Read Mayangna Amós 1 Bible Online

Amós 1 - Mayangna bible

Amós 1

¹Adika yulni kuduh Amós, Tecoa pāni kaupak sīp maintalyang as dai kidika, duwa dai Papang kaupak Israel balna yulnina kat disumalna atnin, sau isihwas tanitkau kurih bu dai yakat, Judá kingni Uzías dawak Israel kingni Joás walanibis Jeroboam, kidika, witingna manina balna dai yakat.

²Papang yulni kidika alwana kapat yulwak dakawi, Sayan asangni Jerusalén kaupak, sau kau sihrsihr balna kidika kusulawi, dawak Carmelo asangni tuna kidika watwi buhlawi.

³Aput yulwi Papang yaklauwi: “Damasco muihni balna kidika dutnina mahni yayamna, bahang diwistas laih datas awaki; kat Galaad muihni balna yakat di tataihna ayan kau.

⁴Kidika bahang Hazael uni kidika kuhkau buski, dawak kidika kuhnipau yaklauwi daukalwi dis yamwarang Ben-hadad kingni uni balna yakat.

⁵Parasni kau apahki Damasco dūrni balna kidika; Bicat-avén[1] kau kingkawa kidika daukalpamki, dawak Bet-edén[2] kau kingkawa kidika. Siria muihni balna yaklauwi laihwi Kir pāni yakat duwi uiwarang.” Papang yaklauwi yulwi.

⁶Aput Papang yaklauwi yulwi: “Gaza muihni balna kidika dutnina mahni yayamna, bahang witingna yakat wistas laih datas awaki; kat witingna tawan as laihwi warau duwi uina dai, dawak, Edom yakat warau kapat dibakanmumukna.

⁷Kidika bahang Gaza kau daklawi awaihna yakat kuhpau kau busna awaki, dawak kidika kuhnipau yaklauwi kingni uni balna kidika busyamna karang.

⁸Daukaltik dis yamki, Asdod kau kingkawa yakat, dawak Ascalón kau kingkawa yakat bik. ¡Parasni bitik kau Ecrón niningyakat lawana awaki, dawak filisteo muihni balna bitik dadauwarang!”

⁹Aput Papang yulwi: “Tiro muihni balna kidika dutnina mahni palni yayamna, witingna yakat wistas laih datas awaki; kat witingna kidika Edom parasni dinit yakat bubukna dai, tawan as, wirah lani kat pramis yayamna dai.

¹⁰Kidika bahang Tiro kau daklana yakat kuhpau kau buski, dawak kidika kuhnipau yaklauwi kingnina uni balna kidika daukalwi dis yamwarang.”

¹¹Aput Papang yulwi: “Edom muihni balna kidika dutnina mahni palni yayamna, bahang witingna yakat diwistas laih datas awaki; kat tingnina yakat isparah duwi dawi, minikun talnin lani dis wahainina Israel balna yakat di uhuina. Annin kidika laihwawatwasdai, dawakat, kulnin dutni kidika bik yudutni yayamwas dai.

¹²Kidika bahang Temán yakat kuhpau lakki, dawakat kidika kuhnipau yaklauwi Bosra kingni uni balna daukalwi dis yamwarang.”

¹³Aput Papang yulwi: “Amón balna kidika dutnina mahni yayamna, witingna yakat diwistas laih datas awaki; kat witingna baisa saunina nuhni dunin yulni Galaad kau yayal muihkaruk balna yakat pipitna dai.

¹⁴Kidika bahang Rabá daklawi awaihna yakat kuhpau kau buski ki, dawakat kidika kuhnipau yaklauwi kingni uni balna daukalwi, sarahwa pasyakat, dawak madah kat was alwana karak lauwa kapat yakat.

¹⁵Dawakat kingni kidika sau ūk yakat laihwi duwi uiwarang, witing ahalni nunuhni duwa sakdai kidika balna karak.”