Read Mayangna Joel 2 Bible Online

Joel 2 - Mayangna bible

Joel 2

¹Puhnin dini kidika mahka puhtanauh sayan asangni kaupak; Papang asangni holi kidika kaupak usta sahmuhtanauh. Judá kau bangkidika bitik diyukwang, kat Papang mani kidika ulisna:

²puksani nuhni atnin mani, dawak mukus mana ma yaringni yakwas atnin mani. Kalbauyang muihni pararasni dawak mahni asangpas yakat kakana, sihm mapayahlawak yaringni yakwa kapat. Kidika kapat watas bik talwas dai, dawak watbik talwas karang, di as kapat kalahwak.

³Sihm kuhpau kapat di bitik buswi; baisa kaiwi bayakwas kau uman busna ki, dawak bayak kiwak usnitkat bik. Baisa kaiwi bayakwas tanit kau laih sau adika paradais kapat dai, kauna kaiwi bayakkiwa kat kauhmak wanilang dibasta ukuswas kapat ki. ¡Di as bik sip kidika kaupak kiri yaklawas ki!

⁴Muihnina kidika laih aras kapat ki, aras kilyang balna kikira kapat kikiri,

⁵dawak asang nuhni balna munah sutwi bayayakwak parasni palni yulwa kidika sihm kalbaunin kārni balna parasni yuyulwa kapat, dawak dibasta kusulana kat kuh buswak parasni yulwa kapat yulwi. Kalbauyang pararasni balna kaluduhwi kalbauna kalahkiwasak kapat parasni yulna ki.

⁶Muih balna talwi yamaduduwak diyulwi, muhnina bitik ānina wasni dis kalalahwi.

⁷War kalbauyang ahalni balna kulninna dadasni yamaduduwas kapat kiri uiwi daklana minit yakat kilwi tanitna yakat uiwi, wiryaklawi tatalwas ki, yaihnitna yakat, pirini yakat bik kakawas barangni uiwi tanitna yakat.

⁸Biri biri kaltuklalakwaski, tanina kat barangni uiwi, dawak sibang anan manah kaiwasak walsah yakat kawi uiwi kalparna bang kaput.

⁹Tawan nuhni nining yakat uiwi kalbabauwi, daklana minit yakat kilwi kikiri, dawakat dimalyang kapat windar munah kakawi.

¹⁰Sau kalyukwi adika niningyakat, makau kisang bik kalyukna ki, waiku, dawak ma bik puksani lakna ki, yala balna bik bitik yaringni disna ki.

¹¹Papang yulni parasni alwana kapat yulwak dakakana witing kalbauyang balna duwa yakat. Kalbauyang muihni balna duwa kidika mahni palni ki; yulni dakawi yayamwa muihni balna kidika mahni ki, sip kuldi yakdas ki. ¡Papang mani kidika nuhni palni ki, dawak yamadangni palni bik ki! Muih as bik sip niningyakat yaklauwas ki.

¹²“Kauna waralaih —Papang aput yulwi—, kulnamna bitik yang kau wirlawanauh ¡Dikastas, sarahta aidanauh!”

¹³¡Watta nawatta aiwanauh manna Papangmana yakat, putmana minik kidika ista bistanauh prakmana bisnamna pāni yakat! Kat Dawan laih kulnin yudutni bahang, kulnin laihwatwi, dawak dalani lani bik duwi, wah kaiwa kidika dawak bayaknin ridi ki.

¹⁴Sip kat watwi manna yakat dalani wauhnin manawas karang, dawak blisin manasihwarang: kidika laih plawar minik dawak wain karak, Papang yakat minitdis as kalana atnin yulni.

¹⁵¡Sayan asangni yakat puhnin dini kau puhtanauh! Muih balna uduhta diyultanauh di kasnin awas;

¹⁶Papang walanibis balna uduhta maisihni kaupak usta yaktanauh. Muih bararak, walabis, dawak ta susuwa balna bitik uduhtanauh. ¡Wisam kalduduna balna kidika bik rumnina kaupak kalalahwang!

