklauwi bitik kasmumukna dawak as as kaswas dadawak bayakna dai kidika, witni ūk aina yakat bitik kakasna.[1]

⁵¡Manna, wasak muihni balna sahmuhtanauh! ¡Aidanauh, wain diyang balna, kat wain minik wasni kidika bik manadakyakwarang ki!

⁶Sisin kidika kalbauyang muihni balna mahni dawak pararasni kapat ki, dawak ananina kidika layan anani, dawak ananina nuhni kidika laih layan yal anan kapat ki, bahang yang sauki akat aiwi kakana.

⁷Mayang mawainki yamak balna bik daukalna, dawak ani damni panan balna unitak kidika bitik tuturna, dawak tingni rahni balna kidika turwi pihni yayamna.

⁸Yal sirau, witing alni dunin dai kidika dauna kat kaidi asnina sani manh kawa kapat,

⁹kaput kakaidi sumalyang balna kat makatyulnin ūni yakat kasnin dini, dawak wain bik dis ki minitdis dini Papang yakat kalanin kidika.

¹⁰Sau di dahnin pāni balna kidika bitik laih di diski, sau kidika dalani wauhnin laih bahngna ki. Plawar minik balna bik disna ki, wain yanimak balna bitik kusulana, dawak olib basni balna bik kusulalana.

¹¹Manna asangpas yakat, dawak wain yamak yakat wark alahwamana kidika kulnamna bukwak aidanauh, kat di dahnamana kidika bitik dislawarang, plawar minik balna bik.

¹²Wain yanimak balna kusulalana, ani damni panan balna bik dislalana. Kuku panan, mansana panan, dawak pan minik yakwa ūk balna bik kusulalana. ¡Kaput laih muih balna alasnina dai kidika disna!

¹³Manna sumalyang balna, walapni buswa pāni yakat tatuna nuhni, asna utuhni āwa, dawak aidanauh dalawa kidika yulni, kat Papangmana ūni yakat di minik diski, dawak wain bik, minitdis kalanin dini.

¹⁴Muih balna yakat uduhta diyultanauh dikaswas atnin, dawak muih bararak balna kidika bitik, makat yulnin uni yakat duyawanauh, Papang uni yakat, muih bitik kaluduhnin, dawak Papang yakat ilp yulnin.

¹⁵¡Alakaih, Papang mani kaiwi uliswi! ¡Ma yamadangni, bahwi disyamnin duaiwa kidika Parasni nuhni bitik duwa kidika kaupak!

¹⁶Mayang laih mamikpa taldabangmayang kat makasnik dakyayakwi, dawak Papang uni yakat alasnina dai kidika dahnkalna.

¹⁷Di minik dai kidika dauna, dahna pāni yakat, plawar minik dai kidika disna, dawak di minik punin uni balna dai kidika bitik daukakalna.

¹⁸¡Turuh balna kidika ampat mamahwi! Dauh kalmakunwi sihrsihr wawalwi turuh balna kidika, sīp balna bik daulalawi.

¹⁹¡Man yakat yultayang Papang, kuh yaklauwi walang kau dibasta balna dai kidika busna, dawak asangpas kau pan balna dai kidika bik busna!

²⁰¡Asangpas kau tinglau balna palni bik yuyulwi man yakat was buhlakna kidika, dawak dibasta, sihrsihr balna bitik laih busyamwi kuhpau yaklauwi!