¹⁷Makat yulnin uni durkung kaupak sakripais busnin pāni kat, kidika walsah yakat, Papang sumalniyang nunuhni balna bik kaidi aput yuyulwang: “Papang walamabis balna dutni yayamna kidika dikulwinih, datangkat man dima balna kidika muih as bik yaklauwi sarahni ditalnin-awas ki; dawak datang kat sau ūk muihni balna yaklauwi taihwi dunin-awas ki, dawak dawan dauh balna yakat kulyang muihni balna kidika yulnin awaski: ‘¿Angkat sakyah manna Papangmana?’ ”

¹⁸Kaput laih, Papang kulnin yakat dalani duwa kidika niningnakana sauni muihni balna yakat; witing tawanni yakat minikun talwi,

¹⁹yulna: “Sihki, wain, plawar minik dawak disala, witingna isningnalak danin praisni, dawak datingkat watwi dawan dauh muihni balna sarahni manayuyulwas karang.

²⁰Tingpal niningkaupak sisin balna aiwa kidika, manna kaupak naikau lamukna awaki, kauhmak wanilang yakat kangting uiwarang. Tatuna uiwabang kidika Kuma Dauna yakat uiwi dadauwarang, dawak witni kau bangkidika laih Mediterráneo kumani yakat auiwarang, kaput laih muihnina kidika dutlawak wayani purwarang. ¡Di nunuhni balna yamki!”

²¹Sau alasmana mahni duta, yamaduwinih, Papang yaklauwi di nuhni yamwarang ki.

²²Tinglau balna yamaduduwinih, dibasta balna watwi sangni kakalwarang ki, pan balna minik yayakwarang ki, dawak ani damni minik, wain minik kidika balna mahni palni kalahna karang.

²³¡Sayan muihni balna alasna dutanauh, Papang niningyakat alasna dutanauh! Witing yaklauwi kalawak waslauna awarni kat, kurih yakat dawak wasma yakat bik, muhnilau yamwa dai kaput.

²⁴Plawar minik balna kidika manas karang, kaput bik wain dawak disala bik.

²⁵“Yang lawik lautik manaki dimana didisna kurihni kidika, sisin balna yaklauwi yayamwak, kidika kalbauyang muihni di daukalyang balna yang lawik sihnayang dai, manna namangna yakat.

²⁶Manna kastanama ismangnalak danin praisni kat, dawak Papangmana ayangni nuhni yamtanama, manna yulmana di tanit yamni talasmana kidika yamnayang. Baisa watas bik dating kat tawanki kidika alasni kalahwas karangki,

²⁷Manna, Israel balna amanglanamna ki, yang manna karakyang, dawak Papangmana yang, ūk diski. ¡Baisa watas bik tawanki asalni kalahwas karang!

²⁸“Adika dini bayakwak usnit kat, muih bitik minitna yakat spiritki sihki ki: walamanabis ahal dawakat yayal bik sumamalwarang, dawak muih bararak kidika amana tatalwarang, dawakat wawahma kidika laih sahmuni amana kapat tatalwarang.

²⁹Warau ahal, warau yayal minitna yakat bik spirit sihna awaki, kidika mani balna yakat;

³⁰Makau kisang yakat di talasmana dini kidika yakna awaki, dawakat sau yakat laih kalahna karang, ā, kuhpau, mukus, dawak wayau karak.

³¹Ma kidika puksani kalna karang, dawak waiku laih ā kapat kalahwarang, Papang mani nuhni yamadangni kaiwas tanit kauh.”

³²Kauna, muih bitik Dawan ayangni yakwi yuyulwarang kidika daunin kaupak yaklalana karang, kat Jerusalén kau, Sayan asangni yakat laihwi yaknin kidika sakkarang, Dawan yaklauwi pramis yamna kaput. Witing walwi yakna muihni balna kidika laih sangka karang